AmaNgqina KaYehova Ayifundiswa Njani Indlela Akhonza Ngayo?
AmaNgqina kaYehova aqhubeka efundiswa ngazo zonke izinto adinga ukuzazi njengamaKristu, loo nto iquka umsebenzi wabo wokushumayela. UYesu Kristu wathi abalandeli bakhe bamele bashumayele iindaba ezilungileyo ezingoBukumkani bukaThixo. (Mateyu 24:14; 28:19, 20) Qho ngeveki ayafundiswa kwiintlanganiso nakwiindibano ezibakho qho ngonyaka, ezincinci nezinkulu. AmaNgqina kaYehova aneminye imisebenzi ebandleni nasentlanganweni afundiswa nakwezinye izikolo ezikhethekileyo zeBhayibhile.
Kweli nqaku
Yintoni ayifundiswayo amaNgqina kaYehova?
Iintlanganiso zebandla. Qho ngeveki, kubakho iintlanganiso ezimbini kwiindawo esikhonzela kuzo ezibizwa ngokuba ziiHolo zoBukumkani. Eyokuqala intlanganiso idla ngokuba phakathi evekini; ize enye ibe ngempela-veki. Wonke umntu wamkelekile ibe akukho nkongozelo iqokelelwayo.
Iintlanganiso zaphakathi evekini. Sincedwa sikwazi ukufunda, ukuncokola, ukuthetha phambi kwabantu, ukushumayela nokufundisa. Yonke lento siyifundiswa ngeentetho, iingxubusho, imiboniso neevidiyo. Lento isinceda sikwazi ukufundisa abanye umyalezo weBhayibhile size siqhube izifundo zeBhayibhile nabo banomdla. Bonke abo baya kwezintlanganiso bayancedakala. Ngaphezu koko, ezi ntlanganiso zisiqinisa ukholo kuThixo, zisenze simthande, ibe nabo sikhonza nabo sibathande.
Iintlanganiso zangempela-veki. Ezi ntlanganiso zihlulwa kabini. Kubakho intshumayelo esekelwe eBhayibhileni eyenzelwe bonke abantu, nabo bangengomaNgqina kaYehova. Emva koko kuye kufundwe inqaku elikwiMboniseloa apho kuye kubuzwe imibuzo kuze kumane kuphendulwa. La manqaku aye athethe ngezinto ezisekelwe eBhayibhileni nemigaqo esinceda xa sishumayela, nakubomi bethu.
Iindibano ezincinci nezinkulu. Qho kathathu ngonyaka siye sidibane singamabandla amaninzi. Ezi ndibano ziba nomxholo osekelwe eBhayibhileni. Kuzo kubakho iintetho, imiboniso amava neevidiyo. Njengakwiintlanganiso zebandla, ezi ndibano zincinci nezinkulu zisenza siyazi kakhulu iBhayibhile size sikwazi nokuzishumayela kakuhle iindaba ezilungileyo. Kwakhona kwezi ndibano wonke umntu wamkelekile ibe akukho nkongozelo iqokelelwayo.
Izikolo zeBhayibhile zamaNgqina kaYehova
Ukuze amaNgqina kaYehova afundiswe nezinye izinto aye amenywe kwizikolo zeBhayibhile ezahlukahlukeneyo. Zeziphi ezo zikolo? Zenzelwe ntoni ibe zithatha ixesha elingakanani? Ngoobani abanokuya kuzo?
ISikolo Senkonzo Yobuvulindlela
Senzelwe ntoni? Senzelwe ukunceda abantu abasoloko beshumayela ababizwa ngokuba ngoovulindlelab ukuze bakwazi ukushumayela kakuhle, nokufundisa kakuhle. Esi sikolo siba neentetho, imiboniso neengxubusho.
Sithatha ixesha elingakanani? Iintsuku eziyi-6.
Kuya abantu abatheni? Kumenywa abantu abasele begqibe unyaka bengoovulindlela abathe ngxi. Nabantu ekudala bengoovulindlela nabaseneminyaka eyi-5 bengekaphindi baye.
ISikolo Sabavangeli Bobukumkani
Senzelwe ntoni? Senzelwe ukunceda oovulindlela abanamava ukuze bakwazi ukuwenza kakuhle umsebenzi wabo. Abafundi baye bafundiswe ukushumayela kakuhle nokufundisa, ibe baye bafundisise izinto ekuthethwa ngazo eBhayibhileni. Emva kokuba siphelile, abafundi abaye kuso baye bathunyelwe apho kudingeka abantu abaninzi abaza kushumayela.
Sithatha ixesha elingakanani? Iinyanga ezimbini.
Kuya abantu abatheni? Oovulindlela bangakwazi ukufaka izicelo ukuba bayafaneleka nokuba bakulungele ukuya naphi na apho bathunyelwa khona.
ISikolo Sabadala Bebandla
Senzelwe ntoni? Senzelwe ukunceda abadala bebandla ukuze bakwazi ukwenza imisebenzi yabo yasebandleni enjengokufundisa nokuhoya abantu abasebandleni. Esi sikolo sibanceda bathande uThixo baze bathande nabantu abakhonza nabo.—1 Petros 5:2, 3.
Sithatha ixesha elingakanani? Iintsuku eziyi-5.
Kuya abantu abatheni? Abazalwana abasandakuba ngabadala kunye nabo sekudlule iminyaka eyi-5 bengekaphindi baye kuso.
ISikolo Sabaveleli Besiphaluka Nabafazi Babo
Senzelwe ntoni? Senzelwe ukufundisa abashumayeli abahambahambayo, ekuthiwa ngabaveleli besiphalukac ukuze bakwazi ukuwenza kakuhle umsebenzi wabo. (1 Timoti 5:17) Izinto ezifundiswa kwesi sikolo zinceda abaveleli kunye nabafazi babo bazazi kakuhle iZibhalo.
Sithatha ixesha elingakanani: Inyanga enye.
Kuya abantu abatheni? Kuya abazalwana abasand’ ukuba ngabaveleli kunye nabafazi babo emva kokuba begqibe unyaka omnye besenza lo msebenzi. Emva koko baphinda bamenywe xa sele begqibe iminyaka eyi-5.
ISikolo Sobulungiseleli SoBukumkani
Senzelwe ntoni? Senzelwe ukunceda abadala nezicaka zolungiselelod ukuze bakwazi ukwenza kakuhle imisebenzi yabo yasebandleni, behambisana notshintsho olwenzekayo kunye nezinto ezidingekayo. (2 Timoti 3:1) Esi sikolo sibakho emva kweminyaka embalwa.
Sithatha ixesha elingakanani? Kuyaxhomekeka, amaxesha amaninzi iba lusuku olunye.
Kuya abantu abatheni? Abaveleli besiphaluka, abadala, nezicaka zolungiselelo.
ISikolo Senkonzo YaseBheteli
Senzelwe ntoni? Senzelwe ukunceda abantu baseBhetelie ukuba bakwazi ukuwenza kakuhle umsebenzi wabo baze bamthande kakhulu uThixo nabanye abantu.
Sithatha ixesha elingakanani? Siba ziintsuku eziyi-5 nehafu.
Kuya abantu abatheni? Abantu abasand’ ukufika eBheteli nabantu abeneminyaka eyi-5 bengekaphindi bamenywe kuso.
ISikolo SeBhayibhile SeWatchtower SaseGiliyadi
Senzelwe ntoni? Senzelwe ukunceda abafundi balithande baze baliqonde kakuhle iLizwi likaThixo, ibe siyabanceda ukuba bazenze izinto abazifundayo. (1 Tesalonika 2:13) Abazalwana noodade abamenywa kwesi sikolo baye bafundiswe ukuze bakwazi ukuyinceda nangezinye iindlela intlangano kaYehova, baze bawenze kakuhle nomsebenzi wokufundisa owenziwa emhlabeni wonke. Abazalwana abaye kwesi sikolo baye bathunyelwe ukuba baye kukhonza entsimini kwilizwe lakowabo okanye kwelinye ilizwe, okanye bathunyelwe eBheteli, nokuba iphi.
Sithatha ixesha elingakanani? Iinyanga eziyi-5.
Kuya abantu abatheni? IOfisi yeSebe iye imeme abazalwana noodade abathile ukuba bafake izicelo. Esi sikolo siqhutyelwa eUnited States kwiWatchtower Educational Center esePatterson, eNew York.
ISikolo Samalungu Ekomiti Yesebe Nabafazi Babo
Senzelwe ntoni? Ukuze sincede abazalwana abakwiKomiti Yesebef ukuba bawenze kakuhle umsebenzi wokukhokela kwiOfisi Yesebe, baze bawuhoye kakuhle nomsebenzi owenziwa ngamaNgqina kaYehova okwelo lizwe liphantsi kweSebe lawo.
Sithatha ixesha elingakanani? Iinyanga ezimbini.
Ngoobani abaya kuso? IKomkhulu Lehlabathi lamaNgqina kaYehova liye limeme abazalwana abathile abakwiKomiti YeSebe kunye nabafazi babo ukuba baye kwesi sikolo, siqhutyelwa kwiWatchtower Educational Center esePatterson, eNew York.
Izinto azifundiswayo amaNgqina zithathwa phi?
IBhayibhile isoloko iyeyona ncwadi isetyenziswayo xa kufundiswa amaNgqina kaYehova. Sikholelwa ukuba iBhayibhile iphefumlelwe nguThixo ibe yeyona ncwadi ikwaziyo ukufundisa abantu indlela yokuphila njengamaKristu.—2 Timoti 3:16, 17.
Ngaba amaNgqina kaYehova ayabhatala ukuze afundiswe?
Hayi. Afundiswa mahala. Zonke izinto ezenziwa ngamaNgqina kaYehova zixhaswa yiminikelo.—2 Korinte 9:7.
a IBhayibhile nezinto ezisinceda sifunde ngayo, kuquka neevidiyo ziyafumaneka kwiwebhsayithi yethu, u-jw.org.
b Uvulindlela liNgqina elibhaptiziweyo. Lisenokuba ngumzalwana okanye udade, ibe ngumntu ozigqibeleyo ukuba uza kusebenza ixesha elithile qho ngenyanga eshumayela ebantwini ngomyalezo weBhayibhile.
c Umveleli wesiphaluka ngumzalwana oshumayela ixesha lonke nohamba ayokubona amabandla awahlukeneyo qho ngeveki akwindawo ahlala kuyo. Uye akhuthaze abazalwana noodade ngeentshumayelo ezisekelwe eBhayibhileni aze ahambe nabo naxa beyokushumayela.
d Izicaka zolungiselelo zisebenza kakhulu zisenza imisebenzi eyahlukahlukeneyo enceda abazalwana noodade. Ngaloo ndlela zinceda abadala ukuba babe nexesha elaneleyo lokufundisa nelokuhoya ibandla.
e IBheteli ligama leeofisi zamasebe zamaNgqina kaYehova. Abazalwana noodade abasebenza khona bancedisa kwimisebenzi eyenziwa ngamaNgqina kaYehova abakwintsimi yasekuhlaleni.
f IKomiti YeSebe iba nabazalwana abathathu ukonyuka.