“Bufeze Ngokupheleleyo Ubulungiseleli Bakho”
1. Nguwuphi umzekelo omhle owamiselwa nguPawulos kubulungiseleli?
1 “Bufeze ngokupheleleyo ubulungiseleli bakho.” (2 Tim. 4:5) Umpostile uPawulos wayenenkululeko yokuthetha xa wayeluleka uTimoti. Kwiminyaka ephakathi kowama-47 nowama-56 C.E., uPawulos wayesele egqibe imijikelo emithathu yohambo lobuvangeli. Incwadi yeZenzo isoloko ithetha ngokunikela “ubungqina obucokisekileyo” kukaPawulos. (IZenzo 23:11; 28:23) Singakwenza njani oko namhlanje?
2. Sinokushumayela njani ngokucokisekileyo xa sikwindlu ngendlu?
2 Kwindlu Ngendlu: Ukuze sikwazi ukuthetha nabaninimzi abangazange bazive iindaba ezilungileyo, kusenokufuneka sibatyelele ngamaxesha angafaniyo. Utat’ ekhaya usenokuba sekhaya ngorhatya okanye ngeempela-veki. Sifanele sizame ukuthetha nomntu othile kwikhaya ngalinye, sityelele ngokuphindaphindiweyo kumakhaya ekungekho mntu kuwo. Kuthekani ukuba imizamo yethu yokufikelela abantu abangakumbi iwa phantsi? Mhlawumbi ukubhala ileta okanye ukufowuna kunokuba nemiphumo emihle.
3. Ngawaphi amathuba onawo okushumayela esidlangalaleni nangokungacwangciswanga?
3 Esidlangalaleni Nangokungacwangciswanga: Namhlanje abakhonzi bakaYehova baxelela bonke abantu abaya kuphulaphula ‘ngobulumko bokwenyaniso.’ Maxa wambi lo msebenzi wenziwa “esitratweni” okanye “kwiindawo zembutho.” (IMize. 1:20, 21) Xa sisenza imisebenzi yethu yemihla ngemihla, ngaba sikuphaphele ukushumayela? Ngaba kunokuthiwa ‘sixineke lilizwi’? (IZenzo 18:5) Ukuba kunjalo, senza umsebenzi wethu ‘wokunikela ubungqina ngokucokisekileyo.’—IZenzo 10:42; 17:17; 20:20, 21, 24.
4. Ukuthandaza nokucamngca kufaka isandla njani ekushumayeleni ngokucokisekileyo?
4 Maxa wambi, ngenxa yokuzoyikisela okanye ukuba neentloni, sisenokuba madolw’ nzima ukushumayela. Ngokuqinisekileyo, uYehova uyakuqonda ukusikelwa kwethu umda. (Nd 103:14) Nakuba kunjalo, kwiimeko ezilolo hlobo, sinokuthandazela ukuba asinike isibindi sokuthetha. (IZenzo 4:29, 31) Kwanaxa sifundisisa iLizwi likaThixo, sinokucamngca ngokuxabiseka kweendaba ezilungileyo. (Fil. 3:8) Loo nto iya kusenza sizishumayele ngenzondelelo.
5. Singabanayo njani inxaxheba kwinzaliseko yesiprofeto sikaYoweli?
5 Isiprofeto sikaYoweli saxela kwangaphambili ukuba ngaphambi kokufika kwemini enkulu neyoyikekayo kaYehova, abantu bakaThixo baya ‘kuhamba’ yaye abayi kuvumela nantoni na ukuba ibaphazamise. (Yow. 2:2, 7-9) Ngamana singazijul’ ijacu kulo msebenzi ungasayi kuze uphinde wenziwe!