UYehova Unika Amandla
1 Unayiphi imbono ngompostile uPawulos? Njengokuba sifunda incwadi yeZenzo, siyayiqonda indlela awayekhuthele ngayo kwinkonzo kaYehova. Wakufeza njani uPawulos konke oko akwenzayo? Wathi: “Ezintweni zonke ndinamandla ngenxa yalowo undomelezayo.” (Fil. 4:13) Nathi sinokungenelwa kumandla alungiselelwa nguYehova. Njani? Ngokuxhakamfula amalungiselelo amathandathu asenzele wona ukuze sihlaziywe size somelezwe ngokomoya.
2 ILizwi LikaThixo: Njengokuba simele sitye ukutya ukuze someleze imizimba yethu, simele sizondle ngeLizwi likaThixo ukuze sihlale siphilile ngokomoya. (Mat. 4:4) IBhayibhile isinika amandla okusomeleza. Ukuze silondoloze inzondelelo nehlombe lethu ngenyaniso, kufuneka sibe nesifundo sobuqu esinentsingiselo size sicamngce, yonke imihla ukuba kunokwenzeka.—INdu. 1:2, 3.
3 Umthandazo: Kubalulekile ukusondela kuYehova, ngokukodwa ngamaxesha kaxakeka. Ngomoya wakhe oyingcwele, ubanika amandla abo bawacelayo ngomthandazo. (Luka 11:13; Efe. 3:16) IZibhalo zisikhuthaza ukuba ‘sizingise emthandazweni.’ (Roma 12:12) Ngaba uyakwenza oko?
4 Ibandla: Somelezwa size sikhuthazwe ngeentlanganiso zebandla nakunxulumano olufudumeleyo esilunandipha apho nabazalwana noodade. (Heb. 10:24, 25) Xa sikhathazekile, bayasikhuthaza baze basincede ngothando.—IMize. 17:17; INtshu. 4:10.
5 Ubulungiseleli Basentsimini: Ukuba nenxaxheba rhoqo kubulungiseleli kuyasinceda sitsolise amehlo kuBukumkani nakwiintsikelelo zabo. Siyakhuthazeka xa sinceda abanye bafunde ngoYehova. (IZe. 20:35) Ayisithi sonke abanokukwazi ukufuduka siye kukhonza apho imfuneko inkulu khona okanye sibe nesabelo kwinkonzo yexesha elizeleyo, kodwa sinokuba nesabelo ngokunentsingiselo ngezinye iindlela kubulungiseleli.—Heb. 6:10-12.
6 Abaveleli AbangamaKristu: Siyangenelwa kukhuthazo nakuncedo olunikelwa ngabadala. UYehova ubabele ukuba baluse umhlambi kaThixo abawuphathisiweyo. (1 Pet. 5:2) Abaveleli abahambahambayo bakha amabandla abawakhonzayo, kanye njengokuba wenzayo uPawulos ngomhla wakhe.—Rom. 1:11, 12.
7 Imizekelo Yabathembekileyo: Kuyakhuthaza ukondela imizekelo eyakhayo yabo bathembekileyo sisebenza nabo, eyamandulo neyanamhlanje. (Heb. 12:1) Xa ufuna ukuhlaziyeka, kutheni ungafundi elinye lamabali obomi akhuthazayo kumaphephancwadi ethu, ingxelo eyakhayo ekwiNcwadi Yonyaka, okanye ezinye zeengxelo ezihlaziyayo zembali yale mihla yamaNgqina kaYehova kwincwadi ethi Abavakalisi?
8 Omnye umzalwana, ophakathi kwiminyaka engama-90 ubudala, wamkela inyaniso xa wayelityendyana lomfana. Ngoxa wayeselula, ukholo lwakhe lwavavanywa. Okokuqala, abanye ababenxulumana ngokukhutheleyo nebandla bayishiya intlangano kaYehova. Wona umsebenzi wendlu ngendlu, wayewufumanisa unzima. Sekunjalo, wayesoloko ekholose ngoYehova. Kungekudala wayebunandipha ubulungiseleli. Uphi namhlanje? Phezu kwayo nje impilo enkenenkene, uselilungu lentsapho yeBheteli yaseBrooklyn, ukhonza kwiQumrhu Elilawulayo. Akazisoli ngokubambelela kwintlangano kaYehova.
9 Omnye udade olilungu lentsapho yaseBheteli yaseBritani wabhaptizwa xa wayeneminyaka eli-13 ubudala. Waqalisa ukuba nguvulindlela nomntakwabo kunyaka olandelayo, kunyaka owalandela lowo, uyise wabanjwa ngenxa yobundilele ngexesha leMfazwe Yehlabathi II. Waqhubeka ekholose ngamandla kaYehova, njengokuba wayeqhubeka ekhonza uThixo oyinyaniso. Ekuhambeni kwexesha, watshata nomzalwana othembekileyo, bekunye baqhubeka besenza ukuthanda kukaYehova. Emva kweminyaka engama-35 betshatile, umyeni wakhe wafa ngequbuliso. Kwakhona waphinda wakholosa ngoYehova, waqhubeka kwade kwanamhlanje, ukhangele phambili ekukhonzeni ngonaphakade njengelungu lentsapho kaYehova yasemhlabeni.
10 UYehova uyabanceda aze abomeleze abakhonzi bakhe abathembekileyo. “Unika odiniweyo amandla; nalowo ungenamandla makhulu umenza aphuphume ukomelela okupheleleyo.” Sinokuwafumana la mandla angaphele ndawo ngokuxhakamfula onke amalungiselelo amathandathu akhankanywe ngasentla. Khumbula: “Abo bathembela kuYehova baya kufumana amandla kwakhona. . . . Baya kubaleka baze bangatyhafi; baya kuhamba bangadinwa.” (Isa. 40:29-31) UPawulos wakholosa gqitha ngoYehova ukuze afumane amandla, nathi sifanele senjenjalo.