Hlala Ukuqonda Ukungxamiseka Kwamaxesha Esiphila Kuwo!
1 UYesu wayesazi ukuba unexesha elincinane lokuba awugqibe umsebenzi awayewuthunywe nguYise emhlabeni. (Yoh. 9:4) Ngenxa yoko, ubulungiseleli bakhe wabenza ekuqonda ukungxamiseka kwexesha, ibe waqeqesha abafundi bakhe ukuba benze ngokufanayo. (Luka 4:42-44; 8:1; 10:2-4) Ubutofotofo bezinto eziphathekayo babungabalulekanga kangako kuye. (Mat. 8:20) Ngaloo ndlela, wakwazi ukuwugqiba umsebenzi awayewunikwe nguYehova.—Yoh. 17:4.
2 Ixesha Lifinyele: Ixesha lokushumayela iindaba ezilungileyo “kuwo wonke umhlaba omiweyo” lifinyele. (Mat. 24:14) Isiprofeto seBhayibhile sibonisa ukuba singene nzulu kwixesha lesiphelo. Kungekudala “abo bangamaziyo uThixo nabo bangazithobeliyo iindaba ezilungileyo ezingeNkosi yethu uYesu baya kuva isohlwayo sesigwebo sentshabalalo engunaphakade.” (2 Tes. 1:6-9) Loo mgwebo uya kufika ngequbuliso. (Luka 21:34, 35; 1 Tes. 5:2, 3) Abantu kufuneka bayiphaphele ingozi abajamelene nayo. Sinembopheleleko yokubanceda benze izinto ezimkholisayo uYehova ngoku ixesha lisavuma.—Zef. 2:2, 3.
3 Ukwenza Konke Okusemandleni: Beqonda ukuba “ixesha eliseleyo lifinyele,” abakhonzi bakaThixo babeka umsebenzi wokushumayela kwindawo yokuqala. (1 Kor. 7:29-31; Mat. 6:33) Bambi baye bancama izinto ezibazisela imali eninzi okanye ezinye izinto zobuqu ukuze babe nexesha elingakumbi kubulungiseleli. (Marko 10:29, 30) Abanye bayaqhubeka “benokuninzi kokwenza emsebenzini weNkosi” ngoxa benyamezele izilingo. (1 Kor. 15:58) Kangangamashumi eminyaka abaninzi bebeshumayela iindaba ezilungileyo esidlangalaleni bengaxengaxengi. (Heb. 10:23) Ukuzincama kwabo ngenxa yezilangazelelo zoBukumkani kuxabiseke kakhulu kuYehova.—Heb. 6:10.
4 Xa sisekela ubomi bethu ekunquleni uYehova, okuquka umsebenzi wokushumayela, oko kusinceda sigcine usuku lukaYehova luthe thaa ezingqondweni zethu. Kuyasikhusela kwizinto eziphazamisayo zeli hlabathi likaSathana yaye kusenza sizimisele nangakumbi ukugcina ihambo yethu ingcwele. (2 Pet. 3:11-14) Kakade ke, xa ubulungiseleli bethu sibenza sikuqonda ukungxamiseka kwamaxesha esiphila kuwo, sinokusindisa thina nabo basiphulaphulayo.—1 Tim. 4:16.