Yandisa Uvuyo Lwakho Ekushumayeleni
1 Uvuyo lokwabelana nabanye ngeendaba ezilungileyo—ngaba uba nalo xa ukubulungiseleli? Ukuba asilumkanga, eli hlabathi lingendawo lisingqongileyo linokusenza sibe neentloni ngokushumayela, size siphulukane novuyo lwethu. Ukusebenza intsimi elukhuni kunokusityhafisa. Ngawaphi amanyathelo aluncedo esinokuwathabatha ukuze sandise uvuyo lwethu ekushumayeleni?
2 Yiba Nesimo Sengqondo Esihle: Ukuba nesimo sengqondo esihle kunceda kakhulu. Enye indlela yokwenza oku kukucamngca ngelungelo lethu elikhethekileyo lokuba “ngabasebenzi abangamadlelane kaThixo.” (1 Kor. 3:9) NoYesu ukunye nathi ekuphumezeni lo msebenzi. (Mat. 28:20) Kwaye usixhasa nangomkhosi weengelosi. (Mat. 13:41, 49) Ngoko sinokuqiniseka ukuba imigudu yethu yalathiswa nguThixo. (ISityhi. 14:6, 7) Ngoko ke, enoba basabela njani na abanye abantu, ezulwini iba yimivuyo!
3 Lungiselela Kakuhle: Ukulungiselela kakuhle kuba negalelo kuvuyo lwethu. Ukulungela ubulungiseleli akumele kube ngumsebenzi omkhulu. Yimizuzu nje embalwa ukuqwalasela into oza kuthetha ngayo kumaphephancwadi akho okanye kumnikelo woncwadi waloo nyanga. Khetha intshumayelo phantsi komxholo othi “Oko Unokukuthetha Ngamaphephancwadi,” kuBulungiseleli Bethu BoBukumkani. Hlola isihlomelo sikaJanuwari 2002, esinomxholo othi “Iintshumayelo Zenkonzo Yasentsimini Ezicetyiswayo,” okanye khangela intshayelelo ephumelelayo kwincwadi ethi Ukuqiqa. Ukuba kukho umqobo abadla ngokukubekela wona abaninimzi, lungiselela impendulo eya kubonisa ukuba uyayiva loo nto bayithethayo ize yalathise ingqalelo kumbandela ovus’ umdla. Incwadi ethi Ukuqiqa iluncedo kakhulu kule nkalo. Ukusebenzisa ezi zinto ziluncedo kuya kusinika intembelo esiyifunayo ukuze sishumayele ngovuyo.
4 Thandaza Ngokunyaniseka: Umthandazo ubalulekile ukuze uhlale uvuya. Ekubeni sisenza umsebenzi kaYehova, kufuneka sicele umoya wakhe, uvuyo olusesinye seziqhamo zawo. (Gal. 5:22) UYehova uya kusinika amandla okuqhubeka sishumayela. (Fil. 4:13) Ukuthandazela ubulungiseleli bethu kunokusigcina sinembono efanelekileyo xa izinto zingahambi kakuhle. (IZe. 13:52; 1 Pet. 4:13, 14) Ukuba siziva siphazamisekile, umthandazo unokusinceda sizingise ngenkalipho kwaye sivuya.—IZe. 4:31.
5 Yenza Amathuba: Kakade ke, ubulungiseleli bethu buvuyisa ngakumbi xa sikwazi ukufumana abantu size sinikele ubungqina kubo. Ukutshintsha ucwangciso lwakho uze uye kwindlu ngendlu ngexesha elahlukileyo, mhlawumbi xa lisithi ndithenge okanye ngongcwalazi, kunokuba nempumelelo engakumbi. Udibana nabantu ngalo lonke ixesha uhamba esitratweni, usiya kuthenga, ukhwele ibhasi okanye uzihambela nje epakini. Kutheni ungalungiseleli incoko emfutshane nje uze uye kuthetha nabo babonakala benobuhlobo? Okanye usenokuba uphangela okanye ufunda kwisikolo apho uncokola nabantu abaninzi mihla le. Usenokufumana ithuba lokunikela ubungqina ngokuvusa incoko engombandela weZibhalo obangel’ umdla. Kukho amacebiso amahle afumaneka kwiphepha lokuqala lesihlomelo soBulungiseleli Bethu BoBukumkani bukaJanuwari 2002. Nawuphi na kule mizamo unokuphumeza lukhulu ekwenzeni ubani avuye ngakumbi xa eshumayela.
6 Ekubeni uvuyo lusinceda sinyamezele, hayi indlela ekubaluleke ngayo ukuba silulondoloze! Ngokwenjenjalo, siya kuzuza umvuzo omkhulu xa lo msebenzi ungasayi kuphinda wenziwe ufikelela esiphelweni. Elo themba, lilodwa nje, linokusenza sivuye ngakumbi xa sishumayela.—Mat. 25:21.