NgoNovemba Kuza Kuhanjiswa UVukani! Okhethekileyo!
1 Abantu abaninzi banemibuzo ehlala ijinga ezingqondweni zabo ephathelele ukubaluleka kweBhayibhile. Kutheni le nto kusithiwa liLizwi likaThixo, kanti ibhalwe ngabantu? Kutheni ndifanele ndiyithembe ukuba iya kuwalathisa amanyathelo am? Ndiya kufumana ntoni xa ndinokwenza umgudu ndize ndichithe ixesha ndifunda iBhayibhile? Yiyiphi inguqulelo yeBhayibhile endifanele ndiyisebenzise? Le yeminye yemibuzo ephendulwayo kuVukani! okhethekileyo kaNovemba onomxholo othi “Ngaba Unokuyithemba IBhayibhile?”
2 Msasaze kakhulu lo Vukani! ukhethekileyo kwintsimi yebandla lakho. Ukuba kunokwenzeka, yiya kwindlu ngendlu nebandla lakho rhoqo ngeMigqibelo kaNovemba. Lo Vukani! mbonise izihlobo, abamelwane, abantu osebenza nabo nofunda nabo, ootitshala namabuyelo akho. Xa usiya ezivenkileni naxa uthatha uhambo, phatha iikopi. Iofisi yesebe iza kunithumelela iikopi ezongezelelekileyo ukuze ibandla lenu libe nesixa esaneleyo.
3 Qalisa Isifundo SeBhayibhile: Xa uhambisa eli phephancwadi, unokubeka nesiseko sokuqhuba isifundo seBhayibhile ngaphambi kokuqukumbela intshumayelo yakho. Ngokomzekelo, unokuthi, “Xa ndibuyayo, ndingathanda ukukubonisa indlela iBhayibhile ewuphendula ngayo umbuzo othi, ‘Yintoni injongo kaThixo ngomhlaba?’” Xa ubuyela kuye mphathele incwadi ethi Okufundiswa YiBhayibhile uze ubonise umninimzi iphepha lesi-4 ukuya kwelesi-5, okanye nixubushe isahluko sesi-3, isiqendu soku-1 ukuya kwesesi-3. Kungenjalo unokuthi, “Xa ndibuyayo, ndiza kukuchazela ngesiprofeto seBhayibhile esizalisekayo sithethanje.” Xa ubuyela kuye, mbonise isahluko se-9 sale ncwadi uze uxubushe naye isiqendu soku-1 ukuya kwesesi-3. Okanye ke unokumchazela oku umninimzi: “Abantu abaninzi bathi kunzima ukufunda iBhayibhile. Xa ndibuyayo ke ndiza kukubonisa indlela onokuyiqonda bhetelana ngayo iBhayibhile yakho.” Xa ubuyela kuye, mphathele incwadi ethi Okufundiswa YiBhayibhile, uze umbonise indlela esiqhutywa ngayo isifundo.
4 YiBhayibhile kuphela equlethe “imibhalo engcwele,” ekwaziyo ‘ukusinika ubulumko obusa elusindisweni.’ (2 Tim. 3:15) Ngoko ke, sonke masibe negalelo elikhulu ekusasazeni lo Vukani! ukhethekileyo ukuze kuncedwe abantu bayithembe iBhayibhile!