Fundisa Abo Bangakwaziyo Ukufunda Kakuhle
1. Luluphi ucelomngeni esinokuhlangabezana nalo xa sisentsimini?
1 Xa sisentsimini, siye sihlangabezane nocelomngeni lokufundisa inyaniso kubantu abangakwaziyo ukufunda kakuhle. Sinokwenza ntoni?
2. Sibahlonela ngayiphi indlela abantu abangakwaziyo ukufunda kakuhle, yaye ngoba?
2 Hlonela Isidima Sabo: Eyona nto ibalulekileyo kuYehova asiyomfundo anayo umntu, yintliziyo yakhe. (1 Sam. 16:7; IMize. 21:2) Ngoko ke, asibajongeli phantsi abantu abangakwazi ukufunda kakuhle. Kulula kubantu abanjalo ukwamkela uncedo lwethu xa sibahlonela kwaye sinomonde. (1 Pet. 3:15) Oku kusenokuquka ukuba singamnyanzeli loo mntu ukuba afunde iziqendu. Njengoko esenza inkqubela ekufundeni inyaniso eseBhayibhileni, usenokuba nomdla wokuphucula indlela afunda ngayo ukuze akwazi ukuvuyiswa kukufunda iLizwi likaThixo “ngesandi esiphantsi imini nobusuku.”—INdu. 1:2, 3.
3. Yiyiphi indlela enokusetyenziswa ukuze kufundiswe abo bangakwaziyo ukufunda kakuhle?
3 Iindlela Zokufundisa Xa Uqhuba Izifundo ZeBhayibhile: Ukusebenzisa imifanekiso kuyindlela entle yokufundisa nokubanceda bangalibali. Usenokumbuza loo mntu umfundelayo ngoko akubona kwimifanekiso ekwincwadi eniyisebenzisayo. Uze usebenzise imibuzo engqalileyo ukuze umncede aqonde oko kufundiswa ngumfanekiso. Sebenzisa izibhalo ezifundisa ngeenkalo ezithile zomfanekiso. Le mifanekiso inokusetyenziswa naxa kusenziwa impinda. Ungafundisi izinto ezininzi ngexesha elinye. Bethelela umxholo neengongoma eziphambili, uze ukuphephe ukufakelela izinto ezingeyonxalenye yesifundo. Funda izibhalo ngokusuka eBhayibhileni, uze usebenzise imibuzo ukuqinisekisa ukuba isifundo siyakuqonda oko bekufundwa. Oku kusenokwandisa umdla waso wokufuna ukuphucula indlela yokufunda, size siziphandele ngokwaso inyaniso eseBhayibhileni.
4. Sinokumnceda njani umntu esimfundelayo aphucule indlela afunda ngayo?
4 Uncedo Lokuphucula Indlela Yokufunda: Abantu abangakwazi kakuhle ukufunda okanye abantu abangakhange bafumane mathuba aneleyo okufunda ukulesa ngokutyibilikayo basenokukuqonda baze bakukhumbule kakuhle oko bakufundileyo. Unokubakhuthaza abanjalo ukuba basebenzise iimpapasho zethu ezirekhodiweyo. Ukuphulaphula impapasho erekhodiweyo ngoxa ejonge kwikopi ebhaliweyo, mhlawumbi awaphinde amagama awevayo ngesandi esiphantsi, kunokumnceda aphucule indlela yokufunda. Unokuyifumanisa iluncedo incwadana ethi, Zibhokoxe Ekuleseni Nasekubhaleni. Kwezinye iindawo, abadala banokulungiselela ukuba kubekho iiklasi zokufunda ebandleni. Xa silandela la macebiso sinokukwazi ukunceda abantu abangakwaziyo ukufunda kakuhle baqonde “imibhalo engcwele,” enokubanika ubulumko obusa elusindisweni.—2 Tim. 3:15.