Ukufikelela Abaninzi Kangangoko Kunokwenzeka
1. Enza ntoni amaKristu okuqala ukuze afikelele abantu abaninzi kangangoko kunokwenzeka ngeendaba ezilungileyo?
1 Abalandeli bokuqala bakaYesu babekufuna ngokunyanisekileyo ukusasaza iindaba ezilungileyo zoBukumkani. Babesebenzisa amacebo aphumelelayo ukuze iindaba ezilungileyo zifumaneke kubantu abaninzi kangangoko kunokwenzeka. Ababhali beBhayibhile abangamaKristu babhala iincwadi zabo eziphefumlelweyo ngesiGrike esiqhelekileyo, esasilulwimi ezazinxibelelana ngalo iintlanga kuBukhosi BaseRoma. Ukongezelela koko, abashumayeli abakhutheleyo benkulungwane yesibini neyesithathu yeXesha Eliqhelekileyo basenokuba babephambili ekusebenziseni imibhalo-ngqangi, ekwakulula ukuyisebenzisa ekuhloleni iimbekiselo kunokusebenzisa imisongo.
2, 3. (a) UIsaya 60:16 uzaliseka njani namhlanje? (b) Ubugcisa busetyenziswa njani ukuze kuhanjiselwe phambili unqulo olunyulu?
2 Ukusetyenziswa Kobugcisa: Esebenzisa uIsaya, uYehova waprofeta esithi: “Okunene uya kwanya ubisi lweentlanga.” (Isa. 60:16) Kwinzaliseko yale mihla yesi siprofeto, abakhonzi bakaYehova basebenzisa izinto ezixabisekileyo zeentlanga ukuze uhambele phambili umsebenzi wokushumayela. Ngokomzekelo, ngowe-1914, kwiminyaka ngaphambi kokuba imifanekiso eshukumayo enesandi iphumelele kwezorhwebo, aBafundi BeBhayibhile baqalisa ukubonisa i-“Photo-Drama of Creation.” Lo mfanekiso ushukumayo owawuphelekwa zislides nowawuthabatha iiyure ezisibhozo, unombala nesandi esipheleleyo, wanikela ubungqina kwizigidi zabantu.
3 Namhlanje, abantu bakaThixo basebenzisa oomatshini bokushicilela nezixhobo zekhompyutha ezikhawulezayo ukuze bapapashe iiBhayibhile noncwadi olusekelwe eBhayibhileni ngeelwimi ezingamakhulu. Kusetyenziswa iindlela ezikhawulezayo zokuthutha uncwadi lweBhayibhile ukuze luthunyelwe kwiindawo ezikude zomhlaba, zifikelele kumazwe angama-235. UYehova uye wasebenzisa umoya wakhe ukuba uncede abakhonzi bakhe babusebenzise ngempumelelo ubugcisa, ukuze inyaniso yeBhayibhile ifumaneke kubantu abaninzi ukudlula nanini na embalini.
4. Luluphi uhlengahlengiso oluye lwenziwa ngabanye kubomi babo ukuze bafikelele abantu abangakumbi ngeendaba ezilungileyo?
4 Uhlengahlengiso Lobuqu: Abanquli bokwenyaniso baye bashukunyiselwa ukuba benze uhlengahlengiso lobuqu ukuze bafikelele abantu abangakumbi ngeendaba ezilungileyo. Abaninzi baye babenza lula ubomi babo ukuze babe nesabelo ngakumbi kumsebenzi wokushumayela. Abanye baye bafuduka ukuze baye kukhonza apho kukho imfuneko yabavakalisi boBukumkani khona. Ukanti abanye baye bandisa ubulungiseleli babo ngokufunda ulwimi lwasemzini.
5, 6. Yintoni enokwenziwa ukuze kufikelelwe abantu abaninzi kangangoko kunokwenzeka kwintsimi yebandla lasekuhlaleni?
5 Ukongezelela koko, sinokufikelela abantu abangakumbi ngeendaba ezilungileyo ngokushumayela ngexesha abantu ababa sekhaya ngalo nangokushumayela kwiindawo abanokufunyanwa kuzo. Ukuba abantu abafumaneki kwintsimi yenu ebudeni bemini, akungeluhlengahlengisi na ucwangciso lwakho ukuze ushumayele ngokuhlwa? Ngaba zikho iindawo zikawonke wonke ekunokushunyayelwa kuzo? Ukhe wazama ukushumayela ngomnxeba nokusebenza intsimi yamashishini? Ngaba ukhangela amathuba okushumayela ngokungacwangciswanga?
6 Elinjani lona ilungelo esinalo lokwabelana nabanye ngobungqina obuzukileyo obunikelwa ngegama likaYehova nangoBukumkani! Ngamana singaqhubeka sichazela abantu abaninzi kangangoko kunokwenzeka ngenyaniso evela kwiLizwi likaThixo.—Mat. 28:19, 20.