Kwesi Sikhumbuzo, Ngaba Uza Kuxelisa Inzondelelo KaYehova NekaYesu?
1. Nguwuphi umgudu okhethekileyo owenziwa ngamaNgqina kaYehova ngexesha leSikhumbuzo?
1 UYehova uyifeza ngenzondelelo injongo yakhe. Ebhekisela kwezinye zeentsikelelo zoBukumkani bukaThixo, uIsaya 9:7 uthi: “Inzondelelo kaYehova wemikhosi iya kukwenza oku.” Ngendlela efanayo, xa wayeshumayela apha emhlabeni, uNyana kaThixo wayenenzondelelo ngonqulo lokwenyaniso. (Yoh. 2:13-17; 4:34) Nyaka ngamnye ngexesha leSikhumbuzo, izigidi zabavakalisi ehlabathini jikelele zenza umgudu wokuxelisa inzondelelo kaYehova nekaYesu ngokwandisa ixesha ezilichitha entsimini. Ngaba uza kubaphakathi kwazo?
2. Yintoni inzondelelo eza kusinceda siyenze ukususela ngoMatshi 7?
2 Iphulo Lexesha LeSikhumbuzo: Kulo nyaka iphulo lokubhengeza iSikhumbuzo liza kuqala ngoMgqibelo, Matshi 7. Ceba kwangoku ukuze ushumayele ngenzondelelo ngelo xesha entsimini. Amabandla aza kube engakwazi ukuzibamba yimincili njengoko ezimisele ukugubungela intsimi yawo. Zimisele ukumema izifundo zakho zeBhayibhile, amabuyelo, abantu osebenza nabo, izalamane nabo ufunda nabo ngokubanika isimemo okanye usebenzisa u-jw.org/xh.
3. Sinokuyandisa njani inkonzo yethu ngoMatshi nangoAprili?
3 Ubuvulindlela Bobuncedani: Inzondelelo iya kusinceda sandise inkonzo yethu. Ngokuqinisekileyo abaninzi baza kukwazi ukuba ngoovulindlela abangabancedani ngoMatshi nangoAprili, kuba siza kukwazi ukukhetha ukusebenza iiyure eziyi-30. Kunqulo lwenu lwentsapho okanye kufundisiso lobuqu, thandaza uze ucinge ngendlela onokukwenza ngayo oku. (IMize. 15:22) Inzondelelo onayo inokwenza abanye bafune ukushumayela ngenzondelelo nabo. Ukuba wenza uhlengahlengiso ukuze wenze okungakumbi, uya kuba uxelisa inzondelelo kaYesu.—Marko 6:31-34.
4. Ziziphi iingenelo esizifumanayo xa sixelisa inzondelelo kaYehova nekaYesu?
4 Ukuba sixelisa inzondelelo kaYehova nekaYesu ngexesha leSikhumbuzo, siya kusikelelwa. Kuya kushunyayezwa abantu abaninzi ngakumbi kwintsimi yethu. Siya kufumana uvuyo nolwaneliseko olubangelwa kukukhonza uYehova nokupha abanye. (IZe. 20:35) Eyona nto ibalulekileyo kukuba, siya kukholisa uThixo wethu onenzondelelo noNyana wakhe.