Ukwabelana Nabanye NgeMfihlelo Yolonwabo Lwentsapho
1 Intsapho sisiseko sebutho labantu, ibe ngenxa yayo kuvela iidolophana, izixeko, amaphondo nazo zonke izizwe. Namhlanje intsapho iphantsi kwengcinezelo ngaphezu kokuba kwakunjalo ngaphambili. Iimpembelelo ezinamandla zisongela kwaubomi bentsapho. Hayi indlela esinombulelo ngayo kuba uYehova, ethe njengoMsunguli welungiselelo lentsapho, wasinika imiyalelo ukuze sibe nolonwabo lwentsapho! Abo balandela imigaqo yakhe bafumanisa ukuba iingxaki ziyancipha itsho iphumelele ke intsapho. NgoSeptemba sinelungelo lokwabelana nabanye ngencwadi ethi Imfihlelo Yolonwabo Lwentsapho. Yiya ebantwini ukuze uthethe nabo ngobomi bentsapho. Yiba nobuhlobo, isimo sengqondo esivumayo nengqiqo. Unokuthini?
2 Usenokuqalisa ngokubuza lo mbuzo:
◼ “Ngaba wakha waphawula ukuba iintsapho ezininzi zikufumanisa kunzima ukumelana neenzingo zobomi? [Vumela impendulo.] Iingxelo zibonisa ukuba uninzi lwabantu lufumana iinkathazo emakhayeni alo. Ukholelwa kwelokuba yintoni enokunceda iintsapho zizinze zize zonwabe ngakumbi? [Vumela impendulo.] Ekubeni inguThixo owasungula ilungiselelo lentsapho, ngaba ibingayi kuba yinto efanelekileyo ukuhlolisisa imigaqo ayinikeleyo? [Funda eyesi-2 kuTimoti 3:16, 17.] Loo mfundiso iyingenelo ikho kule ncwadi ithi, Imfihlelo Yolonwabo Lwentsapho.” Yandula ke ubuze loo mntu oko acinga ukuba kuyingxaki exhaphakileyo entsatsheni, mbonise isahluko esixubusha ngaloo ngxaki, uze umhambisele le ncwadi ngee-R4,00.
3 Xa ubuyela, usenokuqalisa isifundo seBhayibhile ngokuthi:
◼ “Ndiye ndacinga ngoko uye wakutsho ngobomi bentsapho, yaye ndikuphathele okuthile endicinga ukuba uya kukuthanda. [Mbonise incwadana enemifanekiso ethi Okufunwa NguThixo, tyhila kwiphepha 16, uze ufunde imibuzo emithandathu esemantla.] Licacile elokuba, ngamnye entsatsheni umele aphumeze eyakhe indima ngenjongo yokufak’ isandla kulonwabo lwentsapho. Ukuba unganayo imizuzwana nje embalwa, ndingakubonisa indlela enokukunceda ngayo le nkcazelo.” Yandulani ke niqalise ukufundisisa isifundo 8.
4 Enye indlela yokuqalisa ingxubusho kukukhankanya ingxaki, mhlawumbi ngokuthi:
◼ “Nangona wonk’ ubani elufuna ulwaneliseko, kubonakala ngathi iintsapho ezininzi azinalo. Ucinga ukuba yintoni eya kuzinceda zifumane ulonwabo lokwenene? [Vumela impendulo.] Kude kudala, iBhayibhile yaye yazichaza iingxaki esizibonayo kwiintsapho namhlanje. [Funda eyesi-2 kuTimoti 3:1-3.] Noko ke, iBhayibhile ikwaxelela iintsapho oko zimele zikwenze ukucombulula ezi ngxaki zize zifumane ulonwabo oluhlala luhleli. Imigaqo yayo iyafumaneka kule ncwadi, Imfihlelo Yolonwabo Lwentsapho.” Yandula ke umbonise ibhokisi yempinda ekupheleni kwesahluko esifanelekileyo, yifunde, uze umhambisele le ncwadi ngomnikelo wee-R4,00.
5 Xa ubuya, sebenzisa incwadana enemifanekiso ethi “Okufunwa NguThixo” ukuqalisa isifundo. Unokuthi:
◼ “Ndiye ndachukumiseka kukuvuma kwakho ukuhlolisisa imigaqo yeBhayibhile yobomi bentsapho. Amava aye abonisa ukuba ezona ziqhamo zihle zifumaneka ngokulandela isiluleko esisebenzisekayo esiseBhayibhileni. Nantsi ingcaciso elula yesizathu sokuba nditsho.” Funda isiqendu sokuqala kwisifundo 1 kwincwadana enemifanekiso ethi Okufunwa NguThixo, kuquka INdumiso 1:1-3 okanye uIsaya 48:17, 18. Ukuba ithuba liyakuvumela, sigqibezele esi sifundo. Cela ukubuya ukuze nifunde isifundo esilandelayo kunye.
6 Ukuzisebenzisa Kakuhle Iimpapasho Zethu: Lonke uncwadi lwethu lunenkcazelo eyingenelo ekuncedeni abantu bafunde inyaniso. Ngesi sizathu, uMbutho uye walithoba ixabiso leqela leempapasho ezindala ngelinge lokuzinika abantu abaninzi kangangoko kunokwenzeka. Kuwo onke amabandla kuye kwathunyelwa uludwe lweempapasho neelwimi ezikhoyo ngazo. USeptemba no-Oktobha usivulela ithuba elihle lokuhambisa ezi mpapasho kumhlaba ongabelwanga bani nongafane usetyenzwe. Kwakhona siye safumana nemvume kwiQumrhu Elilawulayo ukuba sihambise INguqulelo Yehlabathi Elitsha YeZibhalo ZamaKristu ZesiGrike ngeelwimi ezintlanu zeli ngomnikelo othotyiweyo ozii-R4,00. Unokuzidibanisa njani IZibhalo ZamaKristu ZesiGrike kunye nomnikelo oqhelekileyo wencwadi ethi Ulonwabo Lwentsapho?
7 Xa uthetha nabantu abantetho isisiBhulu, isiSuthu, isiTswana, isiXhosa, okanye isiZulu, hambisa IZibhalo ZamaKristu ZesiGrike kunye nale ncwadi ngomnikelo wee-R8,00. Abaninzi abaqhelananga nebinzana elithi “IZibhalo ZesiGrike,” xa kunjalo unokusebenzisa ibinzana elithi “ITestamente Entsha.” Balaselisa ukubaluleka kweNguqulelo Yehlabathi Elitsha. Usenokutsalel’ ingqalelo komnye wemixholo ekwicandelo elithi “Imixholo YeBhayibhile Yengxubusho” uze uwudibanise nencwadi ethi Ulonwabo Lwentsapho. Okanye usenokumbonisa ukubaluleka kwesalathiso samagama eBhayibhile ngokumbonisa indlela emnceda ngayo umfundi afumane izibhalo azaziyo. IZibhalo ZamaKristu ZesiGrike zikwanokuhanjiswa nencwadi enye okanye ezingakumbi kwezilingene ipokotho eziyi-R1,00.
8 Masenze unako-nako ukuze sabelane nabanye ngemfihlelo yolonwabo lwentsapho—silandele imiyalelo echazwe kwiLizwi likaThixo.—INdu. 19:7-10.