Ukuthembeka Kuyavuzwa
1 KumaHebhere 11:6 sixelelwa ukuba uThixo “uba ngumvuzi wabo bamfuna ngokunyamekileyo.” Enye indlela abavuza ngayo abakhonzi bakhe abazinikeleyo ‘abathembeke kwizinto ezimbalwa’ ‘kukubamisela phezu kwezinto ezininzi.’ (Mat. 25:23) Ngamany’ amazwi, uYehova usoloko ewuvuza umsebenzi omhle ngokunika amangqina akhe athembekileyo amalungelo angakumbi enkonzo.
2 Ukuthembeka kompostile uPawulos kwavuzwa ngokwabelwa kwakhe kubulungiseleli obamhambisa kwizixeko needolophana zaseYurophu naseAsia Minor. (1 Tim. 1:12) Nangona kwakufuneka azibhokoxe ekuphumezeni ubulungiseleli bakhe, uPawulos wayelixabisa gqitha ilungelo awayelifumene. (Roma 11:13; Kol. 1:25) Wawubonakalisa umbulelo osuk’ entliziyweni ngokufuna amathuba okushumayela. Ngomsebenzi wakhe wenzondelelo, wabonisa ngokucacileyo ukuba wayephila ngokuvisisana nokholo lwakhe. Umzekelo wakhe usishukumisela ekubeni siwaxabise amalungelo enkonzo esinawo.
3 UYehova Uye Wasinika Ubulungiseleli: Sibonisa njani thina ukuba sinembono efanayo nekaPawulos ngeli lungelo lingumvuzo? Ngokufuna iindlela zokwandisa isabelo sethu kubulungiseleli. Ngokuxhakamfula naliphi na ithuba lokunikela ubungqina ngokungacwangciswanga nakwizindlu ngezindlu. Ngokubuyela kuwo onke amakhaya ebengenabantu nangokubuyela kubo bonke abanomdla. Yaye siyazigcina izithembiso esizenzayo zokuqhuba izifundo zeBhayibhile zamakhaya.
4 Mayela nobulungiseleli bethu, uPawulos waluleka: “Ube kulo ngokungxamisekileyo.” (2 Tim. 4:2) Into engxamisekileyo ifuna ingqalelo ekhawulezileyo. Ngaba ubulungiseleli bethu sibuphumeza ngongxamiseko, sibubeka kuqala ebomini bethu? Ngokomzekelo, besingenakuvumela ukuzihlaziya nezinye izinto zobuqu ngempela-veki ziphazamisane nexesha esifanele silinikele kubulungiseleli basentsimini. Ekubeni seyisekile lelokuba isiphelo sale nkqubo sisondela ngokukhawuleza, sikwakholelwa kwelokuba ukushumayela iindaba ezilungileyo zoBukumkani ngowona msebenzi ubalulekileyo esinokuwenza.
5 Ukuthembeka kwethu kuThixo kubonakala ngokuthembeka nokunyaniseka kuye nangokuqhubeka nomsebenzi asinike wona. Masibufeze ngokuzeleyo ke ubulungiseleli bethu, ukuze uYehova akuvuze kakhulu ukuthembeka kwethu.