“Ukunikela Ubungqina Obucokisekileyo”—Kwizakhiwo Ezikhuselweyo Naseziflethini
1. Kubandakanya ntoni “ukunikela ubungqina obucokisekileyo kwiindaba ezilungileyo”?
1 Njengompostile uPawulos, umnqweno wethu ‘kukunikela ubungqina obucokisekileyo kwiindaba ezilungileyo.’ (IZe. 20:24) Ngenxa yoko sizama ukuba isigidimi soBukumkani sifikelele kubantu abaninzi kangangoko kwintsimi yethu. Oku kuquka abantu abaninzi abahlala kwizakhiwo ezikhuselweyo, eziflethini, nakwizitrato ezineegeyithi ezigadwayo. Maxa wambi, kunokuba nzima ukufikelela kwabo bahlala kwizakhiwo ezinjalo. Ngenxa yokuba bebaninzi abantu abahlala kwizakhiwo ezikhuselweyo naseziflethini, sinokufumana amathuba amaninzi okusasaza iindaba ezilungileyo kubo.
2. Kutheni kubalulekile ukubonakalisa ukuqonda nokwenza izinto ngobulumko xa sishumayela kwizakhiwo ezikhuselweyo naseziflethini?
2 Ngenxa yolwaphulo-mthetho nogonyamelo, iiflethi ezininzi ziyatshixwa kwaye zinabalindi okanye zineekhamera. (2 Tim. 3:1, 2) Abanini zakhiwo basenokubeka umthetho othi bangavunyelwa ukuba bangene ngaphakathi abantu abangamenywanga. Imaneja isenokucela ukuba siphume, ngakumbi xa omnye wabahlali ekhalaza. Ngoko ke, kubalulekile ukubonakalisa ukuqonda nokwenza izinto ngobulumko.
3. Liliphi elona xesha lifanelekileyo lokushumyela eziflethini, yaye ngoba?
3 Ixesha Elifanelekileyo: Njengokuba kunjalo nakwezinye iindawo, kunconyelwa ukuba kushunyayelwe ngamaxesha ababakho ngawo abaninimzi. Basenokungasithembi xa sishumayela abaninimzi bengekho. Abavakalisi abaninzi baye babafumana abantu xa besiya ngamarhatya nasemva kwemini ngeMigqibelo nangeeCawa. Ukuya ekuseni kakhulu, ingakumbi ngeempela-veki, kunokwenza abaninimzi bakhalaze kwimaneja.
4, 5. Sinokungena njani kwizakhiwo okanye kwiiflethi ezitshixwayo?
4 Ukungena Kwizakhiwo: Abavakalisi abamele badibane nemaneja okanye nabani na osebenza kwezi zakhiwo phambi kokushumayela khona. Ukuba isakhiwo esitshixwayo sine-intercom, sinokuyisebenzisa ukuze sifumane umntu ovumayo ukuba sithethe naye. Kuxhomekeka kuhlobo lwesakhiwo okanye iiflethi, sinako ukungena kwigumbi ngalinye emva kokuthetha nomntu osinike imvume yokungena. Kodwa ke, ngamanye amaxesha, kububulumko ukuphumela ngaphandle uze usebenzise i-intercom kwakhona ukuze uthethe nomntu okwindlu elandelayo. Simele sisebenzise ubulumko xa sigqiba ngokuba bangaphi abantu esiza kuthetha nabo ngale ndlela kutyelelo olunye.
5 Abanye basenokukhetha ukuba ubachazele kwi-intercom ngesizathu sokubatyelela. Ukuba kunjalo, zazise ngendlela ebonisa ubuhlobo. Libize igama lomninimzi ukuba libhaliwe kuluhlu labantu abahlala apho. Ngokufutshane, mchazele ngombandela othetha ngawo. Abanye baye baphumelela xa befunda ngokungqalileyo kwincwadi Ukuqiqa.
6. Simele senze ntoni xa sishumayela kwizakhiwo ezinabalindi?
6 Ukuba isakhiwo sinomlindi ongavumiyo ukuba singene, sinokuzama ukunikela ubungqina kuye. Abalindi abaninzi bayakuvuyela ukufunda uncwadi lwethu. Sinokude sikwazi ukuqalisa size siqhube isifundo seBhayibhile kwigumbi lokungena. Ukuba umlindi uyasivumela ukuba sityelele umntu obekhe wanomdla, kungakuhle ukuba eli lungelo singalisebenzisi kakubi ngokuthi sinkqonkqoze nakweminye iminyango.
7. Yintoni esimele siyikhumbule ngeebhegi zethu zentsimi?
7 Inkangeleko Nendlela Esizihombisa Ngayo: Ukuphatha iibhegi ezinkulu kusenza sibonakale siseza. Ngoko ke, sinokucinga ngokuphatha ibhegi encinane okanye singayiphathi kwaukuyiphatha. Abanye abavakalisi bafaka iimpapasho zabo kwifayile encinane baze bayiphathe ngesandla okanye bayifake epokothweni iBhayibhile.
8. Lifanele lilungelelaniswe njani iqela eliza kushumayela eziflethini?
8 Kungakuhle ukuba singemi ndawonye siliqela elikhulu, ingakumbi kwigumbi lokungena kwisakhiwo okanye kwindawo zokupaka iimoto, kuba oko kunokusitsalel’ amehlo. Kufuneka silumke xa sishumayela kwiiflethi ezikwindawo apho ulwaphulo-mthetho luphezulu. (IMize. 22:3) Ngokomzekelo, amaqela amabini okanye amathathu anokushumayela kumgangatho omnye, mhlawumbi etshintshisana ngezindlu ngoxa amanye elinde ngaphandle.
9. Sinokuyibonakalisa njani imbeko, yaye kutheni oko kubalulekile?
9 Xa ungena kwisakhiwo seeflethi, sula iinyawo zakho uze uqiniseke ukuba uwuvalile umnyango. Ngokubonakalisa imbeko elolo hlobo, siya kunciphisa izikhalazo ezivela kubahlali. Xa sele ungaphakathi, ngqala kwilifti okanye kumgangatho omele ushumayele kuwo kunokuba ungqunge esangweni. Oku kuya kuphelisa nawuphi na umrhano okhoyo kwabasijongileyo.
10. Sinokukuphepha njani ukwenza ingxolo ngokungeyomfuneko ezipasejini?
10 Kwizakhiwo zeeflethi ezininzi, ingxolo ivakala kakhulu ezipasejini. Ngoko ke, sukukhwaza ngokungeyomfuneko, thethela ukuba uviwe kakuhle ngumninimzi. Xa uthetha nabanye abavakalisi, thethela phantsi ngelizwi elizolileyo ukuze ungarhanelwa. Ukuze bangaphazamisi abahlali, abanye abavakalisi basenokuqala kwizindlu ezisemacaleni de bawugqibe umgangatho, endaweni yokunkqonkqoza kwiminyango elandelelanayo. Ukongezelela, ukunkqonkqoza ngathi ulipolisa kunokubothusa abaninimzi.
11. Ngawaphi amacebiso onokuwasebenzisa xa unkqonkqoza kwiminyango enemingxuma yokukroba?
11 Ukuba umnyango unomngxuma wokukroba, yima ngendlela eza kwenza ukuba ubonwe wena kunye nalowo uhamba naye. Wujonge lo mngxuma, xa ubona ukuba kukho umntu okujongileyo, bulisa ngobubele uze uqalise ukushumayela. Ukuba uyabuza esithi, ‘Ngubani lowo?’ mchazele igama lakho nelomntu ohamba naye. Kunokutsho kube lula kumninimzi ukuba anivulele umnyango. Ukuba akanivuleli, usenokuqalisa ukunikela isigidimi ngoxa umi ngaphaya komnyango.
12. Sinokuziphepha njani iingxaki xa sishiya uncwadi kwimizi engenabantu?
12 Xa kungekho Mntu: Esona sikhalazo sixhaphakileyo kubaphathi bezakhiwo kukuba kuye kufuneke ukuba bachole uncwadi ezipasejini okanye ebaleni. Uncwadi olushiywe emnyango lunokuwela phantsi lula luze lube yinkunkuma. Ngoko ke, naluphi na uncwadi olushiywe kwimizi engenabantu lumele lubekwe kwindawo olungenakubonwa lula kuyo ngabantu abadlulayo.
13. Simele senze ntoni xa sidibana nomninimzi onomsindo?
13 Abaninimzi Abanomsindo: Xa sidibana nomninimzi onomsindo ofuna ukubiza umphathi, kungakuhle ukuwushiya loo mgangatho uze ubuyele kuwo ngelinye ixesha. Kwezinye iimeko, kububulumko ukusishiya eso sakhiwo uze uphephe ukuxambulisana nomphathi. Nokuba akatsho ukuba ungaphinde ubuyele, kungakuhle ukuba ubhale inombolo yaloo flethi, uze kwikhadi lentsimi uyiphawule njengengatyelelwayo. Njengokuba kunjalo nakweminye imizi engatyelelwayo, le mizi imele ityelelwe ngabadala ngamaxesha athile ukuze bahlole uluvo lomninimzi.
14, 15. Simele senze ntoni ukuba sicelwa ukuba sihambe ngumntu osebenza kwisakhiwo?
14 Xa Ugxothwa: Ukuba ucelwa ukuba uhambe ngumphathi, ngabalindi, ngabantu abalungisayo okanye nguye nawuphi na umntu osebenza apho ngoxa usashumayela, kububulumko ukuba uhambe ngoko nangoko. Ukuba kunokwenzeka, sifuna ukuphepha ukuxambulisana okunokuphumela ekubeni simangalelwe okanye kubizwe amapolisa. Kumaxesha amaninzi, abo basebenza kwezi zakhiwo abawachasi amaNgqina kaYehova, into nje benza umsebenzi wabo.
15 Ngamanye amaxesha, xa umntu osebenza kwisakhiwo ekucela ukuba uhambe, usenokumcacisela kakuhle ngesizathu sokutyelela kwakho eso sakhiwo. (1 Pet. 3:15) Siyayiqonda into yokuba imbopheleleko yakhe kukugcina abahlali bonwabile nendawo yabo ikhuselekile. Mhlawumbi usenokukuvumela ukuba uqhubeke usebenza okwethutyana kweso sakhiwo. Kodwa ukuba akakuvumeli, mshiye ngoxolo. Ukuba imeko iyakuvumela, usenokucela imvume yokushiya uncwadi ngamaxesha athile kwigumbi lokungena okanye apho kuhlanjelwa khona iimpahla. (Kol. 4:6) Umveleli wenkonzo umele aziswe ngelo lungiselelo.
16. Simele senze ntoni xa ingxaki ingacombululeki xa sizama ukushumayela kwisakhiwo?
16 Mhlawumbi, emva kwexesha elithile, abavakalisi basenokuphinda bashumayele ngobulumko kweso sakhiwo. Kodwa ke, ukuba kusekho ingxaki, abadala bamele baqhagamshelane nesebe ukuze bacele uncedo kunokuba abavakalisi bazame ukuyilungisa ngokwabo le meko. Ukuba abavakalisi abakwazi kushumayela kwezo flethi okanye eso sakhiwo sikhuselweyo, kusenokuzanywa ezinye iindlela zokufikelela abo bahlala kuzo, mhlawumbi ngefowuni okanye babhalelwe iileta. Abanye abavakalisi baye bahambise amaphephancwadi ngaphambili okanye kufuphi neso sakhiwo kusasa xa kusiyiwa emsebenzini okanye ngokuhlwa xa abahlali bebuyela emakhaya.
17. Kutheni ukushumayela kwizakhiwo, kwiiflethi nakwizitrato ezineegeyithi kubalulekile?
17 Isiphelo sale nkqubo yezinto sisondele. Ngabo babiza egameni likaYehova kuphela abaya kusindiswa. “Noko ke, baya kubiza njani na kulowo bangakholwanga kuye? Baya kukholwa njani na kulowo bangevanga ngaye?” (Roma 10:13, 14) Baninzi ‘abanotyekelo olufanelekileyo ngobomi obungunaphakade’ abahlala kwizakhiwo, kwiiflethi, nakwizitrato ezineegeyithi. (IZe. 13:48) Ngokusebenzisa ukuqonda nobulumko, sinako ukubafikelela ngeendaba ezilungileyo.