Ngaba Uyisebenzisa Ngokupheleleyo?
1 “Ingathi alisafiki ithuba lokuba ndiyisebenzise entsimini!” Watsho njalo omnye udade emva kokufunda IMboniselo kaJanuwari 1, 2008. Ngaba ukhe wacinga ngezinye izinto ezisoloko zibakho kuhlelo lukawonke-wonke, yaye ngaba uyayazi indlela yokuzisebenzisa kakuhle entsimini?
2 “Oko Sikufunda KuYesu”: Mhlawumbi eli nqaku liye lakunceda waqalisa izifundo zeBhayibhile. Ukuba akukalisebenzisi, zama ukufundela umninimzi eli nqaku uze umbonise oko kwathethwa nguYesu ngombandela lowo, okuchazwe kwisiqendu sokuqala. Xa umntu enomdla, zama ukuqhubeka nengxubusho usebenzisa imixholwana, eyenziwe yaba yimibuzo eyenza umntu ukuba acinge. Mkhuthaze ayiphendule. Yithi gqaba gqaba ucacise nawuphi na umfanekiso onento yokwenza nombandela, uze udlulele kwisiqendu esilandelayo. Unokukwazi ukufunda inxalenye yokuqala yeli nqaku kutyelelo lokuqala uze ufunde inxalenye eseleyo xa ubuyela. Lungiselela ukuqhubeka nesifundo kwincwadi ethi Okufundiswa YiBhayibhile.
3 “IIndlela Zokwenza Intsapho Yonwabe”: La manqaku, abakho emva kweenyanga ezintathu, enzelwe ukunceda abayeni, amakhosikazi nabazali babone indlela abanokuyisebenzisa ngayo imigaqo yeBhayibhile xa kukho iingxaki ezibangela iingxabano entsatsheni. Ninokusebenzisa kwala manqaku ukunceda abantu abangengomaNgqina babone ubulumko obuseBhayibhileni.—2 Tim. 3:16, 17.
4 Amanqaku Abantu Abaselula: Icandelo elithi “Inqaku Labaselula” linamanqaku abandakanya umfundi anokusetyenziswa ukucacisa ingxelo yeBhayibhile. La manqaku unokuwasebenzisa ukunceda ulutsha odibana nalo entsimini ukuba lubone ukubaluleka kokufunda iLizwi likaThixo. (INdu. 119:9, 105) Xa uthetha nabazali, unokuhlala kakhulu kumanqaku athi “Fundisa Abantwana Bakho,” abakho kwezinye iinkupho. La manqaku anokunceda abantwana abaselula ukuba bafunde izinto ezibalulekileyo kubantu abaseBhayibhileni. Ngaba uyawafunda nabantwana bakho?
5 Amanye Amanqaku: Nyanga nganye, inqaku elithi “Imibuzo Yabafundi” lixubusha imibandela abantu abafuna ukuyazi. Unokuthetha ngeli nqaku xa uhambisa eli phephancwadi kwindlu ngendlu. Inqaku elithi “Ileta Evela . . . ” lineengxelo ezichaza iingxaki ababa nazo abavangeli basemazweni nabanye kubulungiseleli babo. La manqaku anokunceda abantu abanomdla babone ukuba iindaba ezilungileyo zishunyayelwa ehlabathini jikelele, ukuze kuzaliseke umqondiso wobukho bukaKristu.—Mat. 24:3, 14.
6 Inqaku eliphuma nyanga nganye elithi “Sondela KuThixo,” elisekelwe kufundo lweBhayibhile lweSikolo Sobulungiseleli Sobuthixo, linokwenza umntu onyanisekileyo afune ukufunda ngakumbi ngoYehova. Amanqaku athi “Xelisani Ukholo Lwabo,” abakho kane ngonyaka, enzelwe ukunceda abantu babe nomfanekiso ngqondweni wabantu abaseBhayibhileni, nto leyo eyenza ukuba bona—ukhetho lwabo, iingxaki nokholo lwabo—babe ngabantu bokwenene kubafundi bale mihla.
7 Kusivuyisa ngokwenene ukufumana inkupho yeMboniselo elungiselelwe intsimi nyanga nganye! Masiqiniseke ukuba siyifunda ngokucokisekileyo yaye siyisebenzisa ngokupheleleyo entsimini.