Ukushumayela Kweli Hlabathi Liguquguqukayo
1 Hayi indlela ezinokutshintsha ngokukhawuleza ngayo izinto! Ngobusuku nje obunye, intlekele yemvelo, iingxaki zezoqoqosho, iingxwabangxwaba zezobupolitika, okanye intlekele ebivele ezindabeni inokuba ngundaba-mlonyeni. Noko ke, ngomzuzwana nje ingqalelo yabantu inokuthinjwa yenye into. (IZe. 17:21; 1 Kor. 7:31) Kweli hlabathi liguquguqukayo, singayithimba njani ingqalelo yabantu ukuze sincokole nabo ngesigidimi soBukumkani?
2 Ukuqonda Izinto Ezixhalabisa Abanye: Enye indlela esinokuthimba ingqalelo yabantu ngayo kukuncokola ngeziganeko zakutshanje. Xa wayebongoza abaphulaphuli bakhe ukuba bacinge nzulu ngolwalamano lwabo noThixo, uYesu wathetha ngentlekele eyayisandul’ ukwenzeka eyayisesezingqondweni zabo. (Luka 13:1-5) Ngokufanayo, xa sishumayela iindaba ezilungileyo, senza kakuhle xa sinxibelelanisa incoko yethu neendaba zakutshanje okanye nombandela obangel’ umdla kwintsimi yethu. Noko ke, xa sixubusha imibandela enjalo, simele silumkele ukubonakala singabathabath’ icala kwezobupolitika okanye kwimibandela yasekuhlaleni.—Yoh. 17:16.
3 Sinokuyazi njani into ecingwa ngabantu ngoxa sithetha nabo? Mhlawumbi eyona ndlela esinokuyazi ngayo kukubuza umbuzo size siphulaphule. (Mat. 12:34) Ukuba nomdla ebantwini kuya kusibangela ukuba siqonde indlela abazijonga ngayo izinto size ngobuchule sifune ukuqonda okungakumbi. Incoko yomninimzi isenokuveza inkxalabo olunayo uninzi lwabantu kuloo ngingqi yaye inokwenza ukwazi ukunikela ubungqina.
4 Ukulungiselela Intshumayelo: Xa silungiselela ukushumayela kweli hlabathi liguquguqukayo, sinokusebenzisa incwadi ethi Ukuqiqa. Amacebiso anokusinceda siquke iziganeko zakutshanje kwintshumayelo yethu akwiphepha 10-14, phantsi komxholo othi “Iziganeko Ezikhoyo” nothi “Ulwaphulo-mthetho/Ukhuseleko.” Inkcazelo efanayo ikuBulungiseleli Bethu BoBukumkani bukaSeptemba 2000, iphepha 3. Xa ulungiselela intshumayelo yakho, lungiselela nesibhalo esifanelekileyo oza kusisebenzisa.
5 Njengoko sinikel’ ingqalelo kwizinto eziguquguqukayo ezixhalabisa abantu abakwintsimi yethu, intshumayelo yethu kufuneka siyivisisanise nazo. Ukuba senza njalo, siya kukwazi ukuncokola nabantu ngezinto ezibanxunguphalisayo. Ngaloo ndlela, sinceda abaninzi ngakumbi bamazi Lowo uneempawu nemilinganiselo engaguquguqukiyo.—Yak. 1:17.