“Ngaba Ndifanele Ndifuduke?”
1 Ukusabela kumyalelo kaYesu othi “hambani . . . niye kubenza abafundi abantu beentlanga zonke,” abakhonzi abaninzi bakaYehova abazahluleleyo baye bashukunyiselwa ukuba baye kukhonza apho imfuneko inkulu khona. (Mat. 28:19) Baxelisa uPawulos, owasabela kubizo lokuba: ‘Awelele eMakedoni, aye kunceda.’ (IZe. 16:9) Kunokwenziwa njani ngokoqobo oku?
2 Thabatha Inyathelo Libe Linye Ngexesha: Ngaba ikho intsimi engafane isetyenzwe ebandleni lakho? Ukuba kunjalo, unokugxininisa kuloo mimandla. Ngaphambi kokuba wenze isigqibo sokuya naphi na, thetha nabadala bakho ukuze uqinisekise enoba bavakalelwa kukuba ukulungele ukufuduka kusini na. Kwakhona usenokubuza umveleli wakho wesiphaluka enoba kukho ibandla elikufutshane alaziyo apho unokwandisa khona ubulungiseleli bakho. Kwelinye icala, emva kokuzibala ngenyameko iindleko, usenokunqwenela ukunceda kwenye inxalenye yelizwe okanye kwilizwe elingummelwane. UBulungiseleli Bethu BoBukumkani bukaJuni 2000 buye badwelisa iindawo apho imfuneko inkulu khona. Ukuba lo ngumnqweno wakho, wena kunye nequmrhu labadala abakwibandla okulo nifanele nibhalele iofisi yesebe yelizwe onomdla wokukhonza kulo, uchaze ukuma kwakho kobuthixo. Kusenokuba sisenzo sobulumko ukutyelela loo ndawo ngaphambi kokuba ugqibe enoba ungafuduka ngokusisigxina okanye akunjalo kusini na.
3 Kulumkele Ukusuka Nje Ufuduke: Inani elandayo labazalwana bethu bafudukela kwamanye amazwe ngenxa yokuba befuna indlela ebhetele yokuphila okanye isiqabu kwingcinezelo. Ngoxa besenza oku, baye bangamaxhoba abantu abanamaqhinga ababathembisa ngokubanceda bazinze kweli lizwe lasemzini, kodwa kunoko basuke bathabathe imali yabo baze babashiye kwesinomhlwa. Ngaloo ndlela, imeko yokufuduka iba mandundu ngakumbi kunokuba ibinjalo kwilizwe labo. Basenokude bacele abazalwana ukuba bababonelele ngendawo yokuhlala baze babancede ngezinye iindlela, beba luxanduva kwezinye iintsapho zamaKristu ezinyamekela ezazo iingxaki neenzima. Amalungu ezinye iintsapho aye ahlala ngokwahlukana elinye kwelinye, yaye iintsapho ziye zagula ngokomoya ngenxa yokufuduka okunjalo.—1 Tim. 6:8-11.
4 Ukuba ufuna ukufuduka ngenxa yeengenelo zobuqu, hlala ukhumbula ukuba nokuba uhlala phi, kukho iingxaki ekufuneka ujamelane nazo. Kulula ukuzoyisa iingxaki kwindawo olwaziyo ulwimi nendlela yalapho yokuphila, kunokuba uqalise indawo entsha ongayiqhelanga.