Ngaba Ufunda Kangangoko KuYehova?

1. UYehova uvakalelwa njani ngemfundo?

¹ UYehova “umYaleli Ozukileyo” wethu, ufuna sifunde. (Isa. 30:20) Waqala ukufundisa emva kokuba edale uNyana wakhe olizibulo. (Yoh. 8:28) Emva kwemvukelo ka-Adam, uYehova akazange ayeke ukufundisa, kodwa ngokunothando wanikela imiyalelo kubantu abangafezekanga.—Isa. 48:17, 18; 2 Tim. 3:14, 15.

2. Liliphi iphulo lokufundisa eliqhubekayo sithetha nje?

² Namhlanje, uYehova walathisa elona phulo likhulu lemfundo embalini. Njengokuba uIsaya waprofetayo, ehlabathini lonke izigidi ziyathontelana ukuya ‘kwintaba yendlu kaYehova’ Yokomfuziselo. (Isa. 2:2) Ziya kwenzani apho? Ukuze zifundiswe ngeendlela zikaThixo, ewe ukuze zifundiswe nguYehova! (Isa. 2:3) Kunyaka wenkonzo wama-2010, amaNgqina kaYehova aye achitha iiyure ezili-1,6 zeebhiliyoni eshumayela yaye efundisa abantu inyaniso yeBhayibhile. Ukongezelela, veki nganye kudluliselwa imfundo yokomoya kumabandla angaphezu kwe-105 000 emhlabeni wonke, yaye ikhoboka elithembekileyo neliyingqondi livelisa iimpapasho zokufundisa zamaKristu ngeelwimi ezingaphezu kwama-500.

3. Uye wazuza njani kule mfundo kaYehova?

³ Zuza Ngokupheleleyo: Siye sazuza lukhulu kule mfundo yobuthixo! Sifunde ukuba uThixo unegama yaye usikhathalele. (INdu. 83:18; 1 Pet. 5:6, 7) Siye safumana iimpendulo zeyona mibuzo ibalulekileyo ebomini: Kutheni abantu bebandezeleka baze bafe? Ndinokulufumana njani ulonwabo lokwenene? Yintoni injongo yobomi? UYehova usifundise nendlela yokuziphatha ukuze ‘senze iphumelele indlela yethu.’—Yosh. 1:8.

4. Ngawaphi amanye amathuba emfundo avulekele abakhonzi bakaThixo, yaye kutheni simele senze konke okusemandleni ukuze sifunde kuYehova?

⁴ Ukongezelela, uYehova wenze ilungiselelo lemfundo ekhethekileyo ukuze ancede abakhonzi bakhe bandise inkonzo yabo. Kwiphepha 4-6 kukho uludwe lwamathuba avuleleke abathile. Enoba iimeko zethu azisivumeli ukuba sifumane naluphi na uqeqesho olukolu ludwe, ngaba senza konke okusemandleni ukuze sizuze kule mfundo yobuthixo siyifumanayo? Ngaba siyabakhuthaza abaselula, nabaphethelw’ imbengwane ngootitshala nabanye ukuba basukele imfundo enomsila yehlabathi, bazibekele usukelo lwezinto zokomoya baze basukele eyona mfundo iphakamileyo—imfundo yobuthixo? Ukuba senza konke okusemandleni ukuze sifunde kuYehova siya kunandipha ubomi obonwabiswayo ngoku nangonaphakade.—INdu. 119:105; Yoh. 17:3.

Amanye Amathuba Emfundo Alungiselelwe Yintlangano KaYehova

Iiklasi Zabangakwazi Kufunda

• Injongo: Kukunceda abantu bakwazi ukufunda nokubhala ukuze bakwazi ukuzifundela iBhayibhile baze bafundise nabanye inyaniso.

• Ixesha Elichithwayo: Kuxhomekeka kwiimfuno.

• Indawo: KwiHolo yoBukumkani yebandla lasekuhlaleni.

• Abanokuba Nenxaxheba: Bonke abavakalisi nabantu abanomdla.

• Indlela Yokufumana Imvume: Abadala bebandla balungiselela ezi klasi ngokweemfuno zasekuhlaleni, yaye bakhuthaza bonke abanokuncedwa zizo.

ISikolo Sobulungiseleli Sobuthixo

• Injongo: Kukuqeqesha abavakalisi baphumelele ekushumayeleni nasekufundiseni abanye iindaba ezilungileyo.

• Ixesha Elichithwayo: Ngokuqhubekayo.

• Indawo: KwiHolo yoBukumkani yebandla lasekuhlaleni.

• Abanokuba Nenxaxheba: Bonke abavakalisi. Abanye ngabo babakho rhoqo kwintlanganiso, abavumelana neemfundiso zeBhayibhile, nabaphila ngokuvisisana nemigaqo yamaKristu.

• Indlela Yokufumana Imvume: Thetha nomveleli weSikolo Sobulungiseleli Sobuthixo.

Iiklasi Zolwimi Lwasemzini

• Injongo: Kukufundisa abavakalisi indlela yokushumayela iindaba ezilungileyo ngolunye ulwimi.

• Ixesha Elichithwayo: Ziinyanga ezine okanye ezintlanu. Ezi klasi zidla ngokuqhutywa kusasa ngoMigqibelo kangangeyure okanye ezimbini.

• Indawo: Zidla ngokuba kwiHolo yoBukumkani ekufutshane.

• Abanokuba Nenxaxheba: Ngabavakalisi abaqhuba kakuhle abanqwenela ukushumayela ngolwimi lwasemzini.

• Indlela Yokufumana Imvume: Ezi klasi zilungiselelwa yiofisi yesebe ngokweemfuno zentsimi.

Ulwakhiwo LweeHolo ZoBukumkani

• Injongo: Kukwakha nokulungisa iiHolo zoBukumkani. Esi ayisosikolo, kodwa kweli lungiselelo amatshantliziyo ayancedwa afunde ubuchule obahlukahlukeneyo anokubusebenzisa xa kusakhiwa.

• Ixesha Elichithwayo: Kuxhomekeka kwiimeko zetsha-ntliziyo elo.

• Indawo: Naphi na apho yabelwe khona iKomiti Yokwakha Yenqila. Okanye asebenze ixesha elizeleyo, kunye nelinye lamaQela Okwakha IiHolo ZoBukumkani eliphantsi kweofisi yesebe.

• Iimfaneleko: Abazalwana noodade ababhaptiziweyo abagunyaziswe liqumrhu labadala. Basenokuba nobuchule okanye bangabinabo.

• Indlela Yokufumana Imvume: Zalisa ifomu ethi Kingdom Hall Volunteer Worker Questionnaire (S-82) efumaneka kubadala bebandla ukuze usebenze kwiKomiti Yokwakha Yenqila. Ukuba uza kukwazi ukusebenza inyanga yonke okanye ngaphezulu unokuzalisa ifomu ethi Application for Kingdom Hall Construction Volunteer Program (A-25).

ISikolo Senkonzo Yobuvulindlela

• Injongo: Kukunceda oovulindlela ‘babufeze ngokupheleleyo ubulungiseleli babo.’—2 Tim. 4:5.

• Ixesha Elichithwayo: Ziiveki ezimbini.

• Indawo: Ikhethwa yiofisi yesebe; idla ngokuba yiHolo yoBukumkani ekufutshane.

• Iimfaneleko: Ngabo bebengoovulindlela abathe ngxi ubuncinane kangangonyaka.

• Imvume Yokuya: Oovulindlela abafanelekayo baxelelwa ngumveleli wabo wesiphaluka.

ISikolo Sabafikayo EBheteli

• Injongo: Esi sikolo, silungiselelwe ukunceda abo bafikayo bakwazi ukuqhubeka nenkonzo yaseBheteli.

• Ixesha Elichithwayo: Yiyure enye kangangeeveki ezilishumi elinesithandathu.

• Indawo: EBheteli.

• Iimfaneleko: Iba ngamalungu asisigxina entsapho yaseBheteli okanye amatsha-ntliziyo aza kuhlala ixesha elide (unyaka okanye ngaphezulu).

• Imvume Yokuya: Lithi lakufika ixesha lokuya abizelwe kuso.

ISikolo Sobulungiseleli SoBukumkani

• Injongo: Kukuqeqesha abadala nezicaka zolungiselelo ukuze zikwazi ukongamela nokunyamekela iimbopheleleko zazo. (IZe. 20:28) Esi sikolo siqhutywa emva kweminyaka ethile ngokwesigqibo seQumrhu Elilawulayo.

• Ixesha Elichithwayo: Kwiminyaka yakutshanje, abadala bebechitha usuku olunesiqingatha zize izicaka zolungiselelo zichithe usuku olunye.

• Indawo: Sidla ngokuba kwiHolo yoBukumkani okanye kwiHolo yeNdibano.

• Iimfaneleko: Umele ube ngumdala okanye isicaka solungiselelo.

• Imvume Yokuya: Abadala nezicaka zolungiselelo ezifanelekayo zibizwa ngumveleli wesiphaluka.

ISikolo Sabadala Bebandlaa

• Injongo: Kukunceda abadala bazinyamekele kakuhle iimbopheleleko zebandla.

• Ixesha Elichithwayo: Ziintsuku ezintlanu.

• Indawo: Ikhethwa yiofisi yesebe; idla ngokuba yiHolo yoBukumkani okanye iHolo yeNdibano ekufuphi.

• Iimfaneleko: Ngabadala kuphela.

• Imvume Yokuya: Abo badala bafanelekayo babizwa yiofisi yesebe.

ISikolo Sabaveleli Abahambahambayo Nabafazi Babob

• Injongo: Kukunceda abaveleli besiphaluka nabezithili ukuze bawakhonze kakuhle amabandla nokuze ‘basebenze nzima ekuthetheni nasekufundiseni’ nokwalusa abo babanyamekelayo.—1 Tim. 5:17; 1 Pet. 5:2, 3.

• Ixesha Elichithwayo: Ziinyanga ezimbini.

• Indawo: Ikhethwa yiofisi yesebe.

• Iimfaneleko: Umele ubengumveleli wesiphaluka okanye owesithili.

• Imvume Yokuya: Abaveleli abahambahambayo abafanelekayo nabafazi babo bamenywa yiofisi yesebe.

ISikolo SeBhayibhile Sabazalwana Abangatshatangac

• Injongo: Kukunceda abadala nezicaka zolungiselelo ezingatshatanga zikulungele ukusingatha iimbopheleleko ezingakumbi. Inkoliso yabaphumeleleyo iya kuthunyelwa apho kufuneka abavakalisi abangakumbi kwilizwe labo. Imbinana yabo isenokuthunyelwa kwelinye ilizwe ukuba imeko iyabavumela.

• Ixesha Elichithwayo: Ziinyanga ezimbini.

• Indawo: Ikhethwa yiofisi yesebe; idla ngokuba yiHolo yeNdibano okanye iHolo yoBukumkani.

• Iimfaneleko: Ngabazalwana abangatshatanga abamalunga neminyaka engama-23 ukusa kwengama-62 ubudala abasempilweni nabafuna ukukhonza abazalwana nalapho kufuneka abavakalisi abangakumbi khona. (Marko 10:29, 30) Xa lo mzalwana engumdala umele abe sele egqibe iminyaka emibini enguye ngokunjalo nesicaka solungiselelo ibe mibini.

• Indlela Yokufumana Imvume: Ukuba esi sikolo sikho kwintsimi ephantsi kwesebe lenu, kuya kubakho intlanganiso yabo banomdla kwindibano yesiphaluka. Inkcazelo engakumbi ifumaneka kuloo ntlanganiso.

ISikolo SeBhayibhile Sezibini EzingamaKristud

• Injongo: Kukuqeqesha ngokukhethekileyo izibini ezitshatileyo zilungele ukusetyenziswa ngakumbi nguYehova nentlangano yakhe. Inkoliso yeziphumeleleyo iya kuthunyelwa apho kufuneka abavakalisi abangakumbi kwilizwe lazo. Imbinana yazo isenokuthunyelwa kwelinye ilizwe ukuba imeko iyazivumela

• Ixesha Elichithwayo: Ziinyanga ezimbini.

• Indawo: Iiklasi ezimbalwa zokuqala zisaqhutywa kwiZiko Lemfundo LeWatchtower ePatterson, New York, eMerika. Kamva, siza kuqhutyelwa kwiindawo ezikhethwe yiofisi yesebe, enoba yiHolo yeNdibano okanye yiHolo yoBukumkani.

• Iimfaneleko: Zizibini ezineminyaka engama-25 ukusa kwengama-50 ubudala nezisempilweni eziza kukwazi yaye zikulungele ukuya kukhonza apho kufuneka abavakalisi abangakumbi nezinesimo sengqondo esithi “Ndikho! Thuma mna.” (Isa. 6:8) Ukongezelela, zimele ukuba sele zitshate kangangeminyaka emibini yaye zibe kwinkonzo yexesha elizeleyo iminyaka emibini.

• Indlela Yokufumana Imvume: Ukuba esi sikolo sikho kwintsimi yesebe lenu, kuya kubakho intlanganiso nabo banomdla ebudeni bendibano ekhethekileyo yosuku olunye. Inkcazelo engakumbi ifumaneka kuloo ntlanganiso.

ISikolo SeBhayibhile SeWatchtower SaseGiliyadi

• Injongo: Kukuqeqesha oovulindlela nabanye abakwinkonzo yexesha elizeleyo ukuze babe ngabathunywa bevangeli.

• Ixesha Elichithwayo: Ziinyanga ezintlanu.

• Indawo: KwiZiko Lemfundo LeWatchtower, ePatterson, New York, eMerika.

• Iimfaneleko: Zizibini ezitshatileyo ezibhaptizwe kangangeminyaka emithathu nezinemiyaka engama-21 ukusa kwengama-38 ubudala xa zazifaka iifomu zazo zokuqala. Zimele zikwazi ukuthetha isiNgesi, zibe zitshate ubuncinane iminyaka emibini yaye zibe zikwinkonzo yexesha elizeleyo iminyaka emibini ngaphandle kokuphazamiseka. Zimele zibe sempilweni. Oovulindlela abakhonza kwilizwe lasemzini (kuquka bangabathunywa bevangeli); abaveleli abahambahambayo; amalungu entsapho yaseBheteli; nabo baphumelele kwiSikolo Sokuqeqesha Abalungiseleli, iSikolo SeBhayibhile Sabazalwana Abangatshatanga, neSikolo SeBhayibhile Sezibini EzingamaKristu, nabo banokuzalisa iifomu ukuba bayafaneleka.

• Indlela Yokufumana Imvume: Kumasebe athile, kubakho intlanganiso nabo banomdla wokuya kwesi sikolo ebudeni bendibano yesithili. Inkcazelo engakumbi ifumaneka kuloo ntlanganiso. Ukuba ayikho le ntlanganiso kwindibano yelizwe lakho yaye unomdla wokuya, unokubhalela iofisi yesebe ukuze ufumane iinkcukacha ezithe vetshe.

ISikolo Samalungu Ekomiti Yesebe Nabafazi Bawo

• Injongo: Kukunceda amalungu eKomiti Yesebe awulungele kakuhle umsebenzi wokunyamekela amakhaya aseBheteli, enikel’ ingqalelo kwimibandela yenkonzo echaphazela amabandla, avelele iziphaluka nezithili ezikwintsimi yawo, kuquka umsebenzi wokuguqulela, wokushicilela, owokuthumela uncwadi nowokuvelela amasebe awahlukahlukeneyo.—Luka 12:48b.

• Ixesha Elichithwayo: Ziinyanga ezimbini.

• Indawo: KwiZiko Lemfundo LeWatchtower, ePatterson, New York, eMerika.

• Iimfaneleko: Umele abe lilungu leKomiti Yesebe okanye leKomiti Yelizwe okanye abe kwisabelo esifana nezo.

• Imvume Yokuya: Abazalwana abafanelekayo nabafazi babo babizwa liQumrhu Elilawulayo.

[Imibhalo esemazantsi]