Indlela Yokunceda Abo Bangakwaziyo Ukufunda

1. Luluphi ucelomngeni lokufundisa abo bangakwaziyo ukufunda?

¹ Abaninimzi abangakwaziyo ukufunda banokuba nomdla wokufunda iBhayibhile kunye nathi, kodwa inokuboyikisa iBhayibhile nezinye iincwadi. Ukubanika incwadi ethi Okufundiswa yiBhayibhile kwasekuqaleni kusenokungaphumeleli. Sinokubanceda njani abantu abanjalo? Siye sabuza abavakalisi abanamava abakumazwe angaphezu kwayi-20 awahlukahlukeneyo ukuba benza njani. Nanga amacebiso abo.

2. Ziziphi izixhobo eziluncedo xa ufunda nomntu ongakwaziyo ukufunda?

² Ukuba umfundi akakwazi kufunda kakuhle okanye akakwazi kwaphela, usenokuqala ngencwadana ethi Phulaphula UThixo Uze Uphile Ngonaphakade. Iofisi yesebe yaseKenya ithi esi sixhobo besiluncedo gqitha kuba ama-Afrika afundisa ngokubalisa amabali kungekhona ngemibuzo neempendulo. Ngoxa kunokuba lula ngabantu abafundileyo ukufundiswa ngokufunda nokubuzwa imibuzo, le ndlela inokumenza angakhululeki umntu ongafundanga. Xa umfundi ekwazi ukufunda, abavakalisi abaninzi bayakuthanda ukuqala ngencwadana ethi Iindaba Ezilungileyo Ezivela KuThixo!, Unako Ukuba Ngumhlobo KaThixo! okanye ethi Incwadi Yam Yamabali EBhayibhile.

3. Yintoni eya kusinceda siphumelele xa sifundisa abo bangakwaziyo ukufunda?

³ Ncoma: Abo bangakwaziyo ukufunda banokuziva behlazekile, yaye abaninzi abazithembanga. Ukubenza bakhululeke yinto yokuqala eya kubanceda bafunde inyaniso. Inkoliso yabantu abangakwaziyo ukufunda bakrelekrele yaye bayafundiseka. Baphathe ngentlonelo nesidima. (1 Pet. 3:15) Baya kukhuthazeka baze baqhubeke nesifundo xa bebona imigudu yabo iphumelela yaye besenza inkqubela. Qhubeka ubancoma.

4. Sinokubakhuthaza njani abo bangakwaziyo ukufunda kakuhle ukuba balungiselele isifundo?

⁴ Nokuba umfundi akakwazi kakuhle ukufunda, mkhuthaze ukuba asilungiselele isifundo sakhe. Abanye abavakalisi eMzantsi Afrika bakhuthaza izifundo zabo ukuba zicele ilungu lentsapho okanye umhlobo okwaziyo ukufunda ukuba azincede. Omnye umvakalisi waseBritani ukhuthaza izifundo zakhe ukuba zilungiselele ngokuzivumela ukuba zifunde eyakhe incwadi kwiziqendu ezimbalwa xa eqhuba isifundo, ukuze zibone ukuba kulula ukufumana iimpendulo xa zikrwelelwe. Omnye umzalwana wase-Indiya ukhuthaza izifundo zakhe ukuba zijonge imifanekiso kwisifundo seveki ezayo zize zicamngce ngayo.

5. Unokuwubonisa njani umonde xa uqhuba isifundo?

⁵ Yiba Nomonde: Enokuba yiyiphi incwadi oyisebenzisayo, gxininisa iingongoma eziziintloko, uze usincede isifundo sakho siziqonde. Ekuqaleni, kunokuba kuhle ukuba neengxubusho zemizuzu eyi-10 ukuya kweyi-15. Musa ukuzama ukugubungela umbandela omninzi, mhlawumbi ingaziziqendu ezimbalwa sihlandlo ngasinye. Yiba nomonde ukuba isifundo siyacotha xa sifunda. Siya kukhuthazeka ukuba siphucule njengoko sisiya simthanda uYehova. Ukuze usincede isifundo sakho sikwenze oku, kuhle ukusikhuthaza ukuba siye kwiintlanganiso kwasekuqaleni.

6. Sinokubanceda njani abantu bafunde ukufunda?

⁶ Ukuba izifundo zeBhayibhile zifunda ukufunda, ziyakwenza inkqubela ngokukhawuleza. (INdu. 1:1-3) Abaninzi baye banceda izifundo zabo ngokusebenzisa incwadi ethi Zibhokoxe Ekuleseni Nasekubhaleni, imizuzu nje embalwa emva kwesifundo ngasinye. Ukuba isifundo siyadimazeka, mhlawumbi ungasikhuthaza ngokusichazela izinto esikwazileyo ukuzifunda. Siqinisekise ukuba uYehova uya kuyisikelela imigudu yaso, uze usikhuthaze ukuba sithandazele uncedo. (IMize. 16:3; 1 Yoh. 5:14, 15) EBritani, abanye abavakalisi bakhuthaza izifundo zabo ukuba zizibekele usukelo ezinokulufikelela, mhlawumbi ziqale ngokufunda oonobumba, zize emva koko zifunde izibhalo ezithile, ekugqibeleni zifunde iincwadi ezilula zeBhayibhile. Ubukhulu becala, ukufundisa abantu ukufunda kudla ngokufuna ubakhuthaze bafune ukufunda, ungapheleli nje ekubafundiseni.

7. Kutheni singamele sithandabuze ukubafundisa inyaniso abo bangakwaziyo ukufunda?

⁷ UYehova akabajongeli phantsi abantu abangenamfundo. (Yobhi 34:19) UYehova ukhangela intliziyo yomntu. (1 Kron. 28:9) Musa ukuthandabuza ukubafundisa inyaniso abo bangakwaziyo ukufunda. Unezixhobo ezisemagqabini onokuqalisa ngazo. Ekugqibeleni isifundo ungasitshintshela kwincwadi ethi Okufundiswa yiBhayibhile ukuze usincede siziqonde kakuhle iZibhalo.