Ngaba Siza Kuphinda? Elinye Ikhwelo Elifuna Oovulindlela Abangabancedani
1 Yintoni le siza kuyiphinda? Ngaba siza kuba ngoovulindlela abangabancedani ngexesha leSikhumbuzo? Isihlomelo soBulungiseleli Bethu BoBukumkani bukaFebruwari 1997 sayithimba ingqalelo yethu ngomxholo waso ongqalileyo othi: “Kufunwa—Oovulindlela Abangabancedani Abali-10-000.” Sasinentembelo yokuba niya kulithabatha nzulu eli khwelo. Xa kwadityaniswa ingxelo kaMatshi 1997, sachulumanca sakufumanisa ukuba abangama-8728 baye bangenela inkonzo yobuvulindlela bobuncedani! Xa sisongezelela kwelo nani oovulindlela abathe ngxi abangama-4803 noovulindlela abakhethekileyo abali-174 abaye banikela ingxelo kuloo nyanga, sifumanise ukuba malunga nama-20 ekhulwini abo bonke abavakalisi abaphantsi kwesebe loMzantsi Afrika babekwinkonzo yobuvulindlela. Ngaba siza kuphinda siyenze loo nto ngeli xesha leSikhumbuzo?
2 Sibancoma ngokufudumeleyo bonke abaye benza umgudu okhethekileyo ekwandiseni umsebenzi wabo wenkonzo yasentsimini kunyaka odluleyo. Ngokucacileyo, nonke niye naqhutywa luthando lokungazingci ngoYehova uThixo nangommelwane wenu. (Luka 10:27; 2 Pet. 1:5-8) Abavakalisi abaphantsi kweemeko ezahlukeneyo zobomi baye benza uhlengahlengiso ukuze babe ngoovulindlela abangabancedani. Kwelinye ibandla, abavakalisi abangama-51 baba ngoovulindlela bonke ngenyanga enye, kuquka abadala abaninzi, umama onentombi eneenyanga ezili-15 ubudala, udade owawushiyayo umsebenzi wakhe waza wafumana umsebenzi wesingxungxo owamvulela ithuba lokuba nguvulindlela, nodade osele ekhulile ongazange abe nguvulindlela ngaphambili. Umveleli wesiphaluka wabhala wathi: “Kwenziwa umgudu omangalisayo kumsebenzi wokushumayela. . . . Oku akubi nagalelo entsimini kuphela kodwa amabandla aba nehlombe gqitha. Abazalwana bayakunandipha ukwazana kakuhle nokubona imiphumo emihle kubulungiseleli.”
3 Abantu abaselula abazange babekelwe ecaleni kunyaka odluleyo. Umvakalisi ongabhaptizwanga oneminyaka eli-13 ubudala waseUnited States ubudala ebesoloko elindele ixesha laxa eya kufuzisela ukuzahlulela kwakhe kuYehova. Emva kokuba ebhaptiziwe ngoFebruwari, wabhala evakalisa umnqweno wakhe wokuba nguvulindlela ngoMatshi: “Njengoko kungasekho nto inokundithintela ngoku, ndiye ndafaka isicelo sam ngokukhawuleza. . . . Ngesingawandiphanga amava amnandi ukuba beningenzanga isimemo sothando sokuba kungenelwe ubuvulindlela. Ndiyambulela uYehova ngokuba nelungelo lokuba phakathi kwabali-100000 [eUnited States] abaye basabela.” Uzibekele usukelo lokuba aphinde abe nguvulindlela.
4 Mhlawumbi ubuphakathi kwabangama-8728 ababenesabelo kumsebenzi wobuvulindlela bobuncedani kuMatshi wonyaka odluleyo, okanye abangama-7264 ngoAprili, okanye, abangama-4564 ngoMeyi. Ngaba uya kuphinda wenjenjalo nakulo nyaka? Ukuba akuzange ukwazi ukuba nguvulindlela kunyaka odluleyo, ngaba unokukwenza oko kulo nyaka? Ngaba sinokuthi kratya kwi-10 198, inani labo baba ngoovulindlela abangabancedani ngoAprili 1990? Elo yaba lelona nani likhulu loovulindlela abangabancedani kunayo nayiphi na enye inyanga kwisebe laseMzantsi Afrika.
5 Nikela Ingqalelo KuAprili NoMeyi: Kulo nyaka uSuku olukhethekileyo Lwamaphephancwadi luza kuba ngoMgqibelo, ngoAprili 4, size iSikhumbuzo sibe ngoMgqibelo, ngoAprili 11, nto leyo eya kwenza uAprili abe yinyanga entle yokwandisa ubulungiseleli. (2 Kor. 5:14, 15) Kwiintsuku zokuqala ezili-11 zale nyanga, siya kunikela ingqalelo ekumemeni abaninzi kangangoko kunokwenzeka ukuba babekho kwiSikhumbuzo. Ukuba uceba ukuba nguvulindlela ongumncedani, nceda ufake isicelo sakho kuselithuba ngaphambi komhla ofuna ukuqalisa ngawo.—1 Kor. 14:40.
6 Ekubeni uMeyi eneempelaveki ezintlanu ezizeleyo, abavakalisi abahamba isikolo okanye abaphangela ixesha elizeleyo banokukufumanisa kulula ukuba ngoovulindlela abangabancedani kule nyanga. Ngokuzenzela ucwangciso lokusebenza iiyure ezilishumi kwinkonzo yasentsimini mpelaveki nganye kwezi zintlanu, kuya kufuneka wenze ucwangciso lokusebenza iiyure nje ezilishumi ezongezelelekileyo ebudeni baloo nyanga ukuze ufikelele iiyure ezingama-60 ezifunekayo.
7 Ebudeni buka-Aprili noMeyi, siza kube sihambisa umrhumo weMboniselo njengomnikelo woncwadi. Xa umrhumo ungamkelwa, hambisa INguqulelo Yehlabathi Elitsha YeZibhalo ZamaKristu ZesiGrike kunye nemibhalo yamaphephancwadi. Oku kufanele kukhuthaze abangakumbi kuthi ukuba bazabalazele ukuba ngoovulindlela. Kutheni sisitsho nje? Kulula ukuwahambisa la maphephancwadi ibe kumnandi ukuwasebenzisa kubulungiseleli. Unokuwasebenzisa kuzo zonke iinkalo zenkonzo—kumsebenzi wendlu ngendlu, xa usebenza ezivenkileni, kwanaxa uthetha nabantu abasezitratweni, kwiindawo zokupaka iinqwelo-mafutha nasezipakini kwanakwezinye iimeko ezingacwangciswanga. Okona kubalulekileyo kukuba, IMboniselo noVukani! zimela iinyaniso zoBukumkani. Zitsalela ingqalelo ekuzalisekeni kwesiprofeto seBhayibhile, zinikela ubungqina bokuba uBukumkani bukaThixo buyalawula. Zichaphazela ubomi babafundi bazo ngokuthetha ngeemfuno zokwenene zabantu. Ukuba sicinga ngendlela ubomi bethu obuye bachukunyiswa ngayo ngaba lindixesha baxabisekileyo, oko kuya kusishukumisela ekubeni sibe nesabelo ekubasasazeni ngokubanzi kangangoko kunokwenzeka ngoAprili nangoMeyi.
8 Njengoko ulungiselela lo msebenzi mkhulu wamaphephancwadi, kuya kukunceda ukuhlolisisa la manqaku: “IMboniselo NoVukani!—Oolindixesha Benyaniso Abasexesheni” (IMboniselo kaJanuwari 1, 1994), “Wasebenzise Kakuhle Amaphephancwadi Ethu” (UBulungiseleli Bethu BoBukumkani bukaSeptemba 1995) nelithi “Zilungiselele Eyakho Intshumayelo Yamaphephancwadi” (UBulungiseleli Bethu BoBukumkani bukaOktobha 1996).
9 Badala Khokelani: Ukuze bancede abavakalisi abaninzi abebengoovulindlela kunyaka odluleyo, abadala belinye ibandla bakhuthaza ukuba omnye uMgqibelo wenyanga ube lusuku olukhethekileyo lomsebenzi wenkonzo webandla lonke. Kwenziwa amalungiselelo okuba kudityanwe ngamaxesha amaninzi ahlukeneyo ebudeni bolo suku, kuvulwa ithuba lokuba bonke abasebandleni babe nesabelo kwiindlela ezahlukeneyo zokunikela ubungqina. Oku kwakuquka ukusebenza kumashishini, ukunikela ubungqina ezitratweni, ukungena kwizindlu ngezindlu, ukwenza amabuyelo, ukubhala iileta nokunikela ubungqina ngemfonomfono. Kwasatyelwa kakuhle kakhulu, kuba abavakalisi abali-117 baba nenxaxheba kwinkonzo yasentsimini ebudeni bolo suku. Bachitha isimbuku seeyure ezingama-521 kubulungiseleli, baza bahambisa amaphephancwadi, iincwadana ezinemifanekiso neencwadi ezingama-617! Uvuyo olwalubangelwa nguloo Mgqibelo lwaqhubeka de kwangeCawa, linani elaphantsa laphul’ izikeyi lababekho kwiNtetho Yesidlangalala nakwiSifundo seMboniselo.
10 KwiNtlanganiso Yenkonzo nganye ngoAprili nangoMeyi, ibandla lifanele likhunjuzwe ngexesha nendawo eziya kuqhutyelwa kuyo iintlanganiso zenkonzo yasentsimini zeveki elandelayo, ingakumbi ukuba kwenziwe amalungiselelo awongezelelekileyo kunalawo adla ngokucwangciswa ngokuqhelekileyo. Oovulindlela abathe ngxi kwakunye nabavakalisi abangengabo oovulindlela abangabancedani bayakhuthazwa ukuba bawaxhase la malungiselelo eqela ngokuvuma kweemeko zabo.
11 Umveleli wenkonzo kuya kufuneka adibane nomzalwana owaba intsimi ukuze enze amalungiselelo okuba kusetyenzwe leyo ingagutyungelwa ngokufuthi. Kunokunikelwa ingqalelo engakumbi kwizindlu ebezingenabantu nasekunikeleni ubungqina ezitratweni nasezivenkileni. Kwakhona kunokugxininiswa ekunikeleni ubungqina ngamarhatya. Kufanele kuodolwe isixa esaneleyo samaphephancwadi kulungiselelwa umsebenzi ongakumbi ngoAprili nangoMeyi.
12 Abavakalisi Abaninzi Banokufaneleka: Isivakalisi sokuqala sesicelo sobuvulindlela bobuncedani sithi: “Ngenxa yothando lwam ngoYehova nomnqweno wam wokunceda abanye bafunde ngaye nangeenjongo zakhe zothando, bendingathanda ukwandisa isabelo sam enkonzweni yasentsimini ngokubhalisa njengovulindlela ongumncedani.” Ukuthanda uYehova nokufuna ukunceda abanye ngokomoya kusisiseko sokuzinikela kwethu. (1 Tim. 4:8, 10) Ukuze afaneleke ukuba nguvulindlela ongumncedani, ubani umele abhaptizwe, abe nokuma kokuziphatha okuhle aze akwazi ukusebenza iiyure ezingama-60 kubulungiseleli. Njengoko sonke sihlolisisa iimeko zethu, ngaba abanye bethu abangazange babe ngoovulindlela ngaphambili banokwenjenjalo kulo nyaka ngoAprili nangoMeyi?
13 Abaninzi ebandleni banokufumanisa ukuba nabo banokuba ngoovulindlela xa bebona abanye abaneemeko ezifana nezabo bebhalisa. Abantwana abahamba isikolo, abalupheleyo, abo baphangela ixesha elizeleyo, kuquka abadala nezicaka zolungiselelo baye bangoovulindlela abangabancedani abanempumelelo. Umama wekhaya onabantwana ababini nophangela ixesha elizeleyo wafikelela iiyure ezingama-60, wahambisa amaphephancwadi ali-108 waza waqalisa izifundo zeBhayibhile ezi-3 ngenyanga enye nje enguvulindlela ongumncedani. Wakwenza njani oko? Ngexesha lesidlo sasemini emsebenzini wayesebenza kwintsimi ekufutshane apho, wayenikela ubungqina ngokubhala iileta ibe wayenikela ubungqina kwiindawo zokupaka iinqwelo-mafutha nasezitratweni. Kwakhona wayelusebenzisa ngokunengenelo usuku angasebenziyo ngalo ngokuthi veki nganye abe nesabelo kunye nebandla kwinkonzo yasentsimini. Nangona ekuqaleni wayecinga ukuba ubuvulindlela bobuncedani lusukelo olungafikelelekiyo, wakwazi ukuyiqabela loo miqobo ngokufumana ukhuthazo kwabanye nangokuzenzela ucwangciso olusebenzisekayo.
14 Eqinisekisa abafundi bakhe uYesu wathi: “Idyokhwe yam yeyobubele nomthwalo wam ukhaphukhaphu.” (Mat. 11:30) Lowo ngumxholo wenqaku elalikhuthaza gqitha kwiMboniselo ka-Agasti 15, 1995. Libalisa ngodade owayesebenza ixesha elizeleyo kumsebenzi wengqesho ekusetyenzwa kakhulu kuwo. Ngaba wacinga ukuba akanakukwazi kwaphela ukuba nguvulindlela ongumncedani? Akunjalo. Enyanisweni, wakwazi ukuba nguvulindlela nyanga zonke. Ngoba? Ngenxa yokuba wayevakalelwa kukuba umsebenzi wobuvulindlela umnceda ahlale elungelelene. Ukunceda abantu njengoko babefunda inyaniso yeBhayibhile nokubabona beguqula ubomi babo ukuze bazuze inkoliseko kaThixo kwamzisela olona vuyo lukhulu kubomi bakhe obuxakekileyo.—IMize. 10:22.
15 Nakuphi na ukuzincama nohlengahlengiso ekufuneka umntu elwenzile ukuze abe nguvulindlela kuvuzwa ngokutyebileyo ngeentsikelelo azinandiphayo. Omnye udade wabhala wathi ngamava akhe okuba nguvulindlela ongumncedani: “Kwandinceda ndayeka ukucinga ngesiqu sam ndaza ndanikela ingqalelo engakumbi ekuncedeni abanye. . . . Ndiyabuncomela kwabo banokubuthabatha.”
16 Kufuna Ucwangciso Oluhle: Kwiphepha lokugqibela lesi sihlomelo, siye sakhuphela ucwangciso obelukuBulungiseleli Bethu BoBukumkani bukaFebruwari 1997. Mhlawumbi olunye lungqamana neemeko zakho. Njengoko uluhlolisisa, cinga ngemisebenzi yakho eqhelekileyo yenyanga. Yiyiphi imisebenzi yasekhaya onokuyenza ngaphambi kokuba nguvulindlela okanye onokuyibekela bucala okwethutyana de uyeke ukuba nguvulindlela? Ngaba unokulinciphisa ixesha olichithela ekuzonwabiseni, ekuzihlaziyeni okanye olichitha ungenzi nto? Kunokujonga isimbuku seeyure ezingama-60 ezifunekayo, yenza ucwangciso lwakho losuku ngalunye okanye lweveki nganye. Kufuneka iiyure ezi-2 ngosuku okanye iiyure ezili-15 kuphela ngeveki kuvulindlela ongumncedani. Khangela olu cwangciso, uze unepensile esandleni ubone ukuba ungalwenza njani ucwangciso lwakho lwenkonzo olufanele wena nentsapho yakho.
17 Intsabelo entle nenkxaso eyongezelelekileyo eye yaboniswa libandla ngobulungiseleli kunyaka odluleyo yomeleza inzondelelo yomnye uvulindlela othe ngxi owabhala wathi: “Ndidlulisela umbulelo ongazenzisiyo kuni ngokhuthazo olunothando lokuba senze umgudu okhethekileyo wokuxhasa ubuvulindlela bobuncedani. . . . Ucwangciso enicebise ukuba silusebenzise luye lwanceda abaninzi abangazange babe ngoovulindlela ngaphambili babona ukuba banokuba ngabo. . . . Kundivuyisa gqitha ukuba yinxalenye yentlangano kaYehova nokulandela ukhokelo olunothando lwekhoboka elithembekileyo neliyingqondi.”
18 IMizekeliso 21:5 isiqinisekisa ngelithi: “Iingcinga zabakhutheleyo zisingisa elungeniselweni lodwa.” IMizekeliso 16:3 isikhuthaza isithi: “Qengqela kuYehova izenzo zakho, zizimaseke iingcinga zakho.” Ewe, ngokubandakanya uYehova ngomthandazo kwisigqibo sethu nangokuthembela ngokuqinileyo kuncedo lwakhe ukuze siphumelele, sinokuqiniseka ngamalungiselelo ethu okuba ngoovulindlela abangabancedani. Sisenokuthi emva kokuba siphawule indlela olusebenza kakuhle ngayo ucwangciso lwethu kwinyanga enye okanye ezimbini zokuba nguvulindlela ongumncedani, kwisicelo sobuvulindlela bobuncedani siya kukwazi ukuphawula kwibhokisi efundeka ngolu hlobo: “Phawula apha ukuba unqwenela ukukhonza ngokuqhubekayo njengovulindlela ongumncedani ude ubuye wazise ngokunye.” Enoba iyintoni na imeko, sinokukhangela phambili kwakhona ekubeni ngoovulindlela abangabancedani ngoAgasti, xa iimpelaveki ziza kube zintlanu. Njengoko siya kube siqukumbela unyaka wenkonzo ngoAgasti, kuya kube kwenziwe umgudu omkhulu ukuze wonk’ ubani abe nenxaxheba ngokuzeleyo kangangoko kunokwenzeka kubulungiseleli.
19 UYesu waprofeta: “Lowo uqhelisela ukholo kum, naye lowo uya kwenza imisebenzi endiyenzayo; ibe uya kwenza imisebenzi emikhulu ngakumbi kunale.” (Yoh. 14:12) Kulilungelo elivuyisayo ukukhonza njengabasebenzi abangamadlelane kaThixo xa esi siprofeto sizaliseka ngendlela ezukileyo. Ngoku lixesha lokushunyayelwa kweendaba ezilungileyo ngakumbi kunanini na ngaphambili, sizithengela ixesha elifanelekileyo lokwenza lo msebenzi. (1 Kor. 3:9; Kol. 4:5) Ukuba nesabelo ngokufuthi kangangoko kunokwenzeka kwinkonzo yobuvulindlela bobuncedani kuyeyona ndlela isemagqabini yokwenza indima yethu njengabavakalisi boBukumkani. Sikulindele ngolangazelelo ukuba iya kuba ngakanani na intswahla yendumiso evela koovulindlela abangabancedani kweli xesha leSikhumbuzo. (INdu. 27:6) Xa sicinga ngemiphumo eyabakho kunyaka odluleyo, sizibuza oku, ‘Ngaba siza kuphinda?’ Siqinisekile ukuba siza kwenjenjalo!
[Box on page 3]
Ngaba Unokuba Nguvulindlela Ongumncedani?
“Enoba zinjani na iimeko zakho zobuqu, ukuba ubhaptiziwe, unokuma kokuziphatha okuhle, unokulungiselela ukuhlangabezana nemfuneko yokuchitha ama-60 eeyure ngenyanga kubulungiseleli basentsimini yaye ukholelwa ukuba unokusebenza inyanga okanye ezingakumbi njengovulindlela ongumncedani, abadala bebandla baya kukuvuyela ukuqwalasela isicelo sakho seli lungelo lenkonzo.”—Ukulungelelaniselwa Ukufeza Ubulungiseleli Bethu, iphepha 114.
[Box on page 6]
Ucwangciso Lukavulindlela Ongumncedani
Umzekelo Weendlela Zokucwangcisela Ukusebenza Iiyure Ezili-15 Kwinkonzo Yasentsimini Veki Nganye
Iintsasa—NgoMvulo Ukusa NgeCawa
Usuku Ixesha Iiyure
NgoMvulo Kusasa 2
NgoLwesibini Kusasa 2
NgoLwesithathu Kusasa 2
NgoLwesine Kusasa 2
NgoLwesihlanu Kusasa 2
NgoMgqibelo Kusasa 2 1⁄2
NgeCawa Isiqingatha Semini 2 1⁄2
Isimbuku Seeyure: 15
Iintsuku Ezimbini Ezizeleyo
Usenokukhetha naziphi na iintsuku ezimbini evekini
Usuku Ixesha Iiyure
NgoLwesithathu Imini Yonke 7 1⁄2
NgoMgqibelo Imini Yonke 7 1⁄2
Isimbuku Seeyure: 15
Amarhatya Amabini Nempela-Veki
Usenokukhetha nawaphi na amarhatya amabini evekini
Usuku Ixesha Iiyure
NgoMvulo Ngorhatya 1 1⁄2
NgoLwesithathu Ngorhatya 1 1⁄2
NgoMgqibelo Imini Yonke 8
NgeCawa Isiqingatha Semini 4
Isimbuku Seeyure: 15
Iinjikalanga Zaphakathi Evekini NoMgqibelo
ICawa isenokuthabathel’ indawo naluphi na usuku
Usuku Ixesha Iiyure
NgoMvulo Ngenjikalanga 2
NgoLwesibini Ngenjikalanga 2
NgoLwesithathu Ngenjikalanga 2
NgoLwesine Ngenjikalanga 2
NgoLwesihlanu Ngenjikalanga 2
NgoMgqibelo Imini Yonke 5
Isimbuku Seeyure: 15
Ucwangciso Lwam Lobuqu Lwenkonzo
Bekela bucala iiyure oza kuzisebenza ixesha ngalinye
Usuku Ixesha Iiyure
NgoMvulo
NgoLwesibini
NgoLwesithathu
NgoLwesine
NgoLwesihlanu
NgoMgqibelo
NgeCawa
Isimbuku Seeyure: 15