Nceda Izifundo Eziqhutywa Emnyango Nangomnxeba Zenze Inkqubela
1. Yintoni injongo yethu yokuqhuba izifundo?
1 Kumnandi ngokwenene ukuqalisa isifundo seBhayibhile. Kodwa ke, ukufumana umntu onomdla wokufundisisa iBhayibhile kusisiqalo nje. Injongo yesifundo kukunceda umntu abe ngumfundi wokwenene kaKristu. (Mat. 28:19, 20) Yintoni enokusinceda silufikelele olu sukelo?
2. Siyintoni isifundo seBhayibhile esiqhutywa umi emnyango nangomnxeba, yaye kutheni ziphumelela nje?
2 Abantu Abaxakekileyo: Namhlanje abantu baya bexakeka. Kwezinye iindawo, bambalwa abantu abakufunayo ukuzipha ixesha elingangeyure ukuze bafundisise iBhayibhile. Ukuze sibancede abantu abanjalo, siye sakhuthazwa ukuba siqalise size siqhube izifundo zeBhayibhile emnyango okanye ngomnxeba. Ekuqaleni, ezi zifundo zisenokuba zifutshane yaye zinokuquka iindinyana nje ezimbalwa eziseBhayibhileni sisebenzisa nje isiqendu esinye okanye ezibini kwincwadi ethi Okufundiswa YiBhayibhile. Kuncomeka ngokwenene ukubona abavakalisi abaninzi ngoku beqhuba izifundo ezinjalo bemi emnyango okanye ngomnxeba.
3. Kutheni sifanele silandise ixesha esilichitha siqhuba isifundo emnyango?
3 Kodwa ke, ngaba sifanele saneliswe kukuhlala siqhuba isifundo simi emnyango? Akunjalo. Nangona kububulumko ukuba singahlali ixesha elide xa siqhuba isifundo okwesihlandlo sokuqala, UBulungiseleli Bethu BoBukumkani bukaMeyi 1990, kwiphepha 4, bathi: “Sakuba isifundo siqhubeka yaye nomdla womninimzi uvuselelekile, kusenokuchithwa ixesha elingakumbi esifundweni.” Oku kubalulekile. Ngokomzekelo: Ekuqaleni umntwana olambileyo unokutya ukutya nje okuncinane de ahluthe, kodwa besingayi kulindela ukuba adlamke aze akhule kakuhle ukuba ebenokutya ukutya okuncinane ngolo hlobo kangangeenyanga. Ngokufanayo, ukuze sikwazi ukuba ngumkhonzi kaThixo oqolileyo, isifundo seBhayibhile sifanele siqhutywe ngokucwangcisiweyo nangokuthe rhoqo.—Heb. 5:13, 14.
4. Ziziphi iinzuzo zokuqhuba isifundo seBhayibhile ngaphakathi endlwini?
4 Izifundo ZeBhayibhile Eziqhutywa Endlwini: Kungakuhle ukuqhuba isifundo kwindawo ezolileyo—ekhayeni okanye kwenye indawo efanelekileyo. Kuya kuba lula ukufunda kwindawo enjalo yaye kuya kunceda isifundo siliqonde kakuhle iLizwi likaThixo. (Mat. 13:23) Kwakhona kuya kunceda lowo usiqhubayo ukuba asenze sifanele iintswelo zomfundi. Ngaphezu koko, ukuba nexesha elingakumbi lokuqhuba isifundo kuvelisa ithuba lokuhlolisisa iLizwi likaThixo ngokucokiseke nangakumbi, nto leyo enokomeleza ukholo lwaso.—Roma 10:17.
5. Sinokusitshintsha njani isifundo esiqhutywa emnyango size sisiqhubele endlwini?
5 Unokusitshintsha njani isifundo esiqhutywa emnyango uze usiqhube endlwini? Emva kokufunda izihlandlo eziliqela, kutheni ungaceli loo mntu ukuba nibeke ixesha elongezelelekileyo nelingqalileyo lokuqhuba isifundo? Okanye unokumbuza lo mbuzo, “Ungakwazi na ukuba nexesha namhlanje lokuhlala phantsi size sixubushe lo mbandela kunye?” okanye “Ufuna sithathe ixesha elingakanani namhlanje ukuze sixubushe lo mbandela?” Ukuba oku akuphumeleli, ungaqhubeka ufunda naye umi emnyango. Ngexesha elifanelekileyo, zama ukwenza utshintsho kwakhona ukuze nifundele endlwini.
6. Sifanele sishumayele sinayiphi injongo, yaye amacebiso akweli nqaku anokusinceda njani ukuba siyifeze?
6 Njengoko siqhubeka sifuna abafanelekileyo, masingayilibali injongo yethu yokuqalisa ukuqhuba izifundo zeBhayibhile. Injongo yethu kukunceda abantliziyo zinyanisekileyo ukuba babe ngabakhonzi bakaYehova abazahluleleyo nababhaptiziweyo. Ngamana uYehova angayisikelela imigudu yethu yokwenza umsebenzi wobuvangeli sinaloo njongo.—2 Tim. 4:5.