Ngaba Unawo Umoya Wokuzincama?
1 Uxabiso ngoko uYesu Kristu wakwenzela uluntu ngokungazingci lufanele lusishukumisele ukuba sonke sisebenzise ubuchule, amandla neziphiwo zethu ngendlela yokuzincama. IZibhalo zibongoza zisithi: “Niyinikele imizimba yenu ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele.” (Rom. 12:1) Ukuzihlolisisa ngamaxesha athile kuya kukunceda ubone ukuba ubonisa uhlobo lomoya onjalo ngokupheleleyo ngokokuvuma kweemeko zakho zobuqu.
2 Kusukelo Lokuzuza Ulwazi NgeBhayibhile: Ngaba uye wabekela bucala ixesha lokuyifundisisa ngokuthe rhoqo iBhayibhile? Ngaba ubambelele kolo cwangciso? Ngaba ngumkhwa wakho ukuzilungiselela kakuhle iintlanganiso zebandla? Ukuba uyintloko-ntsapho, ngaba unaso isifundo seBhayibhile esithe rhoqo nentsapho yakho? Ukwenza ezi zinto kunokufuna ukuncama ixesha elichithwa kuqolozelwe umabonwakude okanye ikhompyutha okanye ezinye izinto. Noko ke, okunjani ukuba kuncinane ukuzincama okwenzayo, ekubeni usazi ukuba elo xesha ulichithe ekufundeni iLizwi likaThixo liya kukunceda likukhokelele kubomi obungunaphakade!—Yoh. 17:3.
3 Xa Uqeqesha Abantwana Bakho: Elona xesha lihle lokuqalisa ukufunda ikhondo lokuzincama kuxa besengabantwana. Fundisa abantwana bakho ukuba ngoxa kukho ixesha lokudlala, kumele kubekho ixesha lokusebenza nelemisebenzi yobuthixo. (Efe. 6:4) Banike umsebenzi abanokuwenza phakathi kwekhaya. Yiba nocwangciso oluthe rhoqo lokuba nesabelo nabo kubulungiseleli. Yibethelele imfundiso yakho ngokuba ngumzekelo omhle.
4 Kwimisebenzi Yebandla: Ibandla liyasikeleleka xa wonke ubani okulo ezincama ngokuzithandela ukuze kulungelwe abanye. (Heb. 13:16) Ngaba ungakwazi ukuchitha ixesha elingakumbi kumsebenzi wokushumayela ngoBukumkani nowokwenza abafundi? Ngaba unokuzinikela ngokuzithandela ukuze uncede abagulayo okanye abakhulileyo, mhlawumbi ubancede ngesithuthi sokubasa ezintlanganisweni?
5 Kude kudala ngaphambi kokuba anikele ngobomi bakhe bobuntu ngokusisigxina, uYesu waluleka abafundi bakhe ukuba bajolise amehlo abo kwizilangazelelo zoBukumkani, yonke enye into bayibeke kwindawo yesibini ebomini. (Mat. 6:33) Ukusukela umoya onjalo wokuzincama kuya kusizisela ulonwabo olungathethekiyo njengokuba siqhubeka sikhonza uYehova ngovuyo.