Yiba Nomoya Wokuzincama!

UROLFa wayengumqeshwa owayehlonelwa. Xa wagqiba kwelokuba afumane umsebenzi wesingxungxo ukuze akwazi ukwandisa isabelo sakhe kubulungiseleli bobuKristu, umqeshi wakhe wavuma ngoko nangoko. Ngoko ke kangangeminyaka uRolf wakwazi ukunandipha inkonzo yobuvulindlela. Noko ke, ngenye imini imeko yomsebenzi yaguquka. URolf wazingqina ekhuthele gqitha emsebenzini wakhe kangangokuba wanikwa isigxina sokuba abe ngumlawuli wezorhwebo kuloo mzi-mveliso. Lo msebenzi wawuquka umvuzo oncumisayo namathemba amahle okunyuselwa ngakumbi. Noko ke, wayengasenakukwazi ukwenza nje umsebenzi wesingxungxo.

URolf wayenomfazi nabantwana ababini ekwakufuneka abaxhase, yaye loo mali yongezelelekileyo yayiza kuba luncedo. Sekunjalo, wasala eso sigxina waza wenza isicelo somnye umsebenzi, lowo wawuza kumvumela ukuba akwazi ukuhlangabezana neembopheleleko zakhe zokomoya nezingokwemali. Umqeshi kaRolf wayedidekile sesi sigqibo. Eqonda ukuba kwanokumthembisa ukumhlawula umvuzo ophakamileyo kwakuya kuba lilize, lo mphathi wagqiba ngelithi: “Ndiyabona ukuba andinakuba nawo amandla okukujika kwinkolelo yakho.”

Ewe, uRolf wayenenkolelo. Kodwa wayekwanolunye uphawu—umoya wokuzincama. Umoya onjalo unqabile kweli hlabathi lethu loohlohlesakhe. Kodwa unokukhokelela kwindlela yobomi enengenelo neyanelisayo. Yintoni umoya wokuzincama? Uquka ntoni? Yaye yintoni esifanele siyenze ukuze siwulondoloze?

Imfuneko YeBhayibhile

Ukuncama kuthetha ukuyeka okanye ukunikezela into exabisekileyo. Ukwenza idini (ukuncama okuthile) bekuyinxalenye yonqulo olunyulu ukususela kwingqina lokuqala elithembekileyo, uAbheli, wanikela “amazibulo ezimvu zakhe” njengedini kuThixo. (Genesis 4:4) Amadoda okholo, anjengoNowa noYakobi, alandela ekhondweni. (Genesis 8:20; 31:54) Amadini ezilwanyana ayekwayinkalo ebalulekileyo yoMthetho kaMoses. (Levitikus 1:2-4) Noko ke, phantsi koMthetho abanquli babebongozwa ukuba banikele okona kulungileyo. Babengavumelekanga ukuba banikele ngaso nasiphi na isilwanyana esinesiphene njengedini. (Levitikus 22:19, 20; Duteronomi 15:21) Xa amaSirayeli angabawexuki awaphulayo lo mthetho, uThixo wawohlwaya, esithi: “Ukuba nizisa into esisiqhwala [ukuba ibingelelwe, nithi], akunto imbi oko? Khawuyisondeze loo nto kwinkosi yakho, ukuba yokholiswa na nguwe; yokunonelela na? . . . Ndikholiswe na ke zezo zinto ziphuma esandleni senu?”—Malaki 1:8, 13.

Umgaqo wokuzincama wagqithiselwa kunqulo lobuKristu. Noko ke, ekubeni uKristu eye wahlawula ixabiso elipheleleyo lentlawulelo, amadini ezilwanyana awasamkelekanga kuThixo. Ngoko, yintoni amaKristu angayinikela ngokwamkelekileyo? UPawulos ubhala oku kwabaseRoma 12:1: “Ndiyanivuselela ngoko, bazalwana, ngeemfefe zikaThixo, ukuba niyinikele imizimba yenu ibe lidini eliphilileyo, elingcwele, elikholekileyo kuThixo: inkonzo yenu ke leyo yasengqondweni.” Olunjani lona utshintsho ukukhwankqisa! Kunokuba anikele ngezidumbu, amaKristu kwakufuneka enze idini eliphilileyo leziqu zawo—amandla awo, izinto zawo neziphiwo zawo. Yaye njengamaSirayeli, uYehova akasayi kuyamkela iminikelo “eqhwalelayo,” okanye engenziwa ngentliziyo yonke. Ufuna ukuba abanquli bakhe bamnike okona kona kulungileyo, ukuze bamkhonze ngentliziyo, ngomphefumlo, ngengqondo nangamandla abo ephela.—Marko 12:30.

Ngaloo ndlela umoya wokuzincama uquka okungaphezulu lee kunokunamathela nje kucwangciso lweentlanganiso nokwenza umsebenzi wobulungiseleli bobuKristu. Uthetha uzimiselo ekwenzeni ukuthanda kukaThixo nokuba sekumnyam’ entla. Uthetha ukukulungela ukunyamezela ubunzima neengxaki. UYesu wathi, “Ukuba kukho othanda ukundilandela, makazincame ngokwakhe, awuthwale [umthi wentuthumbo, NW], andilandele.” (Mateyu 16:24) UmKristu akenzi amabhongo akhe obuqu nosukelo lwezinto eziphathekayo lube yeyona nto ayixhalabeleyo. Ubomi bakhe busekelwe ekufuneni tanci uBukumkani bukaThixo nobulungisa Bakhe. (Mateyu 6:33) Ukuba kuyimfuneko, ukulungele “ukuthwala umthi wakhe wentuthumbo,” ukutshutshiswa, ukubandezeleka okanye kwanokufa!

Iintsikelelo Zokuzincama

Ejamelene neemeko ezinzima ngolo hlobo ezisenokuvela, ubani unokuzibuza ngokuzenzekelayo enoba ukuzincama kuzifanele na ezo meko. Kwabo bathanda uYehova uThixo nabanqwenela ukubona igama lakhe lizukiswa, ngokuqinisekileyo kuzifanele. (Mateyu 22:37) Khawuqwalasele umzekelo ogqibeleleyo owamiselwa nguYesu Kristu. Ngaphambi kokuza kwakhe emhlabeni, wayekwisikhundla esongamileyo ezulwini njengesidalwa sokomoya. Noko ke, njengokuba waxelela abafundi bakhe, akazange ‘afune ukuthanda kwakhe, kodwa wafuna ukuthanda kukaThixo, owamthumayo.’ (Yohane 5:30) Ngoko ngentumekelelo “usuke wazihluba, wathabatha ubume bomkhonzi, enziwe wafana nabantu; wathi ngemo efunyenwe enjengomntu, wazithoba, waba ngolulamileyo, wada wesa ekufeni, ukufa ke [kwasemthini wentuthumbo, NW].”—Filipi 2:7, 8.

Ukuzinikela okunjalo akuzange kungqineke kulilize. Ngenxa yokuba uYesu wayekulungele ‘ukuncama ubomi bakhe ngenxa yezihlobo zakhe,’ wayenokulihlawula ixabiso lentlawulelo, esenzela ukuba uluntu olungafezekanga lukwazi ukufumana ubomi bokungafi ezulwini okanye emhlabeni (Yohane 3:16; 15:13; 1 Yohane 2:2) Ngokugcina ingqibelelo yakhe ngokugqibeleleyo, wabangela ukuba igama likaYehova lidunyiswe kakhulu. (IMizekeliso 27:11) Akumangalisi ukuba uYehova wamsikelela ngekhondo lakhe lokuzincama! “UThixo wamphakamisa kakhulu, wamnika igama elingaphezu kwawo onke amagama.”—Filipi 2:9.

Kakade ke, uYesu wayenguNyana kaThixo okuphela kwamzeleyo. Ngaba uThixo uyabavuza nabanye abamenzela iminikelo? Ewe, yaye oku kuboniswa ngemizekelo emininzi yamaxesha amandulo nawezi mini. Qwalasela ingxelo yeBhayibhile kaRute umMowabhikazi. Kubonakala ukuba yindoda yakhe engumSirayeli eyamfundisa ngoYehova. Emva kokuba ifile, kwafuneka enze isigqibo. Ngaba wayeza kuhlala kwilizwe lobuhedeni lokuzalwa kwakhe, okanye wayeza kuhamba noninazala okhulileyo, uNahomi ukuya kwiLizwe Ledinga? URute wakhetha oku kwesibini, nakubeni kwakuthetha ukuncama unxulumano nabazali bakhe yaye mhlawumbi kwanethemba lokuphinda atshate. Sekunjalo, uRute wafikelela ekumazini uYehova, yaye umnqweno wokumkhonza phakathi kwabantu bakhe abanyuliweyo wamqhubela ekubeni anamathele kuNahomi.

Ngaba uRute wavuzwa ngokuzincama okunjalo? Enyanisweni wavuzwa! Ekuhambeni kwexesha, umnini-mhlaba ogama linguBhohazi wamthabatha njengomfazi, waza uRute wangunina wonyana ogama linguObhede, okwamenza ukuba abe ngukhokhokazi kaYesu Kristu.—Mateyu 1:5, 16.

Ngokukwanjalo iintsikelelo ziye zananditshwa ngabakhonzi bakaThixo abazincamayo kumaxesha ezi mini, Ngokomzekelo, ngowe-1923, uWilliam R. Brown, owaziwa kakhulu njengo-“Bible” Brown, washiya ikhaya lakhe elikwiiWest Indies ukuze aqalise umsebenzi wokushumayela eNtshona Afrika. Waphelekwa ngumfazi nentombi yakhe. Ekugqibeleni wafudukela eNigeria, apho umsebenzi wokushumayela wawuqalisa ukuxakatha isiqhamo. Ekunye nommi waseMerika ontsundu ogama linguVincent Samuels nelinye iNgqina lakwiiWest Indies elinguClaude Brown, u-“Bible” Brown waba nendima ebalulekileyo ekuqaliseni komsebenzi eNtshona Afrika.

Namhlanje bangaphezu kwe-187 000 abavakalisi abakhonza eSierra Leone, eLiberia, eGhana naseNigeria, mimandla leyo awahlahl’ indlela kuyo u-“Bible” Brown nezinxulumani zakhe. Ngaphambi kokufa kwakhe ngowe-1967 u-“Bible” Brown wathi: “Olunjani lona uvuyo okululo ukubona amadoda nabafazi bezamkela iindaba ezilungileyo zoBukumkani bukaThixo!” Ewe, wasikelelwa ngokutyebileyo ngekhondo lakhe lokuzincama.

Iindlela Zokuzincama

Ziziphi ezinye iindlela esinokuwubonisa ngazo umoya ofanayo namhlanje? Enye kukuba nesabelo rhoqo veki nganye kubulungiseleli bendlu ngendlu. (IZenzo 20:20) Ukwenjenjalo, ingakumbi emva komsebenzi odinisayo wempangelo ebudeni beveki, kusenokungabi lula. Kusenokufuna uqeqesho nocwangciso oluhle. Kodwa imivuyo izigqwesa lee iingxaki ezifunyanwayo. Ke ngoku, usenokuba nelungelo lokunceda ubani abe “yincwadi kaKristu . . . engabhalwanga ngainki, ebhalwe ngoMoya kaThixo ophilileyo; kungekhona emacwecweni amatye, kusemacwecweni angawenyama entliziyo.”—2 Korinte 3:3.

‘Ngokuzongela ixesha’ ngenyameko, mhlawumbi emsebenzini wempangelo okanye ekuzonwabiseni, abanye baye basandisa isabelo sabo emsebenzini wokushumayela. (Efese 5:16) Abaninzi bahlengahlengisa iimeko zabo ukuze banandiphe inkonzo yobuvulindlela bobuncedani ubuncinane kanye ngonyaka. Abanye bayakwazi ukuba ngoovulindlela abangabancedani ngokuqhubekayo okanye bakhonze njengoovulindlela abathe ngxi. Okunye ukuzincama okufanele kuqwalaselwe koko kokufudukela kwimimandla efuna abavakalisi boBukumkani abangakumbi. Ngokufuthi oku kuquka iinguqulelo ezinkulu kwindlela yokuphila, kumelwane neengxaki nokuzilungelelanisa nezithethe namasiko amatsha. Kodwa iintsikelelo zokuba nesabelo esizele ngakumbi ekuncedeni abanye bafumane ubomi zenza ukuzincama okunjalo kuxabiseke.

uJohn Cutforth owazalelwa eKhanada wakufumanisa oku ngokobuqu. Emva kokuphumelela kwakhe kwiSikolo SeBhayibhile seWatchtower saseGiliyadi, wanikwa isabelo njengomvangeli wasemazweni sokuya eOstreliya. UMzalwana uCutforth ukhumbula oku: “Hayi indlela ekwakukude ngayo ekhaya! Ngaba ndandiya kuze ndibuyele eKhanada ukuze ndiye kubona abazali bam nabahlobo bam kwakhona ngaphambi kweArmagedon? Ekuphela kwendlela yokufumanisa oku yayikukuhamba.” UMzalwana uCutforth wahamba, yaye akazange azisole ngokuzincama kwakhe. Kwiminyaka yamva waqalisa umsebenzi wokunikela ubungqina ePapua New Guinea, apho asakhonza khona ngenzondelelo, egqibe iminyaka engama-50 kwinkonzo yexesha elizeleyo. Wakha wathi: “Ukusoloko ufuna ukulandela ukhokelo lukaYehova, usamkela nokuba sisiphi na isabelo akubona kufanelekile ukukunika sona, kuzisa uvuyo, ulonwabo, ulwaneliseko nabahlobo abangenakubalwa.”

Kambe ke, iimeko ezingokwempilo, ezingokwemali neembopheleleko zentsapho zisenokukusikela umda oko unokukwenza; asingabo bonke abanokukhonza njengoovulindlela nabavangeli basemazweni. Sekunjalo, zimisele ukuba nenxaxheba ngokupheleleyo kwiintlanganiso nakwinkonzo yasentsimini kangangoko kunokwenzeka, ungavumeli iingxaki ezincinane, ezinjengemo yezulu engentle, ukuba zikuthibaze. (Hebhere 10:24, 25) Usenokukwazi ukuncama ixesha elingakumbi ukwenzela ufundisiso lobuqu leLizwi likaThixo. Ezinye iintsapho zenjenjalo ngokulinganisela ixesha elichithwa ekubukeleni iinkqubo zikamabonwakude, mhlawumbi zide zibe nobusuku “ekungabukelwa mabonwakude” ngabo veki nganye okanye kungabikho mabonwakude konke konke. Ngokufumana ixesha lofundisiso lobuqu, “umbingelelo wendumiso” owenza ngawo ‘uvumo lwegama lakhe’ kwiintlanganiso nakwinkonzo yasentsimini ngokunokwenzeka usenokuba ngumnikelo wodidi oluphezulu.—Hebhere 13:15.

Khumbula ukuba, umsebenzi wokushumayela ngoku ukumanqanaba okugqibela. Kwakamsinya uThixo uza kuzisa umgwebo wakhe kubantu beli hlabathi ababawayo nabangoohlohlesakhe. (Zefaniya 2:3) Ukuze sikholeke emehlweni kaThixo, asinakuzibandeza. Simele ‘siyinikele imizimba yethu ibe lidini eliphilileyo, elingcwele, elikholekileyo kuThixo.’ (Roma 12:1) Umoya onjalo uya kuzisa ulonwabo nolwaneliseko olukhulu. Uya kusinceda sifumane uvuyo olungakumbi kubulungiseleli bethu. Yaye kuya kuyenza ivuye intliziyo kaYehova uThixo!—IMizekeliso 27:11.

Ngoko hlala unomoya wokuzincama! Musa ukuthandabuza ukuzitsalisa nzima ukuze uncede abanye uxhase nezilangazelelo zoBukumkani. UPawulos ubongoza esithi: “Ukwenza okuhle nobudlelane, musani ukukulibala; kuba imibingelelo enjalo uyakholiswa kakuhle yiyo uThixo.”—Hebhere 13:16.

[Umbhalo osemazantsi]

[Umfanekiso okwiphepha 26]

Ukufumana ixesha lofundisiso lobuqu nelenkonzo yasentsimini kusenokufuna ukuzincama, kodwa kunomvuzo

[Imifanekiso ekwiphepha 28]

UW. R. Brown noJohn Cutforth basikelelwa ngokutyebileyo ngekhondo labo lokuzincama