Hlala Unemvo Yongxamiseko
“Lishumayele ilizwi ngokungxamisekileyo.” —2 TIM. 4:2.
NGABA UNOKUCACISA?
Kwakutheni ukuze amaKristu enkulungwane yokuqala ashumayele ngokungxamisekileyo?
Sinokuhlala njani sinemvo yongxamiseko?
Kutheni ukushumayela ngoBukumkani kungxamiseke ngakumbi ngoku kunokuba kwakunjalo ngaphambili?
1, 2. Yiyiphi imibuzo eza kuphendulwa ngokuphathelele ‘ukushumayela ngokungxamisekileyo’?
ABANTU abasebenza ngokusindisa ubomi badla ngokukwenza oko ngemvo yongxamiseko. Ngokomzekelo, abacimi bomlilo bayakhawuleza ukuya kwindawo etshayo, kuba bayazi ukuba ubomi babantu busenokuba sengozini.
2 NjengamaNgqina kaYehova sifuna ukunceda abantu ukuze basindiswe. Yiloo nto, ukushumayela nokufundisa abantu iindaba ezilungileyo zoBukumkani kubalulekile kuthi. Nangona umsebenzi wethu ungxamisekile, siyacinga ngaphambi kokuba senze. Ngoko wayethetha ukuthini umpostile uPawulos xa wayebongoza esithi: “Lishumayele ilizwi ngokungxamisekileyo”? (2 Tim. 4:2) Sinokushumayela njani ngokungxamisekileyo? Yaye kutheni umsebenzi wethu ungxamisekile?
KUTHENI UMSEBENZI WETHU WOKUSHUMAYELA UNGXAMISEKILE?
3. Kunokuba nayiphi imiphumo ukwamkela okanye ukungamkeli kwabantu isigidimi soBukumkani?
3 Xa ucinga ngendlela umsebenzi wethu wokushumayela onokubusindisa ngayo ubomi babantu, mhlawumbi uyakubona indlela ekungxamiseke ngayo ukuba uxelele abanye ngeendaba ezilungileyo. (Roma 10:13, 14) ILizwi likaThixo lithi: “Ndakuthi ke kongendawo: ‘Ngokuqinisekileyo uya kufa.’ Aze okunene abuye esonweni sakhe, enze okusesikweni nobulungisa, . . . ngokuqinisekileyo uya kuhlala ephila. Akayi kufa. Akukho nasinye kwizono one ngazo esiya kukhunjulelwa kuye.” (Hez. 33:14-16) Ixelela abo bafundisa ngesigidimi soBukumkani, iBhayibhile ithi: “Uya kuzisindisa wena nabo bakuphulaphulayo.”—1 Tim. 4:16; Hez. 3:17-21.
4. Kutheni uwexuko lwenza ukushumayela kwangxamiseka ngenkulungwane yokuqala?
4 Ukuze siqonde isizathu sokuba uPawulos abongoze uTimoti ukuba ashumayele ngokungxamisekileyo, makhe sihlole umongo wesibhalo sethu esiyintloko. Siyafunda: “Lishumayele ilizwi ngokungxamisekileyo, ngexesha elilungileyo nangexesha lenkathazo, yohlwaya, khalimela, bongoza, ngako konke ukuzeka kade umsindo nobugcisa bokufundisa. Kuba kuya kubakho ixesha laxa bengayi kuyinyamezela imfundiso ephilileyo, kodwa basuke ngokweminqweno yabo baziqwebele abafundisi bokubanyumbaza iindlebe; baya kuyifulathela inyaniso.” (2 Tim. 4:2-4) UYesu waxela kwangaphambili ukuba kwakuza kubakho uwexuko. (Mat. 13:24, 25, 38) Njengoko lalisondele elo xesha, kwakungxamisekile ngoTimoti ukuba ‘alishumayele ilizwi’ kwanaphakathi ebandleni, ukuze amaKristu angatsaleleki kuwexuko aze akhohliswe ziimfundiso zobuxoki. Ubomi babo babusengozini. Kuthekani namhlanje?
5, 6. Ziziphi iimfundiso ezithandwayo esinokudibana nazo kubulungiseleli bethu?
5 Ukuwexuka kunqulo lokwenyaniso kuyanda yaye kusasazeke kwiindawo ezininzi. (2 Tes. 2:3, 8) Ziziphi iimfundiso ezinyumbaza iindlebe zabantu namhlanje? Kwiindawo ezininzi, kukhuthazwa imfundiso yendaleko. Nangona inzululwazi idla ngokusetyenziswa ukuze kuchazwe kuze kuxhaswe indaleko, kubonakala ukuba indaleko lunqulo kuba ichaphazela indlela abantu abamjonga ngayo uThixo nabantu. Enye imfundiso ethandwayo yeyokuba uThixo akanamdla kuthi; ngenxa yoko akuyomfuneko ukuba sibe nomdla kuye. Kutheni izigidi zabantu zinomdla kwezi mfundiso ekubeni zibenza babe sebuthongweni ngokomoya? Zombini ezi mfundiso zidlulisela lo myalezo, ‘Ungenza nantoni na ofuna ukuyenza kuba awusayi kuphenduliswa ngayo.’ Eneneni, lo ngumyalezo oye wanyumbaza iindlebe zabantu abaninzi.—Funda iNdumiso 10:4.
6 Abantu baye bavumela ukuba banyunjazwe iindlebe nangezinye iindlela. Abanye abantu abasayayo ecaweni bayathanda ukuva abefundisi bebaxelela ukuba, ‘Enoba wenza ntoni na, uThixo uyakuthanda.’ Abefundisi nezinye iinkokeli zonqulo zinyumbaza iindlebe zabanye ngokubeyisela ekubeni imisitho, iMithendeleko, imibhiyozo yonqulo nemifanekiso iyasikelelwa nguThixo. Amarhamente asenokungayazi indlela asengozini ngayo. (INdu. 115:4-8) Sekunjalo, ukuba siyabavusa abantu kubuthongo bokomoya size sibancede baqonde inyaniso eseBhayibhileni, banokuzuza kuBukumkani bukaThixo.
KUTHETHA UKUTHINI UKUSHUMAYELA NGOKUNGXAMISEKILEYO?
7. Sinokuyibonisa njani imvo yongxamiseko?
7 Ugqirha otyandayo ufanele angavumeli nantoni na ukuba imphazamise xa esenza utyando, kuba ubomi bomntu amatyandayo bubalulekile. Kubulungiseleli bethu bamaKristu, sinokubonisa imvo yongxamiseko ngokunikela ingqalelo kumsebenzi wethu, sicinge ngeempapasho, imibuzo okanye inkcazelo enokubangel’ umdla kubantu esidibana nabo. Kwakhona imvo yongxamiseko inokusenza sihlengahlengise ucwangciso lwethu ukuze sityelele abantu ngexesha abakulungele ngalo ukusiphulaphula.—Roma 1:15, 16; 1 Tim. 4:16.
8. Kudla ngokuquka ntoni ukuba nemvo yongxamiseko?
8 Ukuba nemvo yongxamiseko kukwaquka ukubeka izinto zokuqala kwindawo yokuqala. (Funda iGenesis 19:15.) Ngokomzekelo, khawube nombono ufumana iziphumo zoxilongo, ugqirha wakho ukubizela eofisini yakhe aze athi: “Imeko yakho yezempilo imbi kakhulu. Usalelwe nje lithuba elingaphantsi kwenyanga lokuba unyangwe kwisigulo onaso.” Mhlawumbi ubungazi kuphuma ugqotsa kuloo ofisi ngokungathi uye kucima umlilo. Kodwa ubuza kuphulaphula amacebiso akhe, ugoduke uze ucingisise ngento oza kuqala uyenze.
9. Kutheni sinokuthi uPawulos washumayela ngongxamiseko xa wayese-Efese?
9 Xa sifunda oko uPawulos wakuxelela abadala base-Efese ngokushumayela kwakhe kwisithili saseAsiya sinokufunda okuthile ngokuba nemvo yongxamiseko kwakhe. (Funda iZenzo 20:18-21.) Phofu ke, ngosuku lokuqala awafika ngalo wayexakekile etyelela abantu ebashumayeza ngeendaba ezilungileyo. Ukongezelela, kangangeminyaka emibini wayenocwangciso ‘lokunikela iintetho mihla le kwiholo yesikolo sikaTirano.’ (IZe. 19:1, 8-10) Licacile elokuba, ukuba nemvo yongxamiseko kukaPawulos kwakunegalelo kwizinto awayeqhele ukuzenza. Isiluleko esithi ‘masishumayele ngokungxamisekileyo’ asithethi kuthi sifanele sivakalelwe kukuba kunzima ukwenza umsebenzi wokushumayela. Kodwa umsebenzi wokushumayela ufanele ube yeyona nto ibalulekileyo kuthi.
10. Kutheni isivuyisa into yokushumayela kwaBafundi BeBhayibhile ngemvo yongxamiseko kwiminyaka eli-100 eyadlulayo?
10 Ngaphambi kowe-1914, iqaqobana laBafundi BeBhayibhile laqalisa umsebenzi wokushumayela, yaye basimisela umzekelo wokuba nemvo yongxamiseko. Nangona babengamawaka ambalwa, babesazi ukuba baphila kumaxesha anzima yaye baqalisa ukushumayela ngenzondelelo ngoBukumkani. Babeneentshumayelo ezipapashwe kumaphephandaba angamakhulu yaye babenenkqubo enemifanekiso emibalabala neshukumayo ebizwa ngokuba “yiPhoto-Drama of Creation.” Bazifikelela ngaloo ndlela ke izigidi zabantu ngeendaba ezilungileyo. Ukuba babengenayo imvo yongxamiseko, ngebebangaphi kuthi abasivayo isigidimi soBukumkani?—Funda iNdumiso 119:60.
KULUMKELE UKUPHULUKANA NEMVO YAKHO YONGXAMISEKO
11. Kutheni abanye beye baphulukana nemvo yabo yongxamiseko?
11 Iziphazamiso zinokumenza umntu ayeke ukucinga ngokubaluleka komsebenzi wokushumayela. USathana usebenzisa le nkqubo yezinto ukuze asiphazamise kwinkonzo kaYehova ngokusigcina sixakekiswe zizinto zethu kwakunye nezo zingabalulekanga. (1 Pet. 5:8; 1 Yoh. 2:15-17) Abanye abakha bayibeka kwindawo yokuqala inkonzo kaYehova baye baphulukana nemvo yabo yongxamiseko. Ngokomzekelo, omnye umKristu wenkulungwane yokuqala ‘owayelidlelane’ likaPawulos ogama linguDemas, waphazanyiswa yinkqubo yezinto engahloneli Thixo. Kunokuba aqhubeke esomeleza umzalwana wakhe ngexesha lobunzima, uDemas wamshiya uPawulos.—Filem. 23, 24; 2 Tim. 4:10.
12. Liliphi ilungelo elisivulekeleyo ngoku yaye ngawaphi amanye aya kusivulekela ngonaphakade?
12 Ukuba sifuna ukuhlala sinemvo yongxamiseko, kufuneka sixhathise isilingo sokwenza izinto eziza kusiphazamisa kumsebenzi wokushumayela. Kufuneka sisebenze nzima ukuze sifumane ‘ubomi benene.’ (1 Tim. 6:18, 19) Usenokuba awuthandabuzi ukuba ubomi obungunaphakade emhlabeni ngaphantsi koBukumkani bukaThixo, buza kukuvulela amathuba amaninzi okwenza imisebenzi ebangel’ umdla. Kodwa okwangoku, ilungelo esinalo lelokunceda abantu basinde kwiArmagedon.
13. Ekubeni ngoku singamaKristu, sinokuhlala njani sinemvo yongxamiseko?
13 Uninzi lwabantu abasingqongileyo alumazi uYehova yaye lusebuthongweni ngokomoya, ngoko yintoni esinokuyenza ukuze sihlale sinemvo yongxamiseko? Sifanele sikhumbule ukuba sasikhe asamazi uThixo yaye sasingenathemba ngekamva. Kodwa safunda inyaniso ngoYehova nangoYesu ngokungathi kunjalo savuswa kubuthongo bokomoya, njengoko uPawulos watshoyo. Ngoku sinelungelo lokukhanyisa size sifundise abanye inyaniso. (Funda eyabase-Efese 5:14.) Emva kokukhankanya loo nto, uPawulos wabhala wathi: “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha, ngenxa yokuba imihla ingendawo.” (Efe. 5:15, 16) Kweli hlabathi lingendawo, ‘masizongele ixesha’ ukuze senze imisebenzi eza kusigcina siphaphile ngokomoya.
SIPHILA KUMAXESHA AMANQAM
14-16. Yintoni eyenza ukushumayela ngoBukumkani kungxamiseke kunokuba kwakunjalo ngaphambili?
14 Ubulungiseleli bamaKristu bebusoloko bungxamisekile, kodwa ngoku bungxamiseke ngakumbi kunangaphambili. Ukususela ngowe-1914 siye sabona iziganeko ezininzi emhlabeni ezenzeka kanye ngendlela ebezichazwe ngayo kwiLizwi likaThixo. (Mat. 24:3-51) Ukusinda kwabantu kusisisongelo kunokuba kwakunjalo ngaphambili. Nangona ezona ntlanga zinamandla ehlabathini ziye zenza izivumelwano zoxolo, zisenemijukujelwa yenyukliya emalunga nama-2 000 enokuqhushumbiswa nakweyiphi na indawo emhlabeni. Abasemagunyeni baye banikela ingxelo ngezixhobo zenyukliya eziye “zalahleka” kangangamakhulukhulu ezihlandlo. Ngaba abagrogrisi banazo ezinye zezi zixhobo? Abanye abantu bathi imfazwe enokuqalwa ngabagrogrisi ingasitshabalalisa sonke. Noko ke, asiyomfazwe kuphela esongela uluntu.
15 Ingxelo yowama-2009 yeThe Lancet neyeUniversity College London ithi xa ithetha ngemihla yethu: “Kule nkulungwane yama-21 ukutshintsha kwemozulu yeyona nto isongela impilo yabantu ehlabathini. Imiphumo yokutshintsha kwemozulu iza kuchaphazela impilo yabantu abaninzi yaye iza kubeka ubomi babo esichengeni.” Iindawo ezininzi zisenokutshabalala ngenxa yokunyuka komphakamo wolwandle, iimbalela, izikhukula, izifo, iinkanyamba neemfazwe ezibangelwa kukunqaba kwezinto. Licacile elokuba iimfazwe neentlekele zemvelo zisisisongelo kuluntu.
16 Abanye abantu basenokucinga ukuba imfazwe yenyukliya inokukhokelela kwiziganeko ezizalisekisa “umqondiso.” Noko ke, abantu abaninzi abayiqondi eyona ntsingiselo yesiprofeto sikaYesu. Kangangeminyaka emininzi, siye sabona iziganeko ezibonisa ukuba ngokwenene uKristu ukho nokuba ukupheliswa kwale nkqubo yezinto kusemnyango. (Mat. 24:3) Iinkalo zomqondiso azizange nanini na ngaphambili zicace ngendlela ezicaca ngayo ngoku. Ngoku lixesha lokuba abantu bavuke ngokomoya. Ubulungiseleli bethu bunokusinceda sibavuse.
17, 18. (a) “Ixesha” lisichaphazela njani? (b) Yintoni enokutshintsha imbono yabantu ngesigidimi soBukumkani?
17 Sinexesha nje elincinane lokubonisa indlela esimthanda ngayo uYehova nelokugqiba umsebenzi wokushumayela esiwabelweyo kule mihla yokugqibela. Oko kwathethwa nguPawulos ngenkulungwane yokuqala kumaKristu aseRoma kunentsingiselo engakumbi kumhla wethu: “Kwanangenxa yokuba nilazi ixesha, okokuba sele kulilixa lokuba nivuke ebuthongweni, kuba ngoku usindiso lwethu lukufuphi ngakumbi kunangexesha esathi saba ngamakholwa ngalo.”—Roma 13:11.
18 Iziganeko ezaxelwa kwangaphambili zemihla yokugqibela zinokwenza abanye abantu bayiphaphele intswelo yabo yokomoya. Abanye bayakubona ukufuna kwabantu uncedo njengoko oorhulumente babantu beye basilela ukujamelana nokudodobala kwezoqoqosho, izisongelo zenyukliya, ulwaphulo-mthetho olunogonyamelo okanye ukutshatyalaliswa kwemekobume. Abanye baye bayiphaphela intswelo yabo yokomoya ngenxa yezinto eziye zenzeka kwiintsapho zabo, njengokugula, uqhawulo-mtshato, okanye ukuswelekelwa sisalamane. Ukuba kubulungiseleli kusenza sibancede abantu abanjalo.
UKUQHUTYWA YIMVO YONGXAMISEKO
19, 20. Imvo yongxamiseko iye yawanceda njani amaKristu amaninzi ukuba enze utshintsho kubomi bawo?
19 Imvo yongxamiseko iye yashukumisela amaKristu amaninzi ukuba andise isabelo sawo kubulungiseleli. Ngokomzekelo, isibini esiselula saseEcuador sagqiba ekubeni sibenze lula ubomi baso emva kokuba siphulaphule ucwangciso lwendibano ekhethekileyo yosuku olunye yowama-2006, eyayinomxholo othi “Gcina Iliso Lakho Lingenakumbi.” Senza uludwe lwezinto esasinokuphila ngaphandle kwazo yaye kwiinyanga nje ezintathu, sayishiya indlu yaso enamagumbi okulala amathathu safudukela kwenegumbi elinye lokulala, sathengisa ezinye izinto saza asabi namatyala. Kungekudala saba ngoovulindlela abangabancedani saza salithatha icebiso lomveleli wesiphaluka lokuya kukhonza kwibandla elinemfuneko yabashumayeli beendaba ezilungileyo abangakumbi.
20 Umzalwana wakuMntla Merika wabhala wathi: “Xa mna nenkosikazi saya kwindibano yowama-2006 sasisele sineminyaka engama-30 sibhaptiziwe. Ngoxa sasisemotweni kwindlela egodukayo, saxubusha ngendlela esinokusisebenzisa ngayo isiluleko esisifumene apho sokwenza ubomi bethu bube lula. (Mat. 6:19-22) Sasinezindlu ezintathu, umhlaba, iimoto eziphambili, isikhephe nekharavani. Njengoko sasivakalelwa kukuba sichithe amandla nexesha elininzi kwizinto eziphathekayo, sagqiba kwelokuba sibe kwinkonzo yexesha elizeleyo. Ngowama-2008, saba ngoovulindlela abathe ngxi njengentombi yethu. Siye sakuvuyela ukusebenza kunye nabazalwana. Siye sakhonza nakwiindawo ezinemfuneko yabavakalisi. Kwakhona amava okusebenzela uYehova ngakumbi aye asenza sasondela kuye. Elona lungelo likhethekileyo kukuvula amehlo abantu ukuze babone njengoko besiva baze baqonde inyaniso eseLizwini likaThixo.”
21. Luluphi ulwazi olusiqhubela esenzweni?
21 Siyayazi ukuba yintoni eza kuthabathel’ indawo le nkqubo ingendawo yezinto—‘yimini yomgwebo neyentshabalalo yabantu abangenabuthixo.’ (2 Pet. 3:7) Ukwazi kwethu iLizwi likaThixo kusishukumisela ekubeni sivakalise ngenzondelelo ukuza kwembandezelo enkulu nokuza kwehlabathi elitsha. Siqhubeka sinemvo yongxamiseko ngokuxelela abantu ngethemba lokwenene lekamva. Ngokuba nenxaxheba ngokuzeleyo kulo msebenzi ungxamisekileyo, sibonisa uthando lokwenene ngoThixo nangabantu.