Ukuhlanganisa Abantu Bazo Zonke Iilwimi
1 ILizwi likaThixo liyazaliseka! Abantu ‘bazo zonke iilwimi neentlanga’ bamkela unqulo lokwenyaniso. (Zek. 8:23) AmaNgqina kaYehova abanceda njani abantu bazo zonke ‘izizwe nezizwana neelwimi’ bamkeleke kuYehova, benethemba lokusinda “embandezelweni enkulu”?—ISityhi. 7:9, 14.
2 Intlangano KaThixo Iyasabela: IQumrhu Elilawulayo lilungiselele ukuba uncwadi lweBhayibhile lufumaneke ngeelwimi ezingama-380 ukuze wonke umntu osemhlabeni aqonde ukubaluleka kweendaba ezilungileyo. Ukubhala nokupapasha uncwadi ngeelwimi ezininzi ngolu hlobo ngumsebenzi omkhulu. Kubandakanya ukuhlanganiswa kwabaguquleli abavunyiweyo nokunikela uncedo olufunekayo ukuze kuguqulelwe uncwadi lwethu kuzo zonke ezi lwimi, luze lushicilelwe yaye luthunyelwe. Noko ke, owona msebenzi mkhulu wenziwa nguwe wena mvakalisi woBukumkani, kuba nguwe oshumayela esi sigidimi seBhayibhile sisindisa ubomi ebantwini.
3 Ukwamkela Ucelomngeni: Intsimi yethu inabantu abaneemvelaphi ezahlukahlukeneyo, nabathetha iilwimi zasemzini nezomthonyama. Ukuze kushunyayelwe iindaba ezilungileyo kubo bonke aba bantu, abakhonzi abangakumbi bakaThixo bazama ukufunda olunye ulwimi oluthethwa ekuhlaleni. Abanye bafunda iNtetho Yezandla. Kwintsimi yesebe loMzantsi Afrika kukho amabandla kunye namaqela amalunga ne-1 630 ashumayela ngeelwimi ezili-11 nangaphezulu. Bambi abantu abangazange beve ngoYehova okanye abebengazi nto ngeBhayibhile bamkela inyaniso yeLizwi likaThixo.—Roma 15:21.
4 Ngaba asinakuzibhokoxa ngakumbi ekushumayeleni iindaba ezilungileyo kubantu abakwintsimi yethu abathetha olunye ulwimi? (Kol. 1:25) Amanye amabandla alungiselela ukuba kushunyayelwe ngezinye zeelwimi ezisetyenziswa ekuhlaleni. Ekuqaleni abavakalisi bafunda amagama athile olo lwimi ukuze nje bakwazi ukubeka isigidimi esilula, njengokuthi: “Molweni. Ndiniphathele iindaba ezilungileyo. [Yandula ke ushiye iphecana okanye incwadana enemifanekiso yolwimi lwabo.] Nisale kakuhle.” UYehova uyazisikelela ezo ziqalo zincinane!
5 Isigidimi soBukumkani sinomtsalane kubantu abaneemvelaphi neelwimi ezahlukahlukeneyo. Masisebenzise onke amathuba avelayo ukuze sisishumayele kwabanye.