Xa Singafumani Mntu Ekhayeni
1. Yiyiphi ingxaki esidla ngokuba nayo xa sishumayela kwindlu ngendlu?
1 Kwiindawo ezininzi kuya kusiba nzima ukufumana abantu bekumakhaya abo. Kula “maxesha amanqam,” abantu abaninzi bayanyanzeleka ukuba basebenze iiyure eziliqela ukuze bafumane izinto ezibalulekileyo. (2 Tim. 3:1) Abanye kuye kufuneke ukuba bemke ekhaya baye kuchitha imali, kungenjalo baye kuzonwabisa. Sinokuzishumayela njani iindaba ezilungileyo kubantu abanjalo?
2. Sinokuqiniseka njani ukuba imizi ekungafunyanwanga bantu kuyo iyafikelelwa?
2 Gcina Ingxelo: Inyathelo lokuqala kukubhala izindlu ezingenabantu. Kubaluleke ngokukhethekileyo ukwenjenjalo ukuba intsimi yenu niyisebenza rhoqo. Ngaba uye ubhale igama lesitrato, inombolo yomhlaba, igama lakho kunye nomhla? Unokushiya isithuba sokubhala amanqaku ongezelelekileyo xa wena okanye omnye umvakalisi ebuyela kwimizi ekungafunyanwanga bantu kuyo. Xa niyigqibile intsimi, khumbula ukunika umntu ophatha amakhadi entsimi ingxelo kunye namanqaku owabhalileyo, ngaphandle kokuba uyakuvumela ukuba usebenze amakhaya angenamntu. Sebenzisa iphepha elahlukileyo ukuze ubhale nabani na onomdla oza kubuyela kuye.
3. Ngawaphi amanye amacebiso endlela yokufikelela abantu abebengekho kumakhaya abo?
3 Zama Ngelinye Ixesha: Kusenokwenzeka ukuba abantu ongabafumananga ebudeni beveki uza kubafumana ngeengokuhlwa okanye ngeempelaveki. Kutheni ke ungahlengahlengisi ucwangciso lwakho ukuze ubuyele kubo ngexesha elibalungeleyo? (1 Kor. 10:24) Ukuba akukwazi, unokudlulisela olo ludwe kumvakalisi onokukwazi ukuya ngelinye ixesha. Kungenjalo, unokubabhalela ileta okanye ubafowunele abo ungabafumananga. Abavakalisi abampilo ingabavumeliyo ukuba basebenze kakhulu kwindlu ngendlu banokukuvuyela ukukunceda kule nkalo.
4. Nguwuphi umzekelo obonisa ukubaluleka kokubuyela kwimizi esingafumananga mntu kuyo?
4 Nanku umzekelo obonisa ukubaluleka kokuzama ukubuyela kubantu ongabafumananga ekhaya. Emva kokuba abavakalisi betyelele ikhaya elithile kaliqela kwiminyaka emithathu, bada bamfumana umninimzi. Bafumanisa ukuba lonke elo xesha wayelinde ukuba kufike iNgqina ukuze akwazi ukuphinda aqalise isifundo seBhayibhile kuba wayefundelwa ngaphambi kokuba afudukele kuloo ndawo.
5. Kunini apho intsimi igqalwa njengegqityiweyo?
5 Yigqibeni Intsimi: Kunini apho intsimi inokugqalwa njengegqityiweyo? Ngokuqhelekileyo, kuxa kuye kwenziwa imigudu esengqiqweni yokufikelela yonke imizi ekuloo ntsimi. Kunokuba yinto efanelekileyo ukushiya iphecana okanye iphephancwadi elidala kwindawo efihlakeleyo kumakhaya angenamntu, ngokukodwa kwintsimi engasetyenzwa rhoqo. Intsimi ifanele igqitywe kwisithuba seenyanga ezine. Emva koko kufanele kubuyiselwe ikhadi kwisicaka sentsimi ukuze sikubhale oko kwiingxelo zaso.
6. Kutheni sifanele sizame ukufikelela wonk’ ubani okwintsimi yethu ngeendaba ezilungileyo?
6 Sifuna ukuba abantu abaninzi kangangoko kunokwenzeka bafumane ithuba lokubiza egameni likaYehova baze basindiswe. (Roma 10:13, 14) Oku kuquka abo bangekhoyo kumakhaya abo xa singena kwindlu ngendlu. Njengompostile uPawulos, kunqwenele “ukunikela ubungqina obucokisekileyo kwiindaba ezilungileyo zobubele obungasifanelanga bukaThixo.”—IZe. 20:24.