Hlala Uyikhumbula Imini KaYehova
1 “Imini enkulu kaYehova ikufuphi. Ikufuphi, yaye ikhawuleza kakhulu.” (Zef. 1:14) UZefaniya nabanye ekuthiwa ngabaProfeti Abancinane abali-11 bahlala beyikhumbula imini kaYehova. Ukufunda imibhalo yabo ephefumlelweyo kwiSifundo Sencwadi Sebandla njengoko ibhalwe kwincwadi ethi Hlala Uyikhumbula Imini KaYehova kuya kusinceda siyilungele loo mini yoyikekayo.—Zef. 2:2, 3.
2 Izinto Ebalasele Ngazo: Kunokuba ixubushe iintsingiselo zezinto ezifuziselayo okanye icacise indinyana nganye yeencwadi zaba baprofeti bali-12, le ncwadi ithi Imini KaYehova ichaza indlela le mibhalo iphefumlelweyo esebenza ngayo kubomi bethu. Ibethelela ukuba simele sihlale sikhumbula ukuba imini kaYehova ikufuphi, yaye loo nto ifanele ibonakale kwindlela esenza ngayo izigqibo nakwindlela esenza ngayo izinto. Ithetha ngemicimbi yobomi bentsapho, ulwalamano lwethu namanye amakholwa, iindlela zokuzonwabisa esizikhethayo, ubulungiseleli bethu nezigqibo esizenzayo ngokuphathelele umsebenzi.
3 Icandelo loku-1 lale ncwadi lisithela vandla ngaba baprofeti bali-12 nangeencwadi zabo. Babengabantu abanjani? Ubomi babo bufana njani nobethu namhlanje? Icandelo lesi-2 lithetha ngoYehova neempawu zakhe. Aba baprofeti basifundisa ntoni ngoYehova nangobuntu bakhe? Icandelo lesi-3 lithetha ngendlela esiziphatha ngayo nesibaphatha ngayo abanye. Ziziphi iindlela esinokumkholisa ngazo uThixo? Icandelo lesi-4 lichaza indlela esinokuhlala ngayo sonwabile ngoxa silinde imini kaYehova.
4 Ceba Kwangoku Ukuze Uzuze Kule Ncwadi: Zimisele kwangoku ukuze uzuze ngokupheleleyo kwisifundo sencwadi ethi Imini KaYehova, esiya kuqala ngeveki ka-Agasti 4, 2008! Ceba ukubakho kwiSifundo Sencwadi Sebandla veki nganye. Lungiselela kakuhle isifundo ngasinye, ufunde izibhalo ukuze ubone indlela ezingena ngayo kuloo mbandela ufundwayo. Camngca ngawo ngokuzibuza lo mbuzo, ‘Ndinokuyisebenzisa njani le nkcazelo ekhaya, esikolweni, emsebenzini, entsimini naxa ndisebenzisana namanye amaKristu?’ Yiza kwisifundo sencwadi ulungele ukugqabaza uze ukhuthaze abanye.—Roma 1:12.
5 Ngamana ukufunda kwethu incwadi ethi Imini KaYehova kungasinceda ngoku ‘simelane nemini kaYehova enkulu eyoyikeka kakhulu.’ Loo mini ayifikanga igalelekile!—Yow. 2:11.