Landela Umzekelo Owamiselwa NguYesu
1. Nguwuphi umzekelo owamiselwa nguYesu?
1 Xa sikumsebenzi wokwenza abafundi, masihlale sikhumbula ukuba umzekelo wethu unokubachukumisa abo basibonayo. UYesu wayefundisa ngamazwi nangezenzo. Abantu ababembona bayiphawula inzondelelo yakhe, ukuthanda kwakhe abantu, umnqweno ongagungqiyo wokungcwalisa igama likaYise nokuzimisela kwakhe ukufeza ukuthanda kukaYise.—1 Pet. 2:21.
2. Umzekelo wethu unokubachukumisa njani abo sihamba nabo entsimini?
2 Xa Sishumayela Kwindlu Ngendlu: NjengoYesu, umzekelo wethu uyabachukumisa abo sisebenza nabo entsimini. Xa bebona inzondelelo yethu, abavakalisi abasebatsha nabangekabi namava batsho bacingisise ngendlela abashumayela ngayo. Xa besibona sivuya yaye sinomdla wokwenene kwabanye, oko kubakhumbuza ngokubaluleka kokuba nazo ezi mpawu kubulungiseleli babo. Xa besibona sisebenzisa iZibhalo ngamandla, sibuyela ebantwini size siqhube izifundo zeBhayibhile, nabo baya kufuna ukwenza okufanayo.
3. Umzekelo wethu unokubethelela ntoni kwizifundo zeBhayibhile, ibe zinokufunda ntoni kuwo?
3 Xa Siqhuba Izifundo ZeBhayibhile: Abo sibaqhubela izifundo zeBhayibhile bayayibona indlela esiziphethe ngayo. Ngokomzekelo, ngoxa sinokubaxelela ngokubaluleka kokulungiselela isifundo, ukujonga izibhalo, nokukrwelela iingongoma ezizintloko, bayakwazi ukubona xa silungiselele. (Roma 2:21) Ukuba siyaligcina ixesha nezithembiso zokubuyela siqhube izifundo nabo, baya kuzama ukungazivumeli ezinye izinto ziphazamise isifundo sabo seBhayibhile. Nakanjani na, baya kukubona ukuzincama kwethu ngenxa yokushumayela kuquka ukholo lwethu olomeleleyo. Yiloo nto izifundo zabantu abaxelisa umzekelo kaYesu zisoloko zisiba nenzondelelo zize zibe ngabashumayeli beendaba ezilungileyo abaphumelelayo.
4. Yintoni efundiswa ngumzekelo wethu xa sikwiintlanganiso zebandla?
4 Xa Sikwiintlanganiso Zebandla: Bonke abasebandleni lobuKristu baba nendima ekufundiseni ngomzekelo kwiintlanganiso zebandla. Abantu abanomdla abaqala ukuza kwiintlanganiso bazuza lukhulu kumzekelo omhle abawubona ebandleni. Bayalubona uthando lwabazalwana, umanyano lwamaKristu kuquka ukunxiba nokuzilungisa kwawo ngendlela endilisekileyo. (INdu. 133:1) Umzekelo wethu wokunyaniseka sibekho rhoqo kwiintlanganiso nasekuvakaliseni esidlangalaleni ukholo lwethu kuzo kuya kuphawuleka. Omnye umntu owayeze kwiintlanganiso zethu waphawula indlela intombazana eselula eyayikhawuleza ngayo ukufumana ize icaphule iindinyana zeBhayibhile kuquka indlela eyayihambisana ngayo noko kwakufundwa. Umzekelo wayo wabangela ukuba loo mntu acele ukuqhutyelwa isifundo seBhayibhile.
5. Kutheni singamele sikuthabathe lula nje ukubaluleka komzekelo esiwumiselayo?
5 IZibhalo zikhuthaza ukuba sixelise umzekelo omhle wabanye. (Fil. 3:17; Heb. 13:7) Simele sikhumbule ukuba xa siwuxelisa ngokusondeleyo umzekelo owamiselwa nguYesu, oko kuya kubonwa ngabanye ibe kunokuba nempembelelo entle kubo. Xa sikuqonda oku, siya kuwakhumbula amazwi akweyoku-1 kuTimoti 4:16 athi: “Zilumkele wena nemfundiso yakho.”