Ibhokisi Yemibuzo

◼ Yintoni ofanele uyenze xa uyalelwa ukuba uyeke ukushumayela?

Kukhe kwenzeke ukuba amapolisa aye kubavakalisi abasentsimini, aze abachazele ukuba bophula umthetho, aze abayalele ukuba bayeke. Ngokukhawuleza nangokuzola hamba kuloo ntsimi xa uyalelwe njalo. (Mat. 5:41; Fil. 4:5) Mus’ ukuzama ukulungisa izinto ngokwakho ngokuphikisana nawo ngamalungelo asemthethweni esinawo. Ukuba kunokwenzeka, ngobuchule cela inombolo yebheji negama lesikhululo selo polisa. Emva koko, chazela abadala ngokukhawuleza, ibe bona baya kuqhagamshelana neofisi yesebe ngeso siganeko. Ngokufanayo, ukuba ucelwa ukuba uphume kwisakhiwo ekuhlala abantu kuso ngumphathi okanye nguye nawuphina umntu osebenza apho, ufanele uhambe ngoko nangoko uze wazise abadala. Ukuba nobulali nokuthobeka xa uthetha nabasemagunyeni kunokukunceda uphephe iingxaki ezingeyomfuneko.—IMize. 15:1; Roma 12:18.