Nikela Ingqalelo Kwizibhengezo Ezingcwele
1 Asiyiyo yonke into ethethwa ngumntu efuna ingqalelo ekhethekileyo. Kodwa xa uThixo ethetha, kukho isizathu esibalulekileyo sokuphulaphula. (Dut. 28:1, 2) Okuvuyisa kukuba, amadoda aphefumlelweyo angababhali abhala “izibhengezo ezingcwele zikaThixo” ukuze kungenelwe thina. (Roma 3:2) Le ndibano yesithili izayo iza kusinika amathuba axabisekileyo okuba sive ezi zibhengezo njengokuba zifundwa zize zixutyushwe. Ungayinikela njani ingqalelo ngokukhethekileyo?
2 Fika Kwangethuba Ntsasa Nganye: Cinga ngemincili awayenayo amaSirayeli xa axelelwa ukuba aza kudibana noYehova kwiNtaba yeSinayi ukuze aphulaphule uMthetho wakhe! (Eks. 19:10,11, 16-19) Ukuba unesimo sengqondo esifanayo ngokufumana imfundiso kaYehova kwindibano yesithili, uya kwenza amalungiselelo okufika kwangethuba suku ngalunye. Asinakuluphulaphula lonke ucwangciso ukuba sifika emva kwexesha size siphazamise abanye ngokufuna indawo yokuhlala. Amasango aya kuvulwa ngeye-7:00 kusasa kumabala endibano, yaye ucwangciso luya kuqalisa ngeye-9:00 kusasa suku ngalunye.
3 Kwanabathile abafika kwangethuba ababikho kwizihlalo zabo xa kuqalisa ucwangciso. Kutheni kunjalo nje? Balinda usihlalo ade achaze ingoma yokuvula ngaphambi kokuba bayeke ukuncokola nabahlobo kube kukhona baya ezihlalweni. Sifanele siphawule ukuba kwimizuzu ethile ngaphambi kwengoma yokuvula ucwangciso ngalunye, usihlalo uya kuhlala eqongeni ngoxa kudlalwa umculo woBukumkani wokutshayelela. Lo ngumqondiso wethu obonisa ukuba ngoku lixesha lokuba sihlale phantsi! Ukuba kunjalo, kuya kuthi xa kuchazwa iculo lokuvula, sikulungele ukuvumela uYehova indumiso.
4 Phulaphulani Njengentsapho Emanyeneyo: Xa iintsapho zamaSirayeli ezazihlanganisene kuquka “nabantwana” zazifundelwa izibhengezo ezingcwele, babeza kuphulaphula baze bafunde. (Dut. 31:12) Kwiindibano zethu, abantwana abafanele ‘bayekelelwe.’ (IMize. 29:15) Bazali, lungiselelani ukuba intsapho yenu ihlale ndawonye—kuquka nabakwishumi elivisayo. Abanye abazali balinda de kuculwe iculo lokuvula ukuze base abantwana babo kwindlu yangasese. Noko ke, oku akunakuze kubafundise abantwana ukubaluleka kwamaculo nemithandazo kunqulo lwethu. Hayi indlela ekukuhle ngayo ukumsa kwindlu yangasese ngaphambi kokuqalisa kocwangciso ngalunye ukuba kunokwenzeka!
5 Kuya kusinceda siphulaphule ukuba siphumla ngokwaneleyo ubusuku ngabunye size siphephe ukutya kakhulu ebudeni bemini. Nikela ingqalelo koko kuthethwa sisithethi. Musa ukuvumela ingqondo yakho ibhadule. Tyhila kweyakho iBhayibhile xa kufundwa izibhalo. Bhala amanqaku amafutshane. Njengokuba kunikelwa intetho nganye, zama ukukhumbula oko bekuthethwa sisithethi, uze ujonge indlela oza kuwusebenzisa ngayo loo mbandela. Ekupheleni kosuku, xubushani ucwangciso njengentsapho. Ziziphi iingongoma ngamnye aye wazithanda? Ingayisebenzisa njani kakuhle intsapho yakho le nkcazelo?
6 Bonisa Intlonelo NgeLizwi LikaThixo: Iindibano zisinika ithuba elihle lokuthetha nabahlobo size sinandiphe unxulumano olwakhayo. Ngokufika kwangethuba, siya kuba nethuba lokuncokola ngaphambi kokuba ucwangciso luqalise. Noko ke, abanye bayancokola ngoxa kuqhubeka ucwangciso, ngempazamo becinga ukuba oku akuphazamisi kangako kwiholo enkulu. Nokuba iintlanganiso ziqhutyelwa kwindawo enkulu, elo lixesha lokuphulaphula, kanye njengaxa kuyiwe ezintlanganisweni kwiHolo yoBukumkani. Ukusetyenziswa kwecellular phone, ipager, iicamcorders nekhamera akufanele kuvunyelwe kuphazamise ebudeni bocwangciso.
7 Ngoxa uMoses wayesamkela uMthetho ovela kuYehova, ‘akazange adle sonka akazange asele manzi.’ (Eks. 34:28) Ngokufanayo, bekungayi kufaneleka ukutya okanye ukusela ngoxa kuqhubeka ucwangciso lwendibano. Ngaphandle kokuba ubani unengxaki enzulu yempilo, linda kude kube ‘lixesha elimisiweyo’ loko.—INtshu. 3:1.
8 Kwezinye iindibano, kuya qhubeka kukho ingxaki ngabazalwana noodade abaninzi kwanabantwana abancinane abema ezipasejini nabahamba emabaleni ngoxa kuqhubeka ucwangciso. Abalindi baya kuyalelwa ukuba babacele abo ukuba babuyele ezihlalweni zabo. Amatsha-ntliziyo asebenza kumasebe awahlukahlukeneyo afanele ahlale nabaphulaphuli wakuba umsebenzi wawo ugqityiwe. Ngaphandle kokuba amatsha-ntliziyo abelwe ukuba enze umsebenzi obalulekileyo ngoxa kuqhubeka ucwangciso, afanele ahlale ezihlalweni zawo, aphulaphule ucwangciso. Akafanele ahlale emasebeni awo, encokola ngoxa kuqhubeka ucwangciso. Abazali abafanele babavumele abantwana babo abaselula ukuba bahambe beqokelela inkunkuma ngoxa kuqhubeka ucwangciso. Abalindi baya kubacela ngobubele abo ukuba babuyele kubazali babo.
9 Asifuni kuba ‘buthuntu ekuveni kwethu’ xa siphulaphule iLizwi likaThixo. (Heb. 5:11) Ngoko ke masizimisele ukubonisa intlonelo efanelekileyo ngokuphulaphula ngenyameko njengoko kwindibano yethu yesithili kuxutyushwa izibhengezo ezingcwele ezivela kuYehova.