SingamaNgqina Ngalo Lonke Ixesha
1. Sinokufunda ntoni kwingxelo engokushumayela kukaYesu kwibhinqa elalisequleni?
1 UYesu wayesele eneeyure eziliqela ehamba. Wayediniwe yaye enxaniwe. Ngoxa abafundi bakhe babeye kuthenga ukutya, wahlala phantsi equleni elalingaphandle kwesixeko saseSamariya ukuze aphumle. Wayengayanga eSamariya ukuya kushumayela; wayedlula ngendlela esiya kushumayela eGalili. Sekunjalo, wasebenzisa elo thuba ukuze ashumayele kwibhinqa elalisikha amanzi. (Yoh. 4:5-14) Ngoba? UYesu akazange ayeke ukuba ‘lingqina elithembekileyo neliyinyaniso’ likaYehova. (ISityhi. 3:14) Sixelisa uYesu ngokuba ngamaNgqina kaYehova ngalo lonke ixesha.—1 Pet. 2:21.
2. Sinokukulungela njani ukushumayela ngokungacwangciswanga?
2 Hlala Ukulungele: Sinokukulungela ukushumayela ngokungacwangciswanga ngokuphatha uncwadi. Abavakalisi abaninzi bahlala benamaphecana abawanika abasebenzi beevenkile, abantu abatha ipetroli, nabanye abantu abadibana nabo ebudeni bemini. (INtshu. 11:6) Udade osoloko eseluhambweni uyaqiniseka ukuba uneBhayibhile encinane nencwadi ethi Okufundiswa YiBhayibhile kwibhegi yakhe, kwaye uzama ukuqalisa incoko nabantu abahleli ecaleni kwakhe.
3. Sinokuyiqalisa njani incoko?
3 Qalisa Incoko: Xa sishumayela ngokungacwangciswanga, akunyanzelekanga ukuba zisuka nje sithethe ngombandela osekelwe kwiZibhalo. UYesu akazange aqalise incoko nebhinqa elalisequleni ngokulichazela ukuba unguMesiya. Wacela nje into eselwayo, evuselela umdla walo. (Yoh. 4:7-9) Omnye udade ukufumanisa kulula ukuqalisa incoko ngokusebenzisa indlela efanayo nekaYesu xa ebuzwa ukuba ukonwabele kusini na ukubhiyozela iholide. Endaweni yokuba athi akakhange ayibhiyozele kuba eliNgqina likaYehova, uthi, “Ndiye ndazenzela ukhetho lokungayibhiyozeli.” Loo mntu udla ngokubuza ngomdla isizathu soko, evula ithuba elihle lokuba lo dade anikele ubungqina.
4. Kutheni uMateyu 28:18-20 ekukhuthaza nje?
4 Nangona uYesu wabufezayo ubulungiseleli bakhe basemhlabeni, usaqhubeka enomdla kumsebenzi wokushumayela owenziwa ngendlela awayewenze ngayo. (Mat. 28:18-20) Ngoko ke, njengoMzekelo wethu uYesu, singamaNgqina akulungeleyo ukwenza uvumo lwasesidlangalaleni lokholo lwethu nangaliphi na ixesha.—Heb. 10:23.