IBhokisi Yemibuzo

◼ Yintoni enokwenziwa ngabo bonke abantu ukuze kubekho imeko efanelekele ukufunda kwiintlanganiso zebandla? (Dut. 31:12)

Ngenxa yokuba simhlonela ngokunzulu uYehova nelungiselelo lakhe leentlanganiso zebandla, sonke siyakhuthazwa ukuba sifike kwangethuba size silungele ukufundiswa nguye. Kuyanceda ukuba abo bafike kwangethuba bahlale kwizitulo ezingaphambili, bashiyele abantu abanabantwana abancinane nabo badla ngokufika emva kwexesha izitulo ezingasemva. Ngaphambi kokuba iintlanganiso ziqale, izinto ze-elektroniki zifanele zenziwe zingaphazamisi abaphulaphuli. Iziphazamiso ziya kuba mbalwa kwaye zingabi nkulu ukuba bonke abakhoyo baba nentlonelo ebudeni beentlanganiso.—INtshu. 5:1; Fil. 2:4.

Xa abantu abasebatsha besiza okokuqala ezintlanganisweni, umntu oqhelene nabo ebandleni unokuhlala nabo. Oku kuya kuba luncedo ukuba kukho abantwana abasebancinane ekufuneka baqeqeshwe. Ukuza kwiintlanganiso kusenokuba yinto entsha kuloo ntsapho. Ukuba kunjalo, banokukuxabisa ukuhlala ngasemva ukuze bangaphazamisi abanye xa kufuneka abazali baphume okomzuzwana ukuze baye kunyamekela abantwana. (IMize. 22:6, 15) Iintsapho ezinabantwana abancinane azifanele zihlale kwigumbi elahlukileyo apho abantwana besenokukhululeka kakhulu baze bangxole. Kudla ngokuba kuhle ukuba umzali ohlwaye okanye anyamekele ezinye iimfuno zabantwana bakhe ngaphandle kweholo aze abuyele ngaphakathi akugqiba.

Abalindi bakho ukuze bagcine iholo ikwimo efanele indlu yokunqulela. Banceda iintsapho kunye nabo badla ngokufika emva kwexesha bafumane iindawo zokuhlala ezifanelekileyo. Abalindi bayakuphaphela ukuthetha ngendlela echubekileyo xa benceda abanye ukuba bafumane iindawo zokuhlala ukuze bangaphazamisi abanye. Bafanele balungelelane xa kuvela iimeko ezingalindelekanga eziphazamisayo. Xa umntwana ephazamisa abanye abantu, abalindi basenokunikela uncedo.

Wonke umntu oze kwiintlanganiso zokunqula unokuba negalelo kwimeko entle elungele ukuba kufundwe ngoYehova nenjongo yakhe yomhlaba onoxolo nolungileyo.—Heb. 10:24, 25.