Shumayela Unemvo Yongxamiseko!
1. Sisiphi isibongozo sikaPawulos ekufuneka sinikel’ ingqalelo kuso namhlanje?
1 “Lishumayele ilizwi ngokungxamisekileyo.” (2 Tim. 4:2) Kutheni isibongozo sikaPawulos sibalulekile namahlanje? La mazwi anokubuchaphazela njani ubomi bethu nobabanye abantu?
2. Kutheni sikhangela ngenyameko abo bangakhange bazive iindaba ezilungileyo?
2 Kubandakanyeke Ubomi: Izigidi zabantu ehlabathini jikelele kusafuneka zizivile iindaba ezilungileyo eziya kuzikhokelela elusindisweni. (Roma 10:13-15; 1 Tim. 4:16) Abantu abaninzi abantliziyo zinyanisekileyo bafunyanwa kwintsimi esetyenzwa rhoqo. Ukuba siya kubo ngolunye usuku okanye ngelinye ixesha, sisenokufumana umntu owahlukileyo. Xa sibakhangela ngenyameko oko kuya kusenza sibe nesazela esicocekileyo size singabi nalo ityala legazi.—IZe. 20:26.
3. Sinokulisebenzisa njani ixesha lethu ngobulumko entsimini?
3 Nangona amaKristu enkulungwane yokuqala ayechaswa ngogonyamelo, ‘azalisa iYerusalem ngemfundiso yawo.’ (IZe. 5:28) Ngaba sizimisele ‘ukunikela ubungqina ngokucokisekileyo’? (IZe. 10:42) Ngaba xa sisentsimini, silisebenzisa ngobulumko ixesha lethu? Ngaba ngoxa sisiya emabuyelweni siye sithethe nabantu abadlula ngendlela?
4. Ukushumayela sinemvo yongxamiseko kusinceda njani sihlale silindile?
4 Isenza Siphaphe: Njengoko isiphelo sale nkqubo yezinto sisondela, kufuneka sihlale siphaphile yaye sihlale silindile. (1 Tes. 5:1-6) Xa sithetha rhoqo ngethemba lethu loBukumkani, siya kuphepha ukucinezelwa yile nkqubo yezinto. (Luka 21:34-36) ‘Ukukhumbula’ imini kaYehova, kuya kusenza sibe nenxaxheba engakumbi kumsebenzi wokushumayela osindisa ubomi.—2 Pet. 3:11, 12.
5. Ukuhlonela kwethu ubomi kusishukumisela senze ntoni entsimini?
5 Xa sishumayela sinemvo yongxamiseko, siba nembono kaYehova ngobomi: “Akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Pet. 3:9; Hez. 33:11) Ngamana singenza umzamo wokuthetha nabantu abaninzi kangangoko kunokwenzeka kwintsimi yebandla lethu, ukuze sidumise uYehova!—INdu. 109:30.