Ucwangciso Olutsha Lwendibano Ekhethekileyo Yosuku Olunye
“Yibani Ngabakhule Ngokupheleleyo Emandleni Okuqonda,” lowo ngumxholo wendibano ekhethekileyo yosuku olunye eqalisa ngoSeptemba 2000. (1 Kor. 14:20) Kutheni kubalulekile ukuba sibekho? Siphila kwihlabathi elizaliswe bububi. Ukuze sixhathise oku, kufuneka sikhulise amandla ethu okomoya okuqonda ukuze seyise okubi ngokulungileyo. Oku koko indibano ekhethekileyo yosuku olunye eza kusinceda ukuba sikwenze.
Kucwangciso lokuvula, umveleli wesiphaluka uya kuxubusha “Iindlela Zokusinceda Sikhule Ngokupheleleyo Ekuqondeni IBhayibhile.” Uza kusibonisa indlela yokuqina kukholo lobuKristu. Isithethi esityeleleyo siya kubalaselisa indlela ekubaluleke ngayo ukusebenzisa imigaqo yeBhayibhile ekukhuliseni umdla wokwenene, njengokuba sithetha ngomxholo othi “Khusela Ubumoya Bakho Ngokuqeqesha Amandla Akho Okuqonda.”
Abantu abaselula nabo bamele bakhulise amandla okuqonda. Le iya kube ixutyushwa kwinxalenye ethi “Isizathu Sokuba Sibe Ziintsana Ebubini” nethi “Ulutsha Oluzuza Ukuqonda Ngoku.” Phulaphula ulutsha lubalisa ngoko lukwenzayo ukuze luzikhusele ngokomoya nokuze lulawule nakuphi na ukufuna ukwazi imisebenzi engendawo yehlabathi luze luphephe inkathazo.
Siza kulufumana njani ulonwabo lokwenene ebomini? Isithethi esityeleleyo siya kukuchaza oku kwintetho yokuqukumbela ethi “Ngenelwa Ngokusebenzisa Imigaqo YeBhayibhile Ngokuqonda.” Siza kunikela imizekelo eza kubonisa ukuba ukusebenzisa iLizwi likaThixo kuyasinceda silungise iingxaki, senze izigqibo size singenelwe ngokupheleleyo koko asifundisa kona uYehova.
Abo banqwenela ukufuzisela ukuzahlulela kwabo kuThixo ngokubhaptizwa emanzini kule ndibano bafanele bazise umveleli owongamelayo ngokukhawuleza kangangoko kunokwenzeka. Phawula ikhalenda yakho ngokukhawuleza lwakuba usuku lwendibano ekhethekileyo yosuku olunye lwazisiwe, uze wenze amalungiselelo aqinisekileyo ukuze ungenelwe kolu cwangciso lutyebileyo. Musa ukuphoswa yiyo nayiphi na inxalenye yendibano yosuku olukhethekileyo! Iya kukomeleza unyamezele le nkqubo ingendawo uze uhlale uthembekile kuYehova.