Ngaba Wakha Wanguvulindlela Othe Ngxi?
1. Liliphi ilungelo eliye laxhanyulwa ngabantu abaninzi, kodwa yintoni eye yenzeka kwabanye babo?
1 Kangangeminyaka, kukho amawaka aye axhamla ilungelo ‘lokufundisa nokuvakalisa iindaba ezilungileyo’ njengabalungiseleli bexesha elizeleyo. (IZe. 5:42) Noko ke, abanye bayeka ukuba ngoovulindlela ngenxa yezizathu ezahlukahlukeneyo. Ukuba wakha wanguvulindlela othe ngxi, ngaba ukhe wazihlola iimeko zakho ukuze ubone enoba akunakuphinda ube nguye kusini na?
2. Kutheni abantu ababengoovulindlela kufuneka bamane behlola iimeko zabo?
2 Iimeko Ziyatshintsha: Kusenokwenza ukuba ayisekho ingxaki eyabangela ukuba uyeke ukuba nguvulindlela. Ngokomzekelo, ukuba wawuyeke ngenxa yokuba ungenakukwazi ukufikelela iiyure ezingama-90 ngenyanga, ngaba ungakwazi ngoku ekubeni sele zingama-70? Ngaba kuye kwakho utshintsho ngoku kwiimeko zakho zempangelo okanye kwiimbopheleleko zentsapho? Omnye udade owayeka ukuba nguvulindlela ngenxa yempilo waphinda waqalisa xa eneminyaka engama-89. Kwadlula unyaka engakhange aye esibhedlele yaye loo nto yamenza waqonda ukuba angakwazi ukuphinda abe nguvulindlela!
3. Amalungu entsapho anokuncedisana njani ukuze elinye ilungu likwazi ukuba nguvulindlela?
3 Mhlawumbi zange ube nguvulindlela, kodwa kowenu kukho ilungu elayekayo ukuba nguvulindlela ukuze linyamekele elinye, njengomzali owalupheleyo. (1 Tim. 5:4, 8) Ukuba likhona, ngaba akukho nto ninokuyenza njengentsapho ukuze nilincede liphinde libe nguvulindlela? Kutheni ningakhe nixubushe nje ngalo mbandela? (IMize. 15:22) Xa amalungu entsapho encedisana ukuze elinye libe nguvulindlela, onke anokuvakalelwa kukuba anenxaxheba kule nkonzo.
4. Kuthekani ukuba akukwazi ukuba nguvulindlela okwangoku?
4 Ukuba iimeko zakho azikuvumeli ukuba ube nguvulindlela ngoku, musa ukudimazeka. UYehova uyavuya njengoko ekubona ukuba unolangazelelo ngale nkonzo. (2 Kor. 8:12) Okwangoku qhubeka usebenzisa ubuchule owabufumana ngoxa wawunguvulindlela. Qhubeka uwuthandazela lo mnqweno unawo, uze uhlengahlengise iimeko zakho xa kuvela amathuba. (1 Yoh. 5:14) Mhlawumbi ethubeni, uYehova uya kukuvulela “umnyango omkhulu okhokelela emsebenzini” ukuze ukwazi ukuphinda ufumane uvuyo lokuba nguvulindlela othe ngxi!—1 Kor. 16:9.