Ukuhlakulela Ubuhlobo Obusondeleyo NoYehova
1. Omnye udade waphawula ntoni ngemikhwa yakhe yezinto zokomoya?
1 Omnye udade ongumKristu wathi: “Bendisenyanisweni kangangeminyaka emalunga nama-20 ndisiya nje ezintlanganisweni nasentsimini.” Noko ke, wongezelela ngelithi: “Ndifikelele kwisigqibo sokuba nakubeni ezi zinto zibalulekile, zizodwa nje azinakundixhasa xa ndijamelene namaxesha anzima. . . . Ngoku ndiyaqonda ukuba kufuneka ndicinge ngenye indlela, ndiqalise ukuzenzela ucwangciso lokwenza ufundisiso olunentsingiselo ukuze ndimazi ngokwenene uYehova yaye ndimthande ndize ndibe noxabiso ngoko sakwenzelwa nguNyana wakhe.”
2. Kutheni kubalulekile ukuhlakulela ubuhlobo obusondeleyo noYehova?
2 Kufuneka umgudu ukuze wakhe ulwalamano olusondeleyo noYehova. Kufuna okungakumbi kunokuhamba nje ngomgca wempuku kwimisebenzi yamaKristu. Ukuba siyasilela ukuthandaza rhoqo kuYehova, ekuhambeni kwexesha uya kufana nomntu owayekhe wangumhlobo kodwa esingasenanxibelelwano naye. (ISityhi. 2:4) Makhe sihlolisise indlela ufundisiso lweBhayibhile lobuqu kuquka nomthandazo ezinokusinceda ngayo sihlakulele ubuhlobo obusondeleyo noYehova.—INdu. 25:14.
3. Singalwenza njani ufundisiso lobuqu ukuze sikwazi ukusondela kuThixo?
3 Ukuthandaza Nokucamngca Kubalulekile: Ufundisiso lobuqu olondla intliziyo lubandakanya okungakumbi kunokukrwelela nje iingongoma eziziintloko kumbandela ofundisiswayo nokukhangela imibhalo ecatshulweyo. Kufuna similisele ingqondo koko inkcazelo ikutshoyo ngeendlela zikaYehova, imilinganiselo kwanobuntu bakhe. (Eks. 33:13) Ukwazi imibandela yokomoya kuchaphazela iimvakalelo zethu yaye kusenza sicinge ngobomi bethu. (INdu. 119:35, 111) Ufundisiso lobuqu lufanele lwenziwe ngenjongo yokusondela kuYehova. (Yak. 4:8) Ufundisiso olwenziwa ngenjongo lufuna ixesha nendawo efanelekileyo, yaye ukufundisisa rhoqo kufuna ukuziqeqesha. (Dan. 6:10) Kwanokuba ungumntu oxakeke kakhulu, ngaba suku ngalunye ubekela ecaleni ixesha lokucamngca ngeempawu ezimangalisayo zikaYehova?—INdu. 119:147, 148; 143:5.
4. Umthandazo kunye nofundisiso lobuqu zisinceda njani ukuze sihlakulele ubuhlobo obusondeleyo noYehova?
4 Umthandazo osuk’ entliziyweni ubalulekile xa siza kwenza ufundisiso lobuqu olunentsingiselo. Ukuze iinyaniso zeBhayibhile zichukumise iintliziyo zethu zize zisibangele ukuba “sinikele inkonzo engcwele kuThixo sinoloyiko lobuthixo nentlonelo,” kufuneka sifumane umoya oyingcwele kaThixo. (Heb. 12:28) Ngoko ke, rhoqo xa siza kufundisisa kufuneka sicele umoya kaYehova. (Mat. 5:3) Njengoko siphonononga iZibhalo size sisebenzise iincwadi zokufundisisa iBhayibhile ezilungiselelwe yintlangano kaYehova, sivulela uYehova iintliziyo zethu. (INdu. 62:8) Ukufundisisa ngale ndlela sisenzo sokunqula esibonisa ukuba sizinikele kuYehova yaye komeleza indlela esisondele ngayo kuye.—Yuda 20, 21.
5. Kutheni kubalulekile ukuba suku ngalunye sicamngce ngeLizwi likaThixo?
5 Njengalo naluphi na ulwalamano, ulwalamano lwethu noYehova lumele lomelezwe rhoqo ukuze luqhubeke lukhula ngalo lonke ixesha lokuphila kwethu. Ngoko ke, ngamana suku ngalunye singazithengela ixesha lokusondela kuThixo, sisazi ukuba, naye uya kusondela kuthi.—INdu. 1:2, 3; Efe. 5:15, 16.