Yiba Ngcwele Kuyo Yonke Ihambo Yakho
1. Kutheni kubalulekile ukuba sibe nehambo engcwele?
1 Njengabakhonzi bakaThixo ongcwele, uYehova, sizabalazela ukuba ngcwele kuyo yonke ihambo yethu. (1 Pet. 1:15, 16) Oku kuthetha ukuba sizama ukuphakamisa imilinganiselo kaYehova kuzo zonke iinkalo zobomi. Indibano yesithili yalo nyaka iza kusivulela ithuba elikhethekileyo lokubonisa ihambo engcwele.
2. Singayibonisa njani ihambo entle kwindawo esihlala kuyo?
2 Iindawo Zokuhlala: Isebe lamagumbi lasekuhlaleni liye lachitha ixesha elininzi lifunela abo baza kuza endibanweni iindawo ezifanelekileyo zokuhlala. Enoba kusehotele, kwindlu yeendwendwe, kwindawo eqeshisa ngeekharavani okanye kumakhaya abantu, sicela ufune amagumbi oza kuwasebenzisa kuphela. Apho kuyimfuneko, faka idipozithi kwangaphambili. Kwezinye iihotele nezindlu zeendwendwe, amaxesha okungena nawokuphuma axakeke kakhulu, kuya kuba kuhle ukuba sizame ukubonakalisa isiqhamo somoya. Ukuba akusazukuhlala kuloo ndawo yazisa abaphathi bayo ngokukhawuleza. Ungalibali ukubapha amaqithiqithi abasebenzi abenza umsebenzi wabo ngendlela esemagqabini.
3. Inokubachukumisa njani abanye ihambo yamaNgqina aselula?
3 Isimilo sethu sinokunikela ubungqina obunamandla. Kulo nyaka uphelileyo, iNgqina eliselula lacela izinto zokubhala kumabhalanekazi wenye ihotele laza lambulela emva koko. Oku kwamchukumisa kakhulu lo mabhalanekazi, waza wathi: “Abasekho abantu abaselula abachubeke ngolu hlobo.” Noko ke, ngamanye amaxesha, abantwana abangabekwanga sweni baye babonwa bequbha, bengxola, bedlala kwizinyuko okanye ezipasejini. Abazali abafanele bavumele abantwana babo behle benyuka kunoko bafanele bababek’ esweni ukuze ihambo yabo idumise uYehova.—IMize. 29:15.
4. Singabonisa njani ukuba siyabazelela abanye xa sisitya kwiindawo zokutyela?
4 Kwiivenkile Zokutyela: Enye iweyitala eyayisebenza kwivenkile yokutyela eyayikufutshane nendibano yathi: “AmaNgqina ahlukile. Ayabahlonela abanye abantu.” Ihambo entle iquka ukungathetheli phezulu nokungahleki isiqhazolo sentsini esinokuphazamisa abanye abeze kwivenkile yokutyela. Kwakhona sifanele sikhumbule ukuba kwiindawo ezininzi sisithethe ukushiya amaqithiqithi, kuya ngokomgangatho wenkonzo eye yanikelwa. Nokuba siyatya okanye siyasela, sifuna ukuzenzela uzuko lukaThixo zonke izinto.—1 Kor. 10:31.
5. Iquka ntoni ihambo entle kwindawo yendibano?
5 Kwindawo Yendibano: Ihambo yethu ifanele ibe ntle ngokukodwa xa sisendibanweni. Ncedani nisebenzisane nabalindi, kwiindawo zokupaka iimoto nasendibanweni. (Heb. 13:17) Iintsapho zifanele zihlale kunye kunokuba zivumele abantwana, kuquka abo bakwishumi elivisayo, bahlale nolunye ulutsha. Izinto zokurekhoda nezaluphi na uhlobo azifanele zixokonyezelelwe kumbane wendawo ekuqhutyelwa kuyo indibano okanye kwisandisi lizwi kwaye zimele zisetyenziswe ngendlela engasayi kuphazamisana nabanye. Ukuba ufuna ukufota, musa ukusebenzisa ifleshi ngoxa kuqhubeka ucwangciso. Iipager noonomyayi (cellphone) zifanele zingaphazamisi. Ukuba ubona kusenzeka ingozi kule ndawo kuqhutyelwa kuyo indibano, nceda wazise umlindi okanye iSebe Loncedo Lokuqala.
6. Imzukisa njani uThixo ihambo yethu xa sisendibanweni?
6 Ihambo yethu iyasahlula kwabanye abantu kwaye izukisa uThixo wethu. (1 Pet. 2:12) Endibanweni, izenzo zamaNgqina kaYehova ziza kubonakala kuye wonke ubani. Ngenxa yoko, zimisele ukuba ngcwele kuyo yonke ihambo yakho.
[Ibhokisi ekwiphepha 5]
Yiba Nehambo Entle
◼ Thobela yonke imithetho yehotele
◼ Babek’ esweni abantwana
◼ Yiba nolwazelelo xa uqhubana nabanye