“Emoyeni Ke Vuthani”
1. Ziziphi iinkalo ezifanele zibalasele kumsebenzi wethu wokushumayela?
1 Ayikho inkalo yobulungiseleli bethu efanele ime ndawonye. Kunoko, sikhuthazwa ukuba ‘sivuthe emoyeni’ nokuba sibe “ngamakhoboka kaYehova.” (Roma 12:11) Noko ke, zininzi izinto ezinokunciphisa inzondelelo esinayo kubulungiseleli bethu. Inzondelelo nomdla esinawo kwinkonzo yoBukumkani ‘sinokuyikhwezela njani njengomlilo’?—2 Tim. 1:6, 7.
2. Lunxibelelene njani ufundisiso lweBhayibhile lobuqu nokuba nenzondelelo entsimini?
2 Isifundo SeBhayibhile Sobuqu: Umshumayeli woBukumkani ophumelelayo uthanda imithetho kaThixo kwaye uchukunyiswa ngokunzulu yinyaniso efumaneka kuyo. (INdu. 119:97) Xa sifumana ubuncwane beBhayibhile ebudeni bofundisiso lobuqu, oku kushukumisa iintliziyo zethu kuze kusenze sibe nenzondelelo engakumbi. Xa simthanda Lowo usinike inyaniso yaye sinqwenela ukuchazela abanye ngeendaba ezilungileyo, siya kumdumisa uThixo size silivakalise ekuhleni igama lakhe. (Heb. 13:15) Kucacile ukuba, ukushumayela iindaba ezilungileyo ngokunyaniseka kubonisa ukuba sizixabisa kakhulu.
3. Umoya kaThixo unokubuchaphazela njani ubulungiseleli bethu?
3 Thandazela Umoya KaThixo: Ukuphumelela kobulungiseleli akuxhomekekanga kumandla ethu. Ukuba nenzondelelo yokwenene kubangelwa kukusebenza komoya kaThixo. (1 Pet. 4:11) Ukusondela kuMthombo ‘wamandla amakhulu’ kuya komeleza ubumoya bethu kusenze sishumayele ngenkalipho. (Isa. 40:26, 29-31) Xa umpostile uPawulos wayejamelene nobunzima kubulungiseleli bakhe, ‘wazuza uncedo oluvela kuThixo.’ (IZe. 26:21, 22) Umoya oyingcwele kaYehova ohlaziyayo uya kusinceda sivuthe kubulungiseleli bethu, ngoko sifanele siwuthandazele.—Luka 11:9-13.
4. Ukuba nenzondelelo kunokuba nayiphi imiphumo emihle, yaye yintoni esifanele siyilumkele?
4 Ukuba nenzondelelo evuthayo xa sishumayela ngoBukumkani kukhuthaza namanye amaKristu ukuba abe nayo. (2 Kor. 9:2) Abantu esishumayela kubo entsimini banokuphulaphula isigidimi sethu xa sisidlulisela ngehlombe nangendlela eyeyisayo. Noko ke, ngalo lonke ixesha inzondelelo ifanele ihambe nokuthetha ngendlela echubekileyo nobulali. (Tito 3:2) Sisoloko sizama ukunika umninimzi isidima nenkululeko yokuzikhethela.
5. Sisiphi isibongozo esiphefumlelweyo esifanele sizabalazele ukusisebenzisa?
5 Njengabavakalisi boBukumkani, ngamana singasoloko ‘sivutha emoyeni.’ Masihlakulele inzondelelo ngofundisiso lweBhayibhile lobuqu nangokuthandaza rhoqo kuYehova, lowo unokusinika umoya oyingcwele. Ngale ndlela, sinokubuphumeza ubulungiseleli bethu ‘ngomoya oyingcwele nolweyiseko olunamandla.’—1 Tes. 1:5.