Lumkani Xa Nisentsimini
1. Kutheni sifanele silumke xa sisentsimini?
1 ‘Ekubeni bezizimvu phakathi kweengcuka,’ abakhonzi bakaThixo bashumayela “phakathi kwesizukulwana esigwenxa nesijijekileyo.” (Mat. 10:16; Fil. 2:15) Izidubedube, ubundlobongela nokuxhwilwa kwabantu ngenkohlakalo kuxhaphakile, nto leyo ebubungqina bokuba abantu abangendawo ‘bahambela phambili ebubini.’ (2 Tim. 3:13) Yiyiphi imigaqo yeZibhalo eya kusinceda ‘silumke’ xa sisentsimini?—Mat. 10:16.
2. Ziziphi iimeko ezinokwenza kube bubulumko ukuyishiya intsimi ethile size siye kushumayela kwenye?
2 Yibani Nobuqili: IMizekeliso 22:3 ithi kububulumko ‘ukuzifihla’ kwintlekele. Lumkani ngalo lonke ixesha! Iimeko zendawo ebonakala ikhuselekile zinokutshintsha ngesiquphe. Nisenokubona sele kuphithizela amapolisa okanye inginginya yabantu esitratweni. Ngamanye amaxesha, umininimzi onobubele usenokusilumkisa. Kunokuba sibe sizilazila kuba sifun’ ukubona ukuba kwenzeka ntoni, kububulumko ukumka ngokukhawuleza size siye kushumayela kwenye indawo.—IMize. 17:14; Yoh. 8:59; 1 Tes. 4:11.
3. Umgaqo okwiNtshumayeli 4:9 usebenza njani entsimini?
3 Sebenzani Kunye: INtshumayeli 4:9 ithi, “ababini balunge ngakumbi kunomnye.” Nangona usenokuba uqhele ukushumayela wedwa, ngaba kusakhuselekile ukwenjenjalo? Kwezinye iindawo kukhuselekile. Kodwa kwezinye iindawo akubobulumko ukuba udade okanye umntu oselula ashumayele kwindlu ngendlu yedwa, ingakumbi ngorhatya. Amava abonisa ukuba ukusebenza nomntu ophaphileyo kubaluleke ngeyona ndlela. (INtshu. 4:10, 12) Babek’ esweni ngalo lonke ixesha abantu oshumayela kunye nabo. Qiniseka ukuba uyabachazela abanye xa uphuma entsimini.
4. Sinokwenza ntoni ukuze kukhuselwe lonke ibandla?
4 Ekubeni ‘behlala beyilindile imiphefumlo yethu,’ abadala bafanele baqiniseke ukuba bawalathisa ngokucacileyo umhlambi ngokweemeko zasekuhlaleni. (Heb. 13:17) Siqinisekile ukuba uYehova uza kusisikelela njengoko sithozama size sisebenzisane ngokupheleleyo nabadala. (Mika 6:8; 1 Kor. 10:12) Ngamana bonke abakhonzi bakaThixo bangafak’ isandla ekuyisebenzeni ngokucokisekileyo intsimi, kodwa ke besoloko belumkile.