Ucwangciso Lwendibano Yosuku Olunye Yowama-2010
1. (a) Yiyiphi imixholo yendibano yosuku olunye esekelwe eZibhalweni eye yaxutyushwa kwiminyaka yakutshanje? (b) Ngaba zikho ezinye zeembalasane zendibano edluleyo yosuku olunye eziye zakunceda kubulungiseleli bakho?
1 ‘Qinisekani Ngezinto Ezibaluleke Ngakumbi,’ ‘Yimani Niqinile njengomhlambi Omnye,’ ‘Qhubeka Unikela Ubungqina Kuyo Inyaniso,’ nothi ‘Siludongwe—UYehova NguMbumbi Wethu.’ (Fil. 1:9, 10, 27; Yoh. 18:37; Isa. 64:8) Le yeminye yemixholo kwemininzi exutyushwe kwiindibano zosuku olunye ezidlulileyo. Ngaba uzimisele ukuya kwindibano yosuku olunye yonyaka wenkonzo wama-2010? Iza kuba nomxholo othi: “Ixesha Eliseleyo Lifinyele,” isekelwe kweyoku-1 kwabaseKorinte 7:29.
2. Sinokubenza njani abantu babe nehlombe ngale ndibano?
2 Qalisani ukwenza abantu babe nehlombe ngendibano yosuku olunye ngokukhawuleza emva kokuba usuku lwayo luye lwachazwa ebandleni. Abanye abazali banceda abantwana babo bakhangele phambili endibanweni ngokubhala usuku lwendibano kwikhalenda, kunye noluhlu lwezinto abaza kuzisebenzisa, baze babale iintsuku eziseleyo. Ebudeni bengokuhlwa yoNqulo Lwentsapho, nisenokwenza impinda yendibano yosuku olunye edlulileyo. Kwakhona unokulungisa intliziyo yakho ngokusebenzisa incwadi ethi Zuza Kwimfundo YeSikolo Sobulungiseleli Sobuthixo, kwiphepha 13-16, ukuze wena nentsapho yakho ‘ninikel’ ingqalelo kwindlela eniphulaphula ngayo.’—Luka 8:18.
3. Sinokuzuza njani ngokupheleleyo koko siza kukufundiswa?
3 Sebenzisa Oko Ukufundayo: Amazwi aqhelekileyo adla ngokuthethwa emva kwendibano ngala, “Ibisemagqabini ke le ndibano!” Oko kusoloko kuyinyaniso, njengokuba eli ilelinye lamalungiselelo avela kuYehova. (IMize. 10:22) Ukuze loo nkcazelo ibe nemiphumo, kufuneka ucamngce ngayo uze uyisebenzise. (Luka 8:15) Ngoxa nibuyela ekhaya ziphen’ ixesha lokuxubusha ngocwangciso lwendibano njengentsapho okanye abo uhamba nabo ngemoto. Xubushani ngosukelo eninalo nangeengongoma eziya kuninceda kubulungiseleli benu. Ukwenza ngolo hlobo kuya kuninceda ningenelwe kule nkcazelo nasemva kokuba indibano igqithile.—Yak. 1:25.
4. Kutheni le ndibano iza kuba yekhethekileyo kuthi?
4 Sisoloko siziva sikhethekile xa sifumana isipho ebesisifuna. Ngaba asikulangazeleli oko uYehova asibekele kona kwindibano yosuku olunye elandelayo? Sinokuqiniseka ukuba iya kusinceda ngandlela zonke. Sinokulindela ukufumana kuBawo wethu wasezulwini, uYehova, isipho esilungileyo sokusikhuthaza nokusiqeqesha siqhubeke nomsebenzi asinike wona.—2 Tim. 4:2; Yak. 1:17.