Ngaba Uza Kuqalisa Isifundo SeBhayibhile Ngo-Oktobha?
1. Siza kuhambisa ntoni ngo-Oktobha?
1 Ngo-Oktobha kuza kuhanjiswa IMboniselo noVukani! Ukuze sibuyele kwabanomdla, sikhuthazwa ukuba sihambise iphecana elithi Ngaba Ungathanda Ukwazi Eyona Nyaniso? size sizame ukuqalisa isifundo seBhayibhile. Sinokukwenza njani oko xa sibuyela?
2. Sinokulisebenzisa njani iphecana elithi Ukwazi Inyaniso ukuqalisa isifundo seBhayibhile xa sibuyela kumntu oye wamkela amaphephancwadi?
2 Indlela Yokusebenzisa Eli Phecana: Sisenokuthi: “La maphephancwadi bendikushiyele wona akhuthaza abantu abanemvelaphi neenkolo ezahlukeneyo ukuba bafunde iBhayibhile. [Nika umninimzi iphecana elithi Ukwazi Inyaniso, uze walathe kwimibuzo ekwiphepha lokuqala.] Nantsi eminye yemibuzo ebangela umdla iBhayibhile enikela iimpendulo ezanelisayo kuyo. Ngaba wakha wayibuza eminye yale mibuzo?” Emva kokuba ufumene impendulo yomninimzi, hlola kunye naye enye yeempendulo ezikweli phecana zombuzo wakhe, uze ufunde esinye seZibhalo ezicatshulweyo. Emva koko mcacisele ukuba le yimizekelo yoko ibhayibhile ikufundisayo, uze umnike incwadi ethi Okufundiswa YiBhayibhile. Emva koko sisenokuxubusha iziqendu zokuqala zesahluko asikhethileyo kwiziqulatho. Okanye sisenokuya apho kufumaneka inkcazelo engakumbi ngomxholo ebesithethe ngawo kwiphecana. Nazi iimbekiselo esinokuzisebenzisa:
● Ngaba ngokwenene uThixo usikhathalele? (iphe. 9-11, isiqe. 6-10)
● Ngaba iimfazwe nokubandezeleka ziya kuze ziphele? (iphe. 12, isiqe. 12-13)
● Kwenzeka ntoni kuthi xa sisifa? (iphe. 59-60, isiqe. 7-8)
● Ngaba likho ithemba ngabantu abafileyo? (iphe. 71, isiqe. 13-15)
● Ndingathandaza njani ukuze ndiviwe nguThixo? (iphe. 166-167, isiqe. 5-8)
● Ndinokulufumana njani ulonwabo ebomini? (iphe. 9, isiqe. 4-5)
3. Sinokuyitshintsha njani intshumayelo yethu ngokwemeko?
3 Kakade ke, ukuba iimeko azisivumeli ukuba siqalise isifundo sisebenzisa incwadi ethi Okufundiswa YiBhayibhile kwibuyelo lokuqala, sisenokwenza ilungiselelo lokubuya size siqhubeke nengxubusho yethu. Ngokuxhomekeka komdla womntu, sisenokukhetha ukuxubusha imibuzo efumaneka kweli phecana kumatyeli aliqela ngaphambi kokuba sisebenzise incwadi. Ngamana singalisebenzisa kakuhle eli phecana ebudeni bukaOktobha ukuze siqalise isifundo seBhayibhile size sincede abantliziyo zinyanisekileyo ukuba ‘bazi inyaniso.’—Yoh. 8:31, 32.