‘Makwenzeke Ukuthanda KukaThixo’
1. Uthini umxholo wendibano ekhethekileyo yosuku olunye yonyaka wenkonzo wama-2012, yaye kutheni sifanele siwuqwalasele lo mbandela?
1 Sadalwa ngenxa yokuthanda kukaYehova. (ISityhi. 4:11) Noko, besingenakukwazi ukuyifeza injongo yobukho bethu ngaphandle kokufunda nokwenza ukuthanda kukaThixo. Le nto ayikho lula njengokuba isenokubonakala injalo, kaloku simele silwe notyekelo esinalo lokwenza “izinto ezithandwa yinyama naziingcamango” okanye lokwenza “ukuthanda kweentlanga.” (Efe. 2:3; 1 Pet. 4:3; 2 Pet. 2:10) Ngaphandle koncedo lukaThixo, besinokude sibe sesichengeni ‘sokubanjiswa siphila nguMtyholi, ukuze siphumeze ukuthanda kwakhe.’ (2 Tim. 2:26) Ucwangciso lwendibano ekhethekileyo yosuku olunye yonyaka wenkonzo wama-2012 luya kunceda ngamnye kuthi aphile ngokuvisisana namazwi amathathu abalulekileyo akumthandazo ongumzekelo athi, “makwenzeke ukuthanda kwakho.”—Mat. 6:9, 10.
2. Yiyiphi imibuzo eza kuphendulwa kucwangciso lwendibano?
2 Imibuzo Eza Kuphendulwa: Njengoko uphulaphule ucwangciso, khangela iimpendulo zale mibuzo: Yintoni ebaluleke njengokuva iLizwi likaThixo? Singenza njani ukuze siqhubeke sikuqonda into okuyiyo ukuthanda kukaThixo? Kutheni sifanele sikulungele ukunceda zonke iintlobo zabantu? Singabufumana njani ubomi obanentsingiselo nobanelisayo? Nina baselula, yintoni ekufuneka niyingqine kuYehova? Ziziphi iintsikelelo esizifumanayo ngokwenza ukuthanda kukaThixo? Kutheni kungxamisekile ukubakha nokubakhuthaza abanye?
3. Sinokungenelwa njani ngokupheleleyo kolu cwangciso lokomoya?
3 Qiniseka ukuba uyaya endibanweni uze unikele ingqalelo kucwangciso. Kuza kubakho isithethi esityeleleyo saseBheteli okanye umveleli ohambahambayo. Ngaphambi okanye ngemva kocwangciso ungaya kuncokola naye kunye nomfazi wakhe ukuba utshatile. Ukuze ningabi ‘ngabaphulaphuli abalibalayo,’ xa nibuyela ekhaya yenzani impinda yocwangciso njengentsapho nize nixubushe ngendlela eninokukwenza ngakumbi ngayo ukuthanda kukaThixo.—Yak. 1:25.
4. Kutheni kubalulekile nje ukuba ukwenza ukuthanda kukaThixo kube yeyona nto ibalulekileyo kuthi?
4 Kungekudala, abo bafuna ukwenza ngokweminqweno yabo nabangafuniyo ukuthobela intando kaYehova baya kutshatyalaliswa. (1 Yoh. 2:17) Ngoko siyambulela uYehova ngokusilungiselela le nkcazelo isexesheni ukuze ukwenza ukuthanda kwakhe kube yeyona nto ibalulekileyo kuthi!