Uncedo Olufumaneka Ngokukhawuleza
1. Kunokwenzeka njani ukuba umntu abe buthathaka ngokomoya?
1 UAnna, udade onomyeni ongakholwayo noxakeke gqitha kumsebenzi wakhe wempangelo, wayekufumanisa kunzima ukuya rhoqo kwiintlanganiso zamaKristu, ukuya entsimini nokufunda iLizwi likaThixo. Nangona wayesamthanda uYehova, waphola. Okuvuyisayo kukuba, wafumana uncedo lokomoya kubadala ababexhalabile.
2. Yiyiphi indlela anokuthi onke amaKristu abe luncedo olufumaneka ngokukhawuleza?
2 Ukwamkela uncedo lokomoya olunikelwa libandla lamaKristu kubonisa ukuba sayame ngokupheleleyo ngoYehova. Exelisa uthando lukaYesu Kristu, amadoda amakhulu ebandla akhangela amathuba okukhuthaza nokunceda abo bangasaqhubi kakuhle ngokomoya. (1 Tes. 5:14) Kumaxesha amaninzi, amazwi asekelwe kwiindinyana zeBhayibhile ezikhuthazayo adla ngokwanela. Ukuzabalazela ukunceda abo babuthathaka asinto efanele yenziwe ngabadala kuphela, namanye amaKristu anembopheleleko yokwenjenjalo. Ngokuqinisekileyo sonke siyayazi indlela elinamandla ngayo “ilizwi elithethwe ngexesha elifanelekileyo.”—IMize. 25:11; Isa. 35:3, 4.
3, 4. Yintoni ebandakanyekileyo ekuncedeni abanye, yaye sinokubanceda njani?
3 Makuqale Wena: Ukuze sibe nomdla wokwenene kwabo bafuna uncedo imele ibe sithi abaqalayo ukwenza okuthile, sibe novelwano yaye sizimisele. Xa uYonatan wevayo ukuba uDavide usengxakini, “waya kuDavide eHoreshi, ukuze asomeleze isandla sakhe.” (1 Sam. 23:15, 16) Bathantamise abantu xa ubanceda. Amazwi aqhutywa yinkxalabo yokwenene aba nemiphumo emihle. Ukongezelela koko, uYesu wabonisa kakuhle ukuba kufuneka kwenziwe umzamo ukuze kuzuzwe umzalwana okanye udade wokomoya. (Luka 15:4) Xa sinomnqweno wokwenene wokunceda umntu siya kuzingisa kwimizamo yethu kwanokuba inkqubela ayibonakali ngokukhawuleza.
4 Hayi indlela esiba lukhuthazo ngayo xa sisenza umgudu wokumema abanye, njengabo bakwisifundo sencwadi esikuso, ukuba bahambe nathi entsimini! Xa sinceda lowo sikhonza naye uYehova kwinkonzo yasentsimini, sinokusebenzisa elo thuba ukuze simomeleze. Loo maxesha ovuyo siwachitha kunye enkonzweni kaYehova akhuthaza ngokwenene kwabo bachachayo ngokomoya.
5. Luluphi uncedo olunokunikelwa ngabadala kwezinye iimeko?
5 Ilungiselelo Lothando: Abo banexesha elide bengasayi entsimini okanye bengezi kwiintlanganiso zebandla basenokufuna uncedo ukuze bakhe ukholo lwabo. Kusenokufuneka baqhutyelwe isifundo seBhayibhile esisekelwe kwincwadi ethi Nqula Okuphela KoThixo Oyinyaniso okanye ethi Sondela KuYehova. Ekubeni loo mntu sele ebhaptiziwe, kudla ngokungabi yomfuneko ukumqhubela isifundo ixesha elide. IKomiti Yenkonzo Yebandla ifanele ibe neliso elibukhali ukuze ibone ukuba ngoobani abanokungenelwa kweli lungiselelo.—Bona Isingxobo Semibuzo esikuBulungiseleli Bethu BoBukumkani bukaNovemba 1998 nobukaNovemba 2000.
6. Omnye udade wenza njani ukuze omelele kwakhona ngokomoya?
6 UAnna, okhankanywe ngaphambilana, walamkela ngezandl’ ezishushu ilungiselelo elenziwa ngabadala lokuba kubekho udade oqolileyo ngokomoya omqhubela isifundo seBhayibhile. Emva kwezihlandlo ezine nje kuphela efundelwa, wancedakala waza wasondela kuYehova kwakhona. Waqalisa ukuya kwiintlanganiso zebandla waza wakunqwenela kwakhona ukudumisa uYehova uThixo ekuhleni. Lo dade uqolileyo wamnceda nasentsimini ngokuya naye kwezinye izifundo zeBhayibhile de wabe womelele ngokwaneleyo ukuba angashumayela kwindlu ngendlu. Ekuphela kwento awayeyifuna luncedo!
7. Ziziphi iingenelo esizifumana ngokomeleza abanye ngokomoya?
7 Ukomeleza abo basweleyo kuza neentsikelelo kuye wonk’ ubani. Lowo uncedwayo uye onwabe ngenxa yokuba eye wasondela kuYehova waza wabandakanyeka kumsebenzi wentlangano Yakhe. Abadala bayavuya bakubona inkqubela yokomoya enjalo. (Luka 15:5, 6) Ibandla liyamanyana njengoko wonk’ ubani ebonisa ukuba ubaxhalabele abanye. (Kol. 3:12-14) Ngokuqinisekileyo sinezizathu ezihle zokuxelisa uYehova, oluncedo olufumaneka ngokukhawuleza!—Efe. 5:1.