Kutheni Umele Uwabhale Amakhaya Angenabantu?
1 Ngaminazana ithile, esinye isibini samaNgqina saqala ngenkonzo yasentsimini kwakusasa. Kamva kwangolo suku, sabuyela kumakhaya esingafumananga bantu kuwo kuloo ntsimi. Enye indoda yasingenisa endlwini yaza yaphulaphula ngenyameko. Yathabatha incwadi ethi Unokuphila Ngonaphakade yaza yabuza enoba loo maNgqina ayeza kubuya kusini na. Yayiqala ngqa ukuthetha namaNgqina kaYehova ibe yayinemibuzo emininzi eyayifuna iphendulwe; kwaqaliswa isifundo seBhayibhile. Esi sibini sasivuye gqitha kukufumana umntu obumvu ngolo hlobo. Akungethandi na ukuba kube njalo nakuwe? Ukuwabhala amakhaya angenabantu nokubuyela kuwo ngokukhawuleza kunokukwenza ukwazi ukwenjenjalo.
2 Kudala sibongozwa ukuba siwabhale amakhaya angenabantu size sibuyele ngokukhawuleza. Njengoko amava angasentla ebonisa, ukuphinda utyelele kwangolo suku kunokuza nemiphumo esemagqabini. Ngoxa sisenokuba sinyeke ukugubungela intsimi esiyabelweyo, mhlawumbi asikukhuthalelanga ukuwabhala phantsi amakhaya angenabantu. Bambi bathi: ‘Intsimi yethu siyigubungela ngeeveki ezimbini nje okanye ezintathu; noko akukho mfuneko yakuwabhala kuba kungentsuku zatywala siza kube silapha kwakhona.’ Kodwa oko kusinika isizathu esingakumbi sokuba siwabhale phantsi. Apho intsimi igutyungelwa ngokufuthi, ukubuyela kumakhaya angenabantu kunokusenza sikwazi ukucokisa ngakumbi ekufuneni abo bafanelekayo. Njani?
3 Kwiindawo ezininzi, abahlali abangama-50 ekhulwini okanye abangaphezulu ababikho ebudeni bemini. Ngenxa yoko, xa sinikela ingqalelo engakumbi kumakhaya angenabantu siyayandisa intsimi yethu. Kwanokuba loo ntsimi ayifane isetyenzwe, sinokufumana iziphumo ezibhetele ukuba senza umgudu wokufikelela wonke umntu ngaphambi kokuba loo mhlaba ugutyungelwe.
4 Ukubuyela kumakhaya ange-nabantu kusenokubekelwa olunye usuku, ukuba kunokwenzeka kwakuloo veki. Abaninzi bakufumanisa kulula ukubuyela ngolunye usuku okanye ngexesha elahlukileyo kwababefike ngalo okokuqala. Usenokukhetha ukusebenzisa ixesha elithile ngoMgqibelo okanye ngeCawa ukuze ubuyele kumakhaya abengenabantu owabhale ebudeni beveki. Okanye ke, amanye amabandla akufumanisa kuphumelela ukuwatyelela ngorhatya. Basenokufumanisa ukuba bangaphezu kwesiqingatha abahlali abasemakhayeni abo.
5 Ufanele uwadwelise amabuyelo kwiingxelo zakho. Ukuba akukwazi kubuyela kwindawo obufike kungekho mntu ekhaya, loo ngxelo yakho yamakhaya angenabantu ufanele uyinike umzalwana okhokela kwiqela lakho, ukuze isetyenziswe liqela elilandelayo kuloo ntsimi.
6 Ukuyinikela ingqalelo esondeleyo le nkalo yobulungiseleli bethu kunokusenza sivelise ngakumbi yaye sigcobe. Kunokusinika ulwaneliseko oluzalwa kukwazi ukuba siyacokisa ekufuneni nasekunyamekeleni ababumvu.—Hez. 34:11-14.