Ngaba Uza Kulisebenzisa Eli Thuba?
ISikhumbuzo Salo Nyaka Siza Kusenza Sibonise Umbulelo
1. ISikhumbuzo siza kusinika liphi ithuba elikhethekileyo?
1 ISikhumbuzo esiza kube singomhla ka-Aprili 14, siza kusinika ithuba lokubonisa umbulelo ngokulunga kukaYehova. Ingxelo ekuLuka 17:11-18 ibonisa indlela uYehova noYesu abawujonga ngayo umbulelo. Okubuhlungu kukuba mnye kuphela kwabalishumi ababeneqhenqa owabulelayo. Kwixa elizayo, isipho sentlawulelo siza kuzinyanga ngokupheleleyo zonke izifo, kuphilwe ngonaphakade! Ngokungathandabuzekiyo, siza kumbulela yonke imihla uYehova ngenxa yezo ntsikelelo. Kodwa sinokuwubonisa njani mbulelo wethu kwezi veki zizayo?
2. Sinokwenza njani ukuze sibe nombulelo ngentlawulelo?
2 Yiba Nombulelo: Ukuze ube nombulelo kufuneka uzikise ukucinga. Ukuze siyixabise intlawulelo, siza kuncedwa lucwangciso lokufundwa kweBhayibhile lweSikhumbuzo olukhethekileyo olufumaneka kwiindawo ezahlukahlukeneyo, njengakwisihlomelo B12 seNguqulelo Yehlabathi Elitsha ehlaziyiweyo, kwikhalenda nakwincwadana ethi Ukuhlolisisa IZibhalo Imihla Ngemihla. Kutheni ningayifundi kunye le ngxelo njengentsapho? Ukwenza njalo kuya kusinceda siyiqonde nangakumbi intlawulelo. Oku kuza kuba nemiphumo emihle kwihambo yethu.—2 Kor. 5:14, 15; 1 Yoh. 4:11.
3. Ziziphi iindlela esinokubonisa ngazo umbulelo kweli xesha leSikhumbuzo?
3 Bonisa Umbulelo: Umbulelo ubonakala ngezenzo. (Kol. 3:15) Umntu owayeneqhenqa wenza imigudu yokufumana uYesu ukuze ambulele. Ngokungathandabuzekiyo, wayibalisa ngehlombe kwabanye indlela engummangaliso awaphiliswa ngayo. (Luka 6:45) Ngaba ukuba nombulelo kuza kusenza sikhuthale kwiphulo lokubhengeza iSikhumbuzo? Enye indlela entle yokubonisa umbulelo kweli xesha leSikhumbuzo kukuba nguvulindlela ongumncedani okanye ukuchitha ixesha elingakumbi entsimini. Ngengokuhlwa yeSikhumbuzo, uxabiso olusuka entliziyweni luza kusenza samkele iindwendwe yaye sikulungele ukuphendula imibuzo yazo.
4. Sinokwenza njani ukuze singazisoli emva kwesi Sikhumbuzo?
4 Ngaba esi Sikhumbuzo siza kuba sesokugqibela? (1 Kor. 11:26) Asazi. Into esiyaziyo kukuba sakudlula, alikho elinye ithuba lokubonisa umbulelo eliya kuphinda lifane neli. Ngaba uza kulisebenzisa? Ngamana amazwi ethu oxabiso neengcamango zentliziyo yethu zingamkholisa uYehova, uMlungiseleli onenceba wentlawulelo.—INdu. 19:14.