Ukunceda Iintsapho Zifumane Ikamva Elihlala Lihleli
1 “Ukubawa kuluncedo,” latsho elinye igosa kwezotyalo-zimali lixelela abafundi bakwanokholeji ababethwesw’ iimbasa, laleka ngelithi: “Unokubawa uze sekunjalo uzive uvuya.” Lo ngumzekelo wendlela ihlabathi elikukhuthaza ngayo ukuzingca njengendlela yokuqinisekisa ikamva lakho. Ngokwahluke mpela koku, uYesu wafundisa ukuba umKristu umele ‘azincame . . . kuba koba nayiphi ingenelo ngomntu ukuba uzuza ihlabathi liphela kodwa aphulukane nomphefumlo wakhe?’ (Mat. 16:24-26) Ukuze afumane ikamva elihlala lihleli, umntu umele abusekele ekwenzeni ukuthanda kukaThixo ubomi bakhe bonke—olona sukelo lubalulekileyo lweentsapho namhlanje. (INdu. 143:10; 1 Tim. 4:8) Lo mbandela uchazwe kwisahluko sokugqibela sencwadi ethi Imfihlelo Yolonwabo Lwentsapho. Le mpapasho intsha inceda abantu babone eyona nto ibalulekileyo ebomini nendlela abanokuzinceda ngayo iintsapho zabo. Njengoko siqhubeka sishumayela iindaba ezilungileyo kuzo zonke iindawo, yintoni esinokuyithetha eya kuthi ikhuthaze abo sidibana nabo bafunde incwadi ethi Ulonwabo Lwentsapho? Nanga amanye amacebiso:
2 Emzini nasesitratweni, usenokuzama ukusebenzisa iphecana elithi “Bunandiphe Ubomi Bentsapho” ukuqalisa incoko. Unokubuza uthi:
◼ “Phezu kwawo nje onke amaxhala abangelwa bubomi banamhlanje kuthi, ucinga ukuba kunokwenzeka ukuba nentsapho eyonwabe ngokwenene? [Vumela impendulo.] Eli phecana lisiqinisekisa ukuba kunokwenzeka. Ngaba ubungethandi ukulifunda?” Ukuba uyalamkela, usenokutyatyadula uthi: “Ekubeni unomdla kulo mbandela, nawe unokuyithanda le ncwadi inikela icebiso elineenkcukacha ngendlela yokufumana ulonwabo entsatsheni.” Mbonise iziqulatho zencwadi ethi Ulonwabo Lwentsapho. Balaselisa imixholo embalwa yezahluko ebangel’ umdla. Tyhila kwiphepha 10, uze ufunde isivakalisi sokugqibela kwisiqendu 17 ukusa ekupheleni kwesiqendu 18. Hambisa le ncwadi ngomnikelo wee-R4,00. Mcacisele ukuba kusekuninzi obungathanda ukumchazela kona, uze umbuze ixesha onokuphinda ubuye ngalo.
3 Unokuhlabela mgama nencoko yakho yexa elidluleyo ebingobomi bentsapho obonwabisayo ngokuthi:
◼ “Bendingathanda ukukubonisa okuthile okukwincwadi obuyithabathile endicinga ukuba uya kukuxabisa. Isahluko sokugqibela sitsalel’ ingqalelo kwimfihlelo yokwenene yolonwabo lwentsapho. [Funda isiqendu 2 kwiphepha 183.] Phawula ukuba ukusebenzisana ekwenzeni ukuthanda kukaThixo kungundoqo. Sikhuthaza ukuba iintsapho zifundisise kunye iBhayibhile ukuze zifunde oko kukukuthanda kukaThixo nendlela ezinokukusebenzisa ngayo entsatsheni. Siqhubela abantu isifundo seBhayibhile ngesisa ibe oko kuthabatha nje iinyanga ezimbalwa. Ukuba ungandivumela, ndingakubonisa indlela esiqhutywa ngayo.” Buya uphethe incwadana enemifanekiso ethi Yintoni UThixo Ayifunayo Kuthi? okanye incwadi ethi Ulwazi, nayiphi na kuzo eya kufaneleka.
4 Xa uncokola nofunda nabo esikolweni okanye ulutsha entsimini, usenokufumana impendulo entle kulo mbuzo:
◼ “Kubaluleke kangakanani kubazali nabantwana babo ukusoloko benxibelelana? [Vumela impendulo.] Phawula okuthethwa yile ncwadi ingobomi bentsapho ‘Ngonxibelelwano Olunyanisekileyo Nolukhululekileyo.’ [Funda isiqendu 4 sonke nesivakalisi sokuqala kwisiqendu 5 kwiphepha 65 kwincwadi ethi Ulonwabo Lwentsapho.] Iziqendu ezilandelayo zinikela amacebiso asebenzisekayo ngendlela yokuphucula unxibelelwano entsatsheni. Umxholo wale ncwadi uthi Imfihlelo Yolonwabo Lwentsapho. Ukuba ungakuthanda ukuyifunda ungazifumanela le ngomnikelo wee-R4,00.” Mcacisele ukuba uza kubuya kamva ukuze uve amagqabaza akhe ngoko akufundileyo.
5 Unokuhlabela mgama nencoko yakho yokuqala noselula ngokuphathelele unxibelelwano lwabazali nabantwana ngokuthi: ◼ “Ndiwuthandile umdla owubonakalisileyo mayela nokuba nonxibelelwano oluhle kwintsapho yakowenu. Unokuthi nguwuphi owona mbandela ubalulekileyo abazali nabantwana abafanele bawuxubushe?” Vumela impendulo. Yandula ke utyhile kwiphepha 68 kwincwadi ethi Ulonwabo Lwentsapho, ufunde impendulo efumaneka ngasekuqaleni kwisiqendu 11. “Ukuba nesifundo seBhayibhile iiveki ngeeveki yeyona ndlela isemagqabini yokufumana ulwazi ngoThixo.” Hambisa incwadana enemifanekiso ethi Yintoni UThixo Ayifunayo Kuthi? Mcacisele ukuba izifundo zayo ezili-16 zichaza ngokusisiseko okuqulethwe sisigidimi seBhayibhile. Funda intshayelelo kwiphepha 2, nize nixubushe kunye isifundo sokuqala. Hambisa le ncwadana inemifanekiso ngomnikelo we-R1,20.
6 Ukuba udibana nomzali kwindlu ngendlu, okanye mhlawumbi epakini okanye kwiindawo ezineevenkile, usenokuvus’ umdla ngokuthi:
◼ “Ndiqinisekile ukuba uya kuvumelana nam xa ndisithi ukukhulisa abantwana namhlanje kulucelomngeni lokwenene. Ucinga ukuba yintoni enokukhusela intsapho yakho kwiimpembelelo ezingakhiyo? [Vumela impendulo.] Nali elinye icebiso eliphilileyo endiye ndalithanda.” Mchazele ngomzekelo okwisiqendu 1, uze ufunde isiqendu 2 kwiphepha 90 kwincwadi ethi Ulonwabo Lwentsapho. Mcacisele indlela elunikela ngayo ukhokelo olulungeleleneyo nolusebenza ngokwenene ekukhuseleni iintsapho kwiimpembelelo ezitshabalalisayo. Cela ukumshiyela yona ngomnikelo wee-R4,00, uze umchazele ukuba ukulungele ukuphendula yonke imibuzo asenokuba nayo.
7 Xa ubuya okwesibini kumzali obethabathe incwadi ethi “Ulonwabo Lwentsapho,” unokuhlabela mgama nencoko ngokuthi:
◼ “Ukuqala kwethu ukudibana, ndabona ukuba ubakhathalele ngokwenene abantwana bakho yaye ufuna ukwenza konke okusemandleni akho ukubakhusela kwiimpembelelo ezingalunganga. Mhlawumbi akukayifundi, kodwa kukho okuthile okubaluleke kunene endiye ndakuphawula kula ncwadi bendikushiyele yona ofanele ukukubona nawe. [Funda isiqendu 19 kwiphepha 59.] Ukuhlakulela ulwalamano noThixo kufuna simazi ngokuphengulula iLizwi lakhe elibhaliweyo, iBhayibhile. Ngaba ubungethandi ndikubonise indlela esiyifundisisa ngayo iBhayibhile njengentsapho?”
8 Abacebisi behlabathi abanako ukuzibonisa indlela esa kulonwabo iintsapho kodwa ngokuqinisekileyo baya kuzishiya zidanile. Masiyisasaze ngokubanzi le ncwadi ithi Ulonwabo Lwentsapho ukuze abantu kuzo zonke iindawo bancedwe liLizwi likaThixo ukuze bafumane ikamva elihlala lihleli.—1 Tim. 6:19.