Iindlela Zokuphucula Ukushumayela Kwethu NgoBukumkani
1 Umsebenzi wethu wokushumayela ungxamiseke ngakumbi ngoku kunanini na ngaphambili. Ukuphila nokufa kwabantu kuya kuxhomekeka kwindlela abasabela ngayo kwiindaba ezilungileyo. (1 Pet. 4:5, 6, 17; ISityhi. 14:6, 7) Ngenxa yoku sifanele sisoloko sikhangela iindlela zokuphucula ukushumayela kwethu ngoBukumkani. Ziziphi ezinye iindlela zokuphucula?
2 Lungiselela Kakuhle: Usebenzisa inkupho ekhoyo yoBulungiseleli Bethu BoBukumkani, khetha intshumayelo ovakalelwa kukuba iya kuba nomtsalane kwinkoliso yabantu kwintsimi yakho. Kubalulekile ukuhlengahlengisa amagqabaza akho ngokweemeko zasekuhlaleni. Okanye usenokukhetha ukuzilungiselela eyakho intshumayelo, usebenzisa iingcamango neendinyana zeZibhalo ozifumanise ngokobuqu ziphumelela. Kuya kufuneka ube nentshayelelo evusa umdla. (Bona incwadi Ukuqiqa, iphepha 9-15.) Mhlawumbi uceba ukubuza umbuzo ohlokoz’ ingcinga okanye ukucela amagqabaza omninimzi ngeendaba ezibangel’ umdla ekuhlaleni. Wakuba uyicingile intshumayelo yakho, yiqhelisele nelungu lentsapho okanye omnye umvakalisi onokukunika amacebiso apho unokuphucula khona.
3 Ncokola Nabantu: Injongo yethu kukudlulisela isigidimi esibalulekileyo. Oku sinokukwenza ngokuncokola ngokunentsingiselo nomphulaphuli wethu. Ukuba umninimzi usebenzisa amazwi enkcaso okanye uvakalisa imbono ethile, kuphulaphule ngenyameko oko akuthethayo. Amagqabaza akhe aya kukunceda unikele impendulo yeZibhalo ngethemba onalo. (1 Pet. 3:15) Ukuba imbono yakhe ayivumelani neyeBhayibhile, ngobuchule usenokuthi: “Abantu abaninzi bavakalelwa njengawe. Ukanti, nantsi enye indlela yokuwujonga lo mbandela.” Yandula ke ufunde isibhalo esifanelekileyo, uze ucele amagqabaza akhe.
4 Yiba Bhetyebhetye Kucwangciso Lwakho: Ukulungiselela kakuhle akuyi kuba luncedo kangako xa ungathethi nabantu. Namhlanje kuqhelekile ukufumana abaninimzi abambalwa emakhayeni xa sibatyelele. Ukuba kunjalo nakwintsimi yakho, zama ukuhlengahlengisa ucwangciso lwakho ukuze ube nako ukusebenza kwindlu ngendlu xa abantu abangakumbi besemakhaya. Usenokufumanisa ukuba elona xesha lihle lokubatyelela ziimpelaveki; abanye basenokufumaneka ngakumbi ebudeni beveki kodwa ngorhatya. Kwezinye iindawo abavakalisi bakufumanisa kuyingenelo ukunikela ubungqina ngexesha leeholide zehlabathi kuba bafumana abantu abangakumbi emakhaya. Abantu badla ngokuba bengangxamanga yaye bekulungele ngakumbi ukuncokola ngamaxesha anjalo. Kuya kuba kuhle ukuhlengahlengisa intshayelelo yakho ifanele eso sihlandlo uze ke udibanise amagqabaza akho nomxholo ongokweZibhalo.
5 Hlolisisa Ukuphumelela Kwentshumayelo Yakho: Wakuphuma kwindlu nganye, zibuze: ‘Ngaba ndiyifikelele intliziyo yomninimzi? Ngaba ndimenze wathetha ndaza ndakuphulaphula oko akuthethayo? Ngaba ndiphendule ngobuchule? Ngokuphathelele iimeko zakhe, ngaba ndisebenzise eyona ntshayelelo isemgangathweni?’ Kusenokuba luncedo ukusebenza nomvakalisi onamava okanye uvulindlela ngamaxesha athile uze uziphulaphule ngenyameko iintshumayelo zakhe ngenjongo yokuphucula ukuphumelela kwakho kubulungiseleli.
6 Ukuba uyinkunkqele kumsebenzi wakho, uya kukwazi ukwabelana nabanye ngeenyaniso zoBukumkani ‘eziya kusindisa wena nabo bakuvayo.’—1 Tim. 4:16; IMize. 22:29.