Baye Bamisela Umzekelo Wokuthembeka
1 Unyaka we-1937 waba kukuqala kohlobo olutsha lwenkonzo yexesha elizeleyo—ubuvulindlela obukhethekileyo. Amadoda namabhinqa azimiseleyo, anamava kubulungiseleli bamaKristu, azamkela ngezandla ezishushu izabelo zokuya kukhonza naphi na apho intlangano yayiwathumela khona. Ngoku, kumashumi eminyaka kamva oovulindlela abakhethekileyo bayaqhubeka bemisela umzekelo wokuthembeka ofanele ukuxeliswa.—Heb. 6:12.
2 Baye Bakhokela: Ekuqaleni, oovulindlela abakhethekileyo benza inkqubela kumsebenzi wokushumayela ngokusebenzisa igramafoni xa bethetha nabaninimzi emnyango. Babesebenzisa namazwi arekhodiweyo njengesiseko seengxubusho zeBhayibhile xa bebuyela. Oku kwakusenziwa kwizixeko ezikhulu ezazisele zinamabandla amileyo. Kamva, oovulindlela abakhethekileyo bathunyelwa kwiindawo ekufuneka abavakalisi boBukumkani abangakumbi kuzo. Babebuyela kubo bonke abanomdla baze baqhube izifundo zeBhayibhile. Ngenxa yokuzimisela kwabo kwasekwa amakhulukhulu amabandla amatsha. Ukusebenza kwabo bengadinwa kwaba negalelo kulwando esilubonayo namhlanje entlanganweni. (Isa. 60:22) Oovulindlela abakhethekileyo basenegalelo elibalulekileyo nangoku ekusasazeni iindaba ezilungileyo “kwindalo yonke ephantsi kwezulu.”—Kol. 1:23.
3 Bafanele Baxeliswe: Abanye oovulindlela abakhethekileyo bebekwinkonzo yexesha elizeleyo kangangamashumi eminyaka. Kuyo yonke loo minyaka, la madoda namabhinqa athembekileyo aye avumela ukholo lwawo lwasulungekiswa ziimeko ezahlukahlukeneyo. (1 Pet. 1:6, 7) Aye akulungela ukuncama ubunewunewu bezinto eziphathekayo ukuze akhonze kwiindawo afuneka ngokukhethekileyo kuzo. Ngoku amanye sele ekhulile ngeminyaka kwaye nempilo yawo inkenenkene okanye ajamelana nobunzima. (2 Kor. 4:16, 17) Kodwa ‘asaqhubeka echuma ebudeni bokuba nezimvi.’ (INdu. 92:14) Athembela ngoYehova ibe uyawasikelela.—INdu. 34:8; IMize. 10:22.
4 Ngokuqinisekileyo sifanele sibothulel’ umnqwazi oovulindlela abakhethekileyo. Ukuba unelungelo lokuba noovulindlela abakhethekileyo ababelwe kwibandla okulo, chitha ixesha kunye nabo uze ufunde kumava abanawo. Babulele ngenkonzo abayinikelayo njengabavakalisi boBukumkani abathembekileyo. Makukukhuthaze ukuzimisela kwabo. Bonke abo baxelisa ukholo lwabo baya kwamkeleka kuYehova yaye uya kubasikelela kuba “abo bathembekileyo uyakholiswa ngabo.”—IMize. 12:22.