Nceda Abantu Baphulaphule UThixo
1. Yiyiphi incwadana enemifanekiso eyakhululwa kwiNdibano Yesithili enomxholo othi “Mabufike UBukumkani Bakho!” yaye yintoni eyenza ibe luncedo kangaka?
1 KwiNdibano Yesithili yalo nyaka uphelileyo eyayinomxholo othi “Mabufike UBukumkani BukaThixo!” kwakhululwa incwadana entsha enemifanekiso, enomxholo othi Phulaphula UThixo Uze Uphile Ngonaphakade. Ekubeni le ncwadana ingabhalwanga nto ininzi, inokuguqulelwa ngokukhawuleza nangokulula. Eneneni, le ncwadana kwathiwa mayiguqulelwe ngeelwimi ezingama-431 emva kokuba ikhululwe.
2. Iza kunceda oobani le ncwadana?
2 Ngoobani abaya kuncedwa kakhulu yile ncwadana? Khawucinge ngezi meko zilandelayo ezixhaphakileyo ehlabathini lonke:
• Umvakalisi oncokola nomninimzi, enoba badibana okokuqala okanye libuyelo, uphawula ukuba umninimzi akafundanga okanye akakwazi kufunda kakuhle.
• Umvakalisi ushumayela kubantu abathetha ulwimi ekukho ngalo iimpapasho ezimbalwa okanye ezingekho kwaukubakho. Okanye abantu abaninzi entsimini abakwazi kulufunda ulwimi abaluthethayo.
• Umvakalisi ushumayela ngentetho yezandla kubantu abangevayo kwintsimi yakhe.
• Umzali ufuna ukufundisa umntwana wakhe inyaniso nangona engekakwazi ukufunda kakuhle.
3. Yenziwe njani incwadana ethi Phulaphula UThixo Uze Uphile Ngonaphakade?
3 Indlela Ebhalwe Ngayo: Incwadana ethi Phulaphula UThixo Uze Uphile Ngonaphakade yenzelwe ukuze ifundwe nabantu abangakwazi kufunda kakuhle okanye abasafunda ukufunda. Kwikona engasekhohlo ekuqaleni kwesifundo ngasinye esinamaphepha amabini kukho umbuzo ophendulwa kweso sifundo. Kukwakho imifanekiso, amagqabaza kunye nezibhalo ezicatshuliweyo. Ngakwikona esemazantsi kumaphepha amaninzi kukho ibhokisi eneengongoma ezingakumbi kunye neZibhalo ezicatshuliweyo ezinokuxutyushwa, ukuba umfundi uyakwazi ukwenjenjalo.
4. Sinokuyihambisa nini yaye njani le ncwadana?
4 Indlela Yokuyisebenzisa: Le ncwadana ninokuyihambisa xa nikwindlu ngendlu nanini na nicinga ukuba iza kuba luncedo, enoba akuhanjiswa zincwadana kuloo nyanga. (Funda ibhokisi ethi, “Indlela Yokuyihambisa.) Ninokuthi xa nibuyela nixelele umninimzi ukuba kukho into enifuna ukumbonisa yona, nize nimnike loo ncwadana. Ninokufunda kunye izibhalo kunye noko kubhalwe ecaleni komfanekiso ngamnye.
5. Sinokusinceda njani isifundo seBhayibhile ukuze senze inkqubela?
5 Nceda Umfundi Enze Inkqubela: Sinethemba lokuba incoko yenu iya kwenza umfundi abe nomdla wokufunda nokulesa ukuze naye akwazi ukufunda ngokwakhe ngoYehova. (Mat. 5:3; Yoh. 17:3) Noko ke, umfundi akayi kuba sele ekulungele ukubhaptizwa xa egqiba kufunda le ncwadana. Nifanele niqalise ukufunda incwadi ethi Okufundiswa YiBhayibhile okanye enye incwadi eya kumnceda ayiqonde bhetele iBhayibhile.
6. Kutheni unombulelo ngezi zixhobo zitsha siza kuzisebenzisa entsimini?
6 Abantu bafanele baphulaphule uSomandla wendalo iphela ukuze baphile ngonaphakade. (Isa. 55:3) Intando kaYehova kukuba “zonke iintlobo zabantu” zifunde ukumphulaphula, kuquka abo bangakwazi kufunda. (1 Tim. 2:3, 4) Sinombulelo gqitha ngale ncwadana intsha esiza kuyisebenzisa ukuze sifundise abantu ukuphulaphula uThixo!
[Ibhokisi ekwiphepha 7]
Indlela Yokuyihambisa
Bonisa umninimzi iphepha 2-3, uze uthi: “Ngaba ungathanda ukuhlala kwihlabathi elinje? [Mvumele aphendule.] IZibhalo zithembisa [okanye, le ncwadi engcwele ithembisa] ukuba kungekudala uThixo uza kwenza umhlaba ube yindawo entle nenoxolo apho kungayi kubakho mntu ulihlwempu okanye ogulayo. Khawuve ukuba sifanele senze ntoni ukuze siphile apho. [Funda uIsaya 55:3, ocatshulwe kumantla ephepha 3.] Apha kuthiwa ‘masize’ kuThixo size ‘simphulaphule.’ Kodwa sinokumphulaphula njani uThixo?” Tyhila kwiphepha 4-5 uze uxubushe impendulo kunye naye. Ukuba akanaxesha, mshiyele incwadana nize nenze amalungiselelo okuba ubuye ukuze nincokole ngempendulo.