Ukuphucula Ubuchule Bethu Bokushumayela—Ukushumayela Kwintsimi Yamashishini

Isizathu Sokuba Kubalulekile: Ngenxa yokuba abantu besebenza iiyure ezinde, eyona ndlela isebenzayo yokubafikelela ngesigidimi soBukumkani kukuya kwiindawo abaphangela kuzo. Ukushumayela kwintsimi yamashishini kumnandi yaye kuba nemiphumo ngenxa yokuba bonke abantu bayafumaneka ibe nabasebenzi baba nobubele kubantu ababonakala ngathi baza kuthenga. Ukuze babe nempumelelo, abavakalisi bafanele babe nengqiqo yaye banxibe ngokundilisekileyo. (2 Kor. 6:3) Ngoko ke, umveleli wenkonzo ufanele aqiniseke ngezihlandlo esetyenzwa ngazo intsimi yamashishini yaye azi ukuba isetyenzwa ngoobani.

Indlela Yokukwenza:

Lungiselela intshumayelo emfutshane. Ukuba sithetha ixesha elide nomsebenzi, sisenokungakwazi ukuphinda sithethe naye kwixesha elizayo.
Khetha amaxesha angaxakekanga ngawo amashishini amaninzi, njengaxa kuvulwa.
Zama ukuthetha nomntu ophetheyo kuqala. Yiba nobubele. Usenokuthi: “Sityelela abantu kwimisebenzi yabo ngenxa yokuba kunzima ukubafumana emakhayeni.” Yenza intshumayelo emfutshane, uze umnike iphecana, imagazini okanye enye impapasho. Ukuze kungacingwa ukuba siyathengisa, kuhle ukuba singatheth’ into ngomnikelo wokuzithandela ngaphandle kwaxa bebuza.
Ukuba lo mntu uphetheyo unobubele, cela ukushumayela kwabanye abasebenzi. Kwamanye amashishini, kunokuba ngcono ukucela ukushiya izinto zokufunda kwindawo abatyela okanye abaphumlela kuyo abasebenzi.
Yiba nengqiqo uze uhambisane neemeko. Ngokomzekelo, ukuba umsebenzi uxakekile okanye uthetha nomntu oze kuthenga, mlinde agqibe ngaphambi kokuba uye kuthetha naye.

Khawulizame Kwakule Nyanga:

Kwingokuhlwa yoNqulo Lwentsapho ezayo, qheliselani intshumayelo eninokuyisebenzisa xa nicelwa ukuba nisebenze kwintsimi yamashishini.