“Yiba Ngumlandeli Wam”
1. Liliphi ithuba esiya kulivulelwa siSifundo SeBhayibhile Sebandla kwiinyanga ezizayo?
1 Iingxelo zevangeli ezine ezingobomi bukaYesu basemhlabeni zisizobela umfanekiso omhle woNyana kaThixo. Ekubeni amaKristu efanele ‘alandele emanyathelweni akhe ngokusondeleyo,’ siya kulungiselela kakuhle size sinikele ingqalelo njengoko siza kufunda le ncwadi ethi “Yiba Ngumlandeli Wam” kwiSifundo SeBhayibhile Sebandla ukususela kwiveki kaMatshi 1. (1 Pet. 2:21; Mar. 10:21) Sifanele sinikele ingqalelo ekhethekileyo kwiinkalo zobomi bukaYesu ezinokusikhuthaza kubulungiseleli bethu.
2. Sinokungenelwa njani kumzekelo kaYesu wokunyamezela?
2 Umzekelo Owamiselwa NguYesu: Ngaba wakha wadibana nabantu abangenamdla ngoxa ushumayela kwindlu ngendlu? Xa sidibana nabantu abanjalo, siye sikhumbule amazwi kaYesu athi: “Ukuba banditshutshisile mna, baya kunitshutshisa nani.” (Yoh. 15:20) Enyanisweni, asizizo zonke iindlela zokuphendula ezitenxileyo esinokuzigqala njengentshutshiso. Noko ke, yayiluvuyo olwalubekwe phambi kwakhe olwenza uYesu wanyamezela zonke iimvavanyo nezilingo. Nathi sinokunikela ingqalelo ekuzuzeni inkoliseko kaYehova neentsikelelo esiya kuzifumana ngokuhlala sithembekile. Oku kuya kusinceda ‘singadinwa size sityhafe emiphefumlweni yethu.’ (Heb. 12:2, 3; IMize. 27:11) Njengoko sizingisa entsimini, sinokuqiniseka ngenkxaso kaYesu Kristu.—Mat. 28:20.
3. Sinokuyixelisa njani indlela uYesu awayebujonga ngayo ubulungiseleli?
3 “Ndithunywe Oko”: Umsebenzi wokushumayela ngoBukumkani wawukwindawo yokuqala kubomi bukaYesu. (Luka 4:43) Wazinikela ngokunyanisekileyo entsimini. Wayigqala njengengxamisekileyo, ngalo lonke ixesha ekhangela amathuba okuthetha nabantu ngoBukumkani. Ekubeni singabalandeli bakaYesu, amanyathelo akhe asikhokelela phi? Njengoko siqhubeka nobomi bethu bemihla ngemihla, ngaba bakho abantu esinokwabelana nabo ngeendaba ezilungileyo? Ngamana uthando uKristu analo lungasishukumisela ukuba sisasaze iindaba ezilungileyo kangangoko kunokwenzeka!—2 Kor. 5:14.
4. Ziziphi iindlela esinokubuphucula ngazo ubulungiseleli bethu?
4 “Akuzange Kubekho Omnye Umntu Othetha Njengalo”: Indlela kaYesu yokufundisa yayibenza bathi khamnqa abaphulaphuli bakhe. (Yoh. 7:46; Mat. 7:28, 29) Yintoni eyayimenza ahluke kwabanye abafundisi? Wayeyithanda inyaniso awayeyifundisa, ebathanda nabantu awayebafundisa, kwaye wayesebenzisa iindlela ezahlukeneyo zokufundisa. Ngokuxelisa uMfundisi Omkhulu, sinako ukuphucula ubulungiseleli bethu.—Luka 6:40.
5. Lufanele lube yintoni usukelo lwethu njengoko sifunda le ncwadi ethi “Yiba Ngumlandeli Wam”?
5 Obu bobunye nje bobuncwane obutyhiliweyo ngobomi bukaYesu. Bubuphi obunye ubuncwane onokubufumana? Njengoko uhlola ubomi bukaYesu ebudeni beSifundo SeBhayibhile Sebandla, makube lusukelo lwakho ‘ukwazi uthando lukaKristu’ ngokuxelisa amazwi nezenzo zakhe.—Efe. 3:19.