Ibhokisi Yemibuzo

◼ Ngaba udade ohamba nomzalwana umele athwale xa eqhuba isifundo seBhayibhile emnyango?

Xa udade eqhuba isifundo seBhayibhile esicwangcisiweyo kukho nomzalwana ufanele athwale entloko. (1 Kor. 11:3-10) IMboniselo kaJulayi 15, 2002, kwiphepha 27, ithi: “Esi sisihlandlo esicwangcisiweyo sokufundisa apho lowo uqhuba isifundo esongamela. Phantsi kwezi meko, isifundo siba yinxalenye yokufundisa kwasebandleni. Ukuba ibhinqa eliliNgqina elibhaptiziweyo liqhuba isifundo esinjalo kukho umzalwana obhaptiziweyo, kufanelekile ukuba lithwale entloko.” Kuya kuba njalo enoba isifundo siqhutyelwa ekhaya, emnyango okanye kwenye indawo.

Kwelinye icala, ukuba isifundo esiqhutyelwa emnyango asikaqaliswa, akuyomfuneko ukuba udade athwale xa ehamba nomzalwana, enoba injongo yokubuyela kukubonisa indlela esiqhutywa ngayo isifundo okanye kukufunda umbandela kwenye yeempapasho esiqhuba ngazo isifundo. Ekubeni izifundo eziqhutyelwa emnyango zidla ngokuqaliswa emva kokuba kuye kwabuyelwa izihlandlo eziliqela, kuya kufuneka abavakalisi bajonge iimeko baze babone ukuba kunini apho kufuneka udade aqalise ukuthwala.